Julian Felipe Reef, 'di pag-aari ng 'Pinas — Palasyo

ni Ronalyn Seminiano Reonico | May 11, 2021

Hindi sakop ng exclusive economic zone (EEZ) ng Pilipinas ang Julian Felipe Reef, ayon sa Malacañang ngayong Martes.

Pahayag ni Presidential Spokesperson Harry Roque, “Bagama't ‘yung Julian Felipe po ay meron tayong claim, sa katunayan, ni minsan, hindi natin na-possess ‘yan. Napakalayo po niyan du’n sa mga islang ating na-possess at ang talagang nag-aagawan ng teritoryo ng Julian Felipe ay ang mga bansang Vietnam at China.”

Saad pa ni Roque, “All we’re saying is we’re never in possession of that area. We’re making a big thing out of the fact that the area naman, in the first place, was never under our possession. Pinalalaki po. Pinalalaki ang issue.

“Ang issue po talaga riyan is unang-una, fishing… Kasi hindi po talaga 'yan kabahagi ng ating EEZ, ‘yung Julian Felipe. Labas po ‘yan, ganyan po kalayo ‘yan.”

Gayunpaman, ayon kay Roque ay may claim pa rin ang Pilipinas sa Julian Felipe Reef na nasa approximately 175 nautical miles west ng Bataraza, Palawan.

Saad pa ni Roque, “It doesn’t weaken anything kasi hindi naman natin gini-give-up iyong claim natin to Julian Felipe pursuant to Marcos appending Julian Felipe into the territory of the Philippines. That is our evidence of effective occupation.”

Pangulo naghamon, umatras dahil wa' 'wenta raw… Spox Roque: P-DU30, mapapahamak sa debate kay Carpio

ni Ronalyn Seminiano Reonico | May 7, 2021

Umatras si Pangulong Rodrigo Duterte sa debate laban kay dating Supreme Court Justice Antonio Carpio tungkol sa isyu sa West Philippine Sea (WPS) dahil sa payo ng mga gabinete, ayon sa Malacañang ngayong Biyernes.

Sa public address ni P-Duterte noong Miyerkules, aniya ay sangkot si Carpio sa pagpapaalis ng barko ng Pilipinas sa standoff sa mga barko ng China sa Scarborough Shoal noong 2012.

Nangako rin ang pangulo na magbibitiw siya sa puwesto kung mapapatunayan na mali ang kanyang pahayag kasabay ng paghahamon ng debate kay Carpio.

Pinabulaanan naman ni Carpio ang mga sinabi ni P-Duterte at aniya ay dapat na itong magbitiw sa puwesto sa lalong madaling panahon “to keep his word of honor.”

Pahayag naman ni Presidential Spokesperson Harry Roque, “Alam ko po lahat kayo ay naghihintay kung ano ang mangyayari sa debate sa panig po ng presidente at ni retired Justice Antonio Carpio. “Totoo po, hinamon po ni Presidente si Justice Carpio sa debate pero ang pagdedebate po ay dalawang bagay. Sino ba ho ang responsable sa pagkawala ng Scarborough Shoal? Eh, ‘yung detalye po na sinabi ni Antonio Carpio sa kanyang gustong maging debate, eh, kung kabahagi raw po si retired Justice Carpio sa pagkawala ng Scarborough Shoal.

"Hindi naman po ‘yun ang subject matter ng debate. Ang subject matter po ng debate ay sino at ano’ng administrasyon ang naging dahilan kung kailan nawala po sa Pilipinas ang possession sa Scarborough Shoal at kung gusto ninyo, tanungin na rin natin, sino at ano’ng administrasyon nawala sa atin ang Mischief Reef.”

Saad pa ni Roque, “Handang-handa po sana ang presidente na dumebate pero kagabi po, eh, tinanggap po niya ang advise ng ilang mga miyembro ng gabinete kasama na po si Executive Secretary (Salvador) Medialdea. Ang sabi po ng ating mga gabinete, at sinusundan po ito ng dalawang senador… si Senate President Sotto at si Senator Pimentel na unang-una, wala pong mabuting magiging resulta itong debateng ito para sa sambayanang Pilipino.”

Ang pangalawang rason ay hindi umano tabla at hindi patas na ang isang pangulo ay makikipagdebate sa ordinaryong mambabatas.

Saad pa ni Roque, “Nanindigan po ang mga miyembro ng gabinete na bakit papayag sa debate, eh, nakaupong presidente naman si President Duterte at si Antonio Carpio po, bagama't siya’y dating mahistrado ay ordinaryong abogado na ngayon. Parang hindi naman po yata tabla na ang Office of the President, ang presidente mismo ay haharap sa isang ordinaryong mambabatas. Parang hindi po patas.”

Mahirap din umanong mag-participate sa debate ang isang pangulo dahil makaaapekto umano sa polisiya ng gobyerno ang mga posibleng sabihin ni P-Duterte.

Saad pa ni Roque, “Sinabihan po ang presidente ng ating mga miyembro ng gabinete na napakahirap po na mag-participate ang presidente sa ganyang debate. Bakit po? Kasi nakaupo pa siyang presidente. Ibig sabihin, lahat po ng masasabi ng presidente sa debateng iyon ay makakaapekto po sa mga polisiya ng gobyerno. Hindi na po mababawi ang pupuwedeng sabihin ng presidente sa debateng iyon bukod pa sa katotohanan na… kaya nga po tayo may tinatawag na executive privilege ‘no, ‘yung mga bagay-bagay na hindi dapat isapubliko para makagawa ng mga tamang desisyon bagama’t hindi pa po nagdedesisyon ang isang presidente.

"Mako-compromise po ang mga bagay-bagay na ito, ang mga impormasyon na ito kung papayag po at ituloy ng presidente ang pagdebate kay dating Supreme Court Justice Antonio Carpio.”

Bagama’t umatras sa debate si P-Duterte, ayon kay Roque, siya ang itinalaga bilang maging kapalit nito.

Saad ni Roque, “Tuloy po ang debate. Eh, ang sabi po ni Presidente, kung papayag si Antonio Carpio, tuloy po ang debate dahil importante naman na marinig ‘yung mga ideas para ang taumbayan ang makagawa ng konklusyon.

“Ang sabi po ng presidente, itinatalaga niya po ang inyong abang lingkod na makipagdebate kay retired Justice Antonio Carpio at tinanggap ko naman po ang pagtatalaga ni Presidente.”

Handa namang magsilbing host ng debate ang Philippine Bar Association (PBA) at saad ni Roque, sabihin lang umano ng organisasyon kung kailan at saan at sisipot siya.

Aniya pa, “Pero ang pagdedebatehan po, malinaw. Unang-una, sino ang responsable sa pagkawala ng teritoryo ng Pilipinas — si President Duterte o ang ibang administrasyon?

“Pangalawa, tama ba ang sinasabi ni Antonio Carpio na binalewala ni Presidente ang panalo natin doon sa Hague tribunal at kung gusto niya, pangatlo ay tama ba po na namimigay ng teritoryo ang Presidente Duterte?”

Mensahe rin niya kay Carpio, “Retired Supreme Court Justice Antonio Carpio, it would be a pleasure to debate against you. I’ll see you at the designated time and place.”

Bacolod, Tacloban at NCR, isinailalim sa GCQ; Iligan inilagay sa MECQ simula September 1

ni Lolet Abania | September 1, 2020

Isinailalim ang mga bayan ng Bacolod at Tacloban, kasama ang Metro Manila, Bulacan at Batangas sa general community quarantine (GCQ) upang mapigilan ang pagkalat ng COVID-19, simula, September 1.

Inilagay naman sa mas mahigpit na modified enhanced community quarantine (MECQ) ang Iligan. Ang iba pang bahagi ng bansa ay nasa modified general community quarantine (MGCQ).

Sa ibinigay na guidelines ni Presidential Spokesman Harry Roque, noong May, ang ECQ ay ipinatupad bilang temporary measures sa pagkakaroon ng mahigpit, limitadong galaw at restriksiyon sa transportasyon ng mga tao, istriktong regulasyon ng operasyon sa iba’t ibang industriya, maluwag ang supply ng pagkain at essential services, at malawakan ang mga nakatalagang uniformed personnel.

Samantala, ang MECQ ay transition phase sa pagitan ng ECQ at GCQ. Ayon kay Roque, sa ilalim ng MECQ, mahigpit at limitado pa rin ang galaw at transportasyon ng mga tao, may istriktong regulasyon ng operasyon ng iba’t ibang industriya, maluwag ang supply ng pagkain at essential services, at may kaunting nakatalagang uniformed personnel.

“Ang GCQ, ito ay tumutukoy sa pansamantalang mga hakbang para malimitahan ang galaw, at transportasyon, regulation ng operating industries, and presence of uniformed personnel para ipatupad ang community protocols,” sabi ni Roque.

Sa kabilang banda, ang MGCQ ay “transition phase sa pagitan ng GCQ at tinatawag na new normal,” sabi pa ni Roque.