PRC licensure exams sa Mayo at Hunyo, aprub sa IATF

ni Ronalyn Seminiano Reonico | March 26, 2021

Pinayagan na ng Inter-Agency Task Force (IATF) ang Professional Regulation Commission (PRC) na makapagsagawa ng licensure examinations sa Mayo at Hunyo, ayon sa Malacañang ngayong Biyernes.

Ipinagpaliban ng PRC noong nakaraang taon ang licensure examinations na nakaiskedyul mula Oktubre hanggang Disyembre upang maiwasan ang mass gatherings dahil sa COVID-19.

Pinayagan naman ng IATF na ituloy ng PRC ang pagsasagawa ng licensure examinations noong Enero hanggang Marso.

Pahayag ni Presidential Spokesperon Harry Roque, "Inaprubahan din po ng IATF ang request ng Professional Regulation Commission na magsagawa ng licensure examinations for professionals sa Mayo at Hunyo ngayong taon habang istriktong ipinatutupad ang health protocols ng Department of Health.”

Samantala, ayon din kay Roque, ang mga mag-e-exam mula sa mga lugar na nasa ilalim ng general community quarantine (GCQ) ay hindi hinihikayat na bumiyahe sa modified GCQ areas para makakuha ng PCR test.

Ilan sa mga nakaiskedyul na PRC exams ngayong Mayo at Hunyo ay para sa civil engineers, dentists, nurses, physical therapists, criminologists, architects, at interior designers.

COVID-19 saliva test sa mga malls, pinag-aaralan

ni Ronalyn Seminiano Reonico | January 31, 2021

Isinusulong ng Philippine Red Cross na magsagawa ng COVID-19 saliva RT-PCR testing sa parking lots ng ilang shopping malls.

Pahayag ni Dr. Paulyn Ubial, head of PRC's Molecular Laboratory, “Sa mga malls po, iilang mga malalaking malls, nakipag-ugnayan na rin sa Philippine Red Cross, magiging available na rin po ang saliva RT-PCR.”

Ayon sa Red Cross, ang saliva test ay nagkakahalagang P2,000.

Saad pa ni Ubial, "Mas mura ang saliva test ng 60% kumpara sa swab test... Mas ligtas din ang saliva test para sa mga nangongolekta ng samples.”

Aniya pa, "Ang parang gagawin sa labas ng malls po, sa labas ng parking lot nila, parang drive-thru. Nasa loob lang kayo ng kotse, bibigyan kayo ng sample kit, doon po kayo dudura, then iaabot n’yo sa sample collector. Hindi na po kailangang lumabas ng kotse.”

Ipinaliwanag din ni Ubial na upang masigurong hindi mae-expose sa extreme temperature ang saliva sample, ilalagay ito sa “styro box o cold box.”

Aniya, "Pagkakuha ng sample, puwede nang ilagay sa styro box or 'yung cold box... Ilalagay lang doon sa loob for security and safety and para hindi ma-expose sa extreme temperature. Pero the saliva samples are viable at room temperature for seven days.”

Sa ngayon, available pa lang ang saliva testing sa PRC offices sa Mandaluyong City at Port Area, Manila.

Ayon kay PRC Chairman Senator Richard Gordon, target ng PRC na makapagsagawa ng COVID-19 saliva test sa lahat ng laboratory nationwide ngayong Pebrero.

Samantala, paalala ni Ubial sa mga nais magpa-saliva test, huwag kumain, uminom o magsepilyo sa loob ng 30 minuto bago sumailalim sa scheduled test.

PRC licensure exams, puwede na uli

ni Lolet Abania | January 22, 2021

Pinayagan na ng Inter-Agency Task Force on Emerging Infectious Diseases (IATF) ang Professional Regulation Commission (PRC) na isagawa ang licensure examinations sa unang tatlong buwan ng taon, ayon sa pahayag ng Malacañang ngayong Biyernes.

Matatandaang ipinagpaliban noong nakaraang taon ng PRC ang licensure examinations na nakaiskedyul mula Oktubre hanggang Disyembre upang maiwasan ang mass gatherings dahil sa posibleng pagkalat ng coronavirus infections.

"The request of the Professional Regulation Commission to conduct and administer the licensure examinations for professionals scheduled for January to March 2021 was approved," ani Presidential Spokesperson Harry Roque kasabay ng lingguhang pulong ng IATF.

Ilan sa nakaiskedyul na kukuha ng PRC exams ngayong unang quarter ng taon ay ang mga medical technologists, architects, veterinarians, physical therapists, geologists, psychologists, mechanical engineers, graduates of medicine, at teachers. Makikita rin sa kanilang website ang buong listahan ng PRC exams.

Una nang nabanggit ng commission na pinag-aaralan nilang palitan ang pen-and-paper test at gawing online na lamang para maiwasan ang pagkalat ng COVID-19.

"We might be able to start with the smaller boards which may be more manageable," ani PRC Chairman Teofilo Pilando Jr. sa naganap na Senate hearing noong Oktubre.