P800 M utang ng PhilHealth sa Red Cross, sinisingil na ni Gordon

ni Ronalyn Seminiano Reonico | January 2, 2021

Umabot na sa P800 million ang utang ng Philippine Health Insurance Corp. (PhilHealth) sa Philippine Red Cross (PRC), ayon kay Senator Richard Gordon ngayong Sabado sa isang radio interview.

Aniya, “Ayaw ko sanang pinag-uusapan ‘yan pero nasa P800 million na naman. ‘Di puwede kasi kung kelan lang nila gustong magbayad dahil lalaki nang lalaki, baka mapilitan kaming itigil dahil bibili pa kami ng gamit tapos ime-maintain naman ang mga tao sa laboratoryo.”

Saad pa ni Gordon, “Siguro darating ‘yun sa Monday... nakikiusap [kami] sa kanila na mag-up-to-date sila dahil tutumba ang Red Cross dahil sa kanila.”

Matatandaang noong Oktubre, itinigil ng PRC ang pagsasagawa ng COVID-19 testing dahil sa utang ng PhilHealth na umabot sa mahigit P930 million. Itinuloy lamang ng PRC ang testing nang makabayad ang PhilHealth ng kalahati ng kanilang utang.

Pahayag ni Gordon, “Kailangang ‘wag tigilan ang pagte-testing dahil manghahawa ‘yan. Extraordinary diligence dapat ang gawin, bantayan nating maigi para ‘di na magkalat ‘yan.

“Ang nakakalungkot, dapat sila ang mag-a-advance, minsan lang nag-advance, ‘di na kami makatigil dahil marami ang dapat i-test at sa amin ipinadadala lahat. Kami ang nagte-test... OFW (overseas Filipino workers) okay lang naman sa akin basta ‘wag ilagay sa alanganin ang economic situation ng Red Cross.”

Una nang sinabi ng Malacañang na babayaran ng national government ang naturang utang ng PhilHealth.

Pahayag ni Presidential Spokesperson Harry Roque, “Magbabayad po ang national government. Napatunayan naman po ng national government na hindi po tumatalikod sa obligasyon ang national government.

“[K]inakailangan lang po i-verify. At kinakailangan po ‘yan sang-ayon pa rin doon sa three-tiered payment scheme ng PhilHealth.”

Samantala, diin ni Gordon, dapat magbayad ng utang ang PhilHealth.

Aniya, “Dapat lang dahil ang utang dapat binabayaran. ‘Pag um-order ka, magbayad ka, mahihirapan ang nagbibigay ng serbisyo.

“Unang-una, dapat ang gobyerno ang nanguna sa testing, eh, kami nasa 1.5 million na ang tine-test namin… natutuwa ako nakakapagserbisyo kami pero ‘di namin kaya na malaki ang utang.”

COVID-19 test sa PRC, mas pinababa ang presyo

ni Thea Janica Teh | November 29, 2020

Mas pinababa na ang presyo ng COVID-19 test sa Philippine Red Cross (PRC) upang mas maraming tao ang mahikayat na sumailalim dito.

Ayon kay PRC Chairman Senator Richard Gordon, nakipag-deal umano ito sa China upang makabili ng mga test kits sa pinakamababang presyo.

Tinatayang nasa ₱3,409 na lamang ito kung kakaltasan pa gamit ang PhilHealth at ₱3,800 naman para sa pribadong indibidwal.

Dagdag pa ni Gordon, susubukan pa umano nilang babaan ang presyo upang maging abot-kaya sa lahat.

Matatandaang noong Nobyembre 25 ay naglabas ang Department of Health ng price cap na ₱4,500 to ₱5,000 (Pribadong pasilidad) at ₱3,800 (Pampublikong pasilidad) para sa Real-time Reverse Transcription Polymerase Chain Reaction (RT-PCR) sa bansa.

Bagong COVID-19 testing laboratory, binuksan sa Isabela

ni Lolet Abania | November 22, 2020

Binuksan ng Philippine Red Cross (PRC) ang isang Coronavirus testing laboratory sa lalawigan ng Isabela para magserbisyo sa buong rehiyon ng Cagayan Valley.

Ayon kay PRC Chairman Sen. Richard Gordon, kayang magproseso sa laboratoryo ng 2,000 tests araw-araw. Umabot sa P30 million ang halaga ng pasilidad at natapos na magawa nang isang buwan lamang.

"Importante ‘yung binabayaran kami. 'Pag nababayaran kami, iniikot namin, nire-reinvest namin ang pera," sabi ni Gordon. Matatandaang noong November 5, nagbayad ang Philippine Health Insurance Corporation (PhilHealth) ng P700 million sa naturang non-government organization, subali’t may P377 million pang utang ang ahensiya na kailangang i-settle para sa COVID-19 testing services, ayon sa datos ng Red Cross.

Gayunman, noong May, pumirma sa isang kasunduan ang PhilHealth at PRC para sa itinakdang COVID-19 tests fee na P3,500 ang halaga bawat isa.

Samantala, namahagi ang PRC ng relief goods sa 250 residente sa Barangay Sipay, Ilagan City sa Isabela na sinalanta ng Bagyong Ulysses, ayon kay Gordon.