AFP spox Zagala, napiling acting PSG chief

ni Lolet Abania | June 26, 2022

Napili si Armed Forces of the Philippines (AFP) spokesman Col. Ramon Zagala na maging acting commander ng Presidential Security Group (PSG) at Senior Military Assistant ni President-elect Ferdinand “Bongbong” Marcos, Jr. kapag naupo na ito bilang pangulo sa Hunyo 30.

“Acting PSG commander and acting Senior Military assistant... ‘Yun daw ang ide-designate sa kanya,” sabi ni AFP public affairs chief Col. Jorry Baclor sa mga reporters ngayong Linggo.

Ayon kay Baclor, hinihintay pa ang issuance ng official order, subalit inaasahang gagawin na ni Zagala ang kanyang tungkulin sa Huwebes matapos na manumpa si Marcos bilang ika-17 pangulo ng Pilipinas.

Ang PSG ay kasalukuyang pinamumunuan ni Brig. Gen. Randolph Cabangbang. Si Zagala, 52-anyos, ay isang public affairs chief at spokesman ng Philippine Army, bago naging AFP spokesman noong Agosto 2021.

Sa panahon ng panunungkulan ni dating Pangulong Joseph Estrada, nagsilbi siya bilang presidential aide de camp. Ang lolo at ama ni Zagala ay parehong nagmula sa military.

Ang kanyang ama, si Maj. Gen. Rafael Zagala, ay isang Army chief mula 1972 hanggang 1975 sa panahon ng pamumuno ng ama ni P-BBM na si Ferdinand Marcos, Sr. at naiulat din na kabilang sa “Omega 12” na pinili ng yumaong Marcos para sa pagpapatupad ng Martial Law.

Sinopharm ng China, safe iturok kahit ‘di pa aprub - FDA

ni Mary Gutierrez Almirañez | May 4, 2021

Nilinaw ni Food and Drug Administration (FDA) Director General Eric Domingo na ang iginawad na compassionate special permit (CSP) sa Sinopharm COVID-19 vaccines noon ay para lamang sa 10,000 doses na inilaan sa Presidential Security Group (PSG) at hindi pa aniya napag-aaralan ng FDA ang itinurok na unang dose kay Pangulong Rodrigo Duterte kagabi, Mayo 3.

Ayon kay Domingo, "'Pag sinabing compassionate special permit, hindi po 'yun authorization na ibinigay ng FDA. In this case, ’yun pong head ng PSG hospital, siya ang nagga-guarantee na inaral niya ang bakuna and they take full responsibility for it. Sa amin po dito sa FDA, ‘di pa po namin na-evaluate ang bakunang 'yan."

Gayunman, epektibo pa rin ang naturang bakuna laban sa COVID-19, lalo’t wala pang iniulat na adverse event mula sa mahigit 3,000 miyembro ng PSG at asawa ng mga ito na unang nabakunahan.

Iginiit pa ni Domingo ang ginawang pag-e-evaluate ng World Health Organization (WHO) sa mga bakuna ng China, kung saan lumalabas na halos kapareho lamang nito ang Sinovac.

Aniya, "Unang-una, safe ang vaccine kasi inactivated virus katulad ng Sinovac… Continuing pa rin ang evaluation nila for this vaccine, pero so far, maganda naman po ang nakikitang mga resulta."

Sa ngayon ay nananatiling naka-pending ang approval para sa emergency use authorization (EUA) ng Sinopharm.

“Hanggang ngayon, pending case pa po ‘yan,” paglilinaw pa ni Domingo.

Maliban sa Sinovac COVID-19 vaccines ng China ay ang mga bakunang AstraZeneca, Sputnik V at Pfizer pa lamang ang pinahihintulutang iturok sa bisa ng EUA na iginawad ng FDA.

Public Address ni Pangulong Duterte, tuloy sa Lunes

ni Mary Gutierrez Almirañez | April 10, 2021

Kinumpirma ni Presidential Spokesperson Harry Roque sa ipinadalang text message na matutuloy sa Lunes ang ‘Talk to the People Address’ ni Pangulong Rodrigo Duterte, matapos mabahala ang ilang mamamayan sa kalusugan niya dahil sa hindi pagpapakita nitong mga nakaraang araw at mga na-postpone niyang public address.

“Monday,” iyan ang reply ni Roque bilang kumpirmasyon sa muling appearance ng Pangulo sa publiko.

Pinatotohanan naman ng video at mga larawan na in-upload ni Senator Bong Go ang aktibong pagdya-jogging ng Pangulo, taliwas sa mga espekulasyong mahina na siya dahil umano sa sakit na Barrett’s esophagus.

Ipinaliwanag din ng Palasyo na nag-iingat lamang ang Pangulo, matapos magpositibo sa COVID-19 ang mahigit 120 na miyembro ng Presidential Security Group (PSG).

Sa ngayon ay kumpirmadong nagpositibo muli sa COVID-19 si Spokesperson Harry Roque at kasalukuyang naka-admit sa Philippine General Hospital (PGH). Gayunman, tiniyak niyang siya pa rin ang mag-aanunsiyo ng bagong quarantine classification sa NCR Plus Bubble, katuwang ang Inter-Agency Task Force (IATF).

"I am now admitted in a hospital for Covid treatment. This is to say that COVID-19 is more transmissible now so we have to do extra precaution," sabi pa ni Roque.