Mga Pinoy repatriates, ‘di sakop ng travel ban — Palasyo

ni Ronalyn Seminiano Reonico | June 21, 2021

Hindi saklaw ng ipinatutupad na travel ban sa bansa sa mga biyaherong galing sa India, Pakistan, Bangladesh, Sri Lanka, Nepal, United Arab Emirates at Oman ang mga Pilipino na nasa repatriation program ng pamahalaan, ayon kay Presidential Spokesman Harry Roque noong Linggo.

Matatandaang pinalawig pa ng pamahalaan ang travel ban hanggang sa June 30.

Saad pa ni Roque, "Let it be clear, however, that Filipinos covered by the repatriation programs of the government and repatriation activities of manning/recruitment agencies cleared by the Bureau of Quarantine are not prohibited from entering the Philippines.”

Samantala, nilinaw din ni Roque na sasailalim sa COVID-19 testing at quarantine protocols ang mga pauuwiing Pilipino.

Aniya, “They can enter the country, subject to testing and quarantine protocols.”

Gym, super spreader ng COVID, bawal pa rin

ni Ronalyn Seminiano Reonico | June 1, 2021

Ipinagbabawal pa rin ng pamahalaan ang operasyon ng mga gyms sa mga lugar na nasa ilalim ng general community quarantine (GCQ) ‘with heightened restrictions’ kabilang na ang NCR Plus na binubuo ng Metro Manila at mga karatig na lugar, hanggang sa June 15, ayon sa Palasyo.

Ayon kay Presidential Spokesperson Harry Roque, dahil indoor na kadalasan ay air-conditioned, mas posible ang pagkakahawahan ng COVID-19 sa mga gyms.

Saad ni Roque, “Gyms are not allowed until June 15 because it is a matter of it at risk of being a super spreader event due to its nature of activities done indoors, [people] sweating and activities done in close contact.

“This is based on World Health Organization (WHO) and Department of Health (DOH) guidelines that gyms must remain closed for the time being alongside indoor amusement centers, arcades and internet cafes where it is difficult to observe social distancing.

“Pababain muna natin ang mga kaso ng COVID-19.”

Biyahe at pasyal ng lahat ng edad, aprub sa M'cañang

ni Lolet Abania | June 1, 2021

Pinayagan na ng gobyerno ang pagluluwag ng mga restriksiyon kaugnay sa COVID-19 para sa domestic travel habang inaprubahan ang mga leisure trips mula sa NCR Plus at mga lugar na nasa ilalim ng general community quarantine (GCQ) at modified GCQ anumang edad ng biyahero o lahat ng edad mula Hunyo 1 hanggang 15.

Sa isang press briefing ngayong Martes, sinabi ni Presidential Spokesperson Harry Roque na ang nasabing pagbiyahe ay pinapayagan na subalit dapat na negatibo sa test sa COVID-19 ang lahat ng mga travelers at sumusunod sa mga guidelines na ipinatutupad ng lokal na gobyernong kanilang pupuntahan.

Gayunman, nilinaw ni Roque na ang pagluluwag sa travel requirements ay pinapayagan lamang kung ito ay point-to-point travel. Binubuo ang NCR Plus ng mga lugar ng Metro Manila, Bulacan, Cavite, Rizal at Laguna.

Gayundin, ayon kay Roque, aprubado na rin ang outdoor non-contact sports, 30% operating capacity para sa mga venue meetings o conferences, 40% operating capacity para sa personal care services, at 30% sa outdoor tourist attractions para sa mga lugar na nasa ilalim ng GCQ with heightened restrictions, kabilang dito ang Metro Manila.