Bagong klase ng COVID, kumakalat na…Travel ban sa UK, ‘di pa kailangan - Duque

ni Ronalyn Seminiano Reonico | December 27, 2020

Inirekomenda ni Department of Health (DOH) Secretary Francisco Duque III kay Pangulong Rodrigo Duterte ngayong Sabado na ikonsidera lamang ang travel ban sa United Kingdom kapag nasa lebel na ng community transmission ang bagong variant ng COVID-19 sa Pilipinas.

Pahayag ni Duque, “Base sa mga ulat na kinalap ng World Health Organization (WHO) mula ika-28 ng Agosto hanggang ika-23 ng Disyembre, may labingdalawang bansa sa Western Pacific Region ang nagtala ng mga imported na kaso mula sa UK. Kabilang po rito ang Hong Kong, China, Singapore, New Zealand, Korea, Japan, Malaysia, Vietnam, Australia, Taiwan and Cambodia.

“Sa mga ito, 3 bansa ang nakapagtala ng mga kaso base po sa bagong variant. Sa Australia ay may 4 na kaso nang natuklasan habang naka-quarantine. Sa Hong Kong ay may 2 kaso, dalawang estudyante na edad 14 at 17. Sa Singapore naman po ay may isang kaso, isa ring estudyante na 17 taong gulang. Sa Japan, na-detect ang new variant sa 5 biyahero mula sa UK.

“Samantala, wala pang kaso mula sa new variant ang naitala sa Pilipinas. Ngunit nais ko pong tukuyin ang limitasyon ng datos na ito. Ito ay mula sa mga official sites lamang kung saan ang datos ay patuloy na nagbabago o inaayos dahil sa ongoing case investigations. Meron ding mga naitalang imported na kaso na hindi matukoy ang pinanggalingan.

"Ginoong Pangulo, habang nadaragdagan ang mga bansang nag-uulat ng detection ng UK new variant, inirerekomenda po ng DOH kasama ng mga eksperto ng Technical Advisory Group (TAG) ng ating Inter-Agency Task Force (IATF) ng WHO na sa mga manggagaling sa mga bansang may kumpirmadong new variant, gawing mandatory ang pagtapos ng 14-day quarantine period sa New Clark City. Ang protocol na ito ay gaya ng ipinatupad ngayon para sa mga biyahero na dumating bago mag-alas-dose a uno, umaga ng December 24.

“Ikonsidera lamang ang travel ban, Mr. President kung nasa lebel na ng community transmission ang new variant sa naturang bansa (UK).”

Bagong klase ng COVID, mas matindi at delikado…Face-to-face classes sa 2021, ‘di tuloy — P-Duterte

ni Ronalyn Seminiano Reonico | December 26, 2020

Binawi ni Pangulong Rodrigo Duterte ang kanyang pag-apruba sa pagsasagawa ng dry run ng face-to-face classes sa January 2021 sa mga low COVID risk na lugar dahil sa bagong klase ng COVID-19 na pinaniniwalaang mas matindi at mas delikado.

Pahayag ni P-Duterte, “I have allowed kasi the face-to-face classes as a pilot project all over the country. With the new strain, true or not, maybe it's true because it’s being validated by Germany, South Africa, UK, eh, iyong order ko noon kay (Education Secretary Leonor) Briones, I’m calling back the order.

“I will not allow face-to-face classes for children until we are through with this [strain].”

"We have to know the nature of the germ we are confronting. We don't know anything and I cannot take the risk of allowing the children. That would be a disaster actually.”

Aniya ay aatasan niya si DepEd Sec. Leonor Briones na isuspinde ang lahat ng aktibidad ng mga batang mag-aaral lalo na ang face-to-face classes.

Ang bagong uri ng COVID-19 ay unang naitala sa United Kingdom at isinailalim ang bansa sa mas mahigpit na restriksiyon dahil ayon kay British Prime Minister Boris Johnson, "(It) Maybe up to 70% more transmissible than the original version of the disease."

Na-detect na rin ang bagong klase na ito sa Rome, Denmark, Netherlands, Australia at France.

Ayon naman kay P-Duterte, na-detect na rin ito sa Sabah, Malaysia na malapit sa Sulu.

Samantala, ipinag-utos na ang suspensiyon ng mga flights sa UK simula pa noong December 24 hanggang sa December 31.

South Korean Ambassador Han, binigyan ni P-Duterte ng Order of Sikatuna

ni Lolet Abania | December 11, 2020

Kinilala ni Pangulong Rodrigo Duterte ang mga ginawang pagtulong ng South Korea sa Pilipinas lalo na sa paglaban sa COVID-19, ayon sa Malacañang.

Sa naganap na pulong kay outgoing South Korean Ambassador to the Philippines Han Dong-man kahapon, pinasalamatan ni Pangulong Duterte ang nasabing bansa dahil sa suporta nito na tinawag niyang “timely emergency and humanitarian assistance” tulad ng pagbibigay-donasyon ng face masks at iba pang personal protective equipment, mga gamot, test kits at bigas.

“The President also acknowledged ROK’s [Republic of Korea] assistance in the repatriation of 2,137 Filipinos from Korea,” ayon sa statement ng Malacañang.

Samantala, sinasabing ang South Korea ay may mababang record ng COVID-19 infections kumpara sa ibang mga bansa dahil sa mahigpit nilang pagpapatupad ng testing at contact tracing at ang mandatory quarantine para sa lahat ng inbound travelers.

Tulad din sa bansa, ang South Korea ay nagsasagawa ng restrictions sa mga social gatherings at curfews upang maiwasan ang pagkalat ng virus.

Labis din ang pasasalamat ni Pangulong Duterte sa South Korea para sa pagsuporta nito sa Pilipinas sa mga infrastructure drive, pagtulong sa ekonomiya, at pagpapatatag ng kooperasyon ng dalawang bansa sa pamamagitan ng depensa, seguridad at ang maritime domain awareness.

Sa naganap na farewell call, pinagkalooban ni Pangulong Duterte ng Order of Sikatuna si Ambassador Han para sa kanyang ‘natatanging diplomatikong paglilingkod’. Nagsimula ang tour of duty ni Han sa bansa noong January 2018.