4,500 pulis, bantay sa Eastern Visayas para sa Undas

ni Eli San Miguel - Trainee @News | November 1, 2023

Nag-deploy ng mahigit 4,500 pulis ang Police Regional Office-8 upang mapanatili ang kapayapaan at kaayusan sa mga sementeryo at iba pang lugar ng pagtitipon sa Eastern Visayas para sa Undas o All Saints' Day.

Nagsagawa si Police Brig. Gen. Reynaldo Pawid, PRO-8 director, ng inspeksyon sa mga lugar sa rehiyon upang tingnan ang kalagayan ng mga pulis na naka-assign sa mga sementeryo at mga checkpoint.

Sinabi ni Pawid na bagamat karaniwan nang tahimik ang mga barangay election, hindi pa rin nai-pullout ang mga pulis na nakaatas sa “areas of concern” sa halalan para magbantay sa mga sementeryo.

Ipinag-utos niya sa mga pulis na tiyakin na walang kontrabando ang maipapasok sa mga sementeryo.

"Intoxicating liquors are not allowed in cemeteries even if the liquor ban has been lifted after the barangay and Sangguniang Kabataan elections 2023," sabi ni Pawid.

Pinaalala niya sa mga tao na ipinagbabawal ang pagdadala ng mapanganib na mga kagamitan pati na rin ang mga pang-sugal, dahil sapat na oras na ang ibinigay sa kanila para linisin ang mga puntod ng kanilang mga mahal sa buhay bago ang Undas.

Karahasan kaugnay sa BSKE, pumalo sa 237 — PNP

Fni Angela Fernando - Trainee @News | October 31, 2023

Ayon sa Philippine National Police (PNP), umabot sa 237 ang kabuuang bilang ng karahasang may kinalaman sa Barangay and Sangguniang Kabataan Elections (BSKE) ngayon.

Sabi ng PNP spokesperson Police Colonel na si Jean Fajardo, 35 sa mga ito ay konektado sa nangyaring eleksyon at 99 naman sa mga ito ay hindi, meron namang 103 na insidente sa kasalukuyan ang iniimbestigahan pa kung may kaugnayan sa BSKE.

Karamihan sa mga kumpirmadong insidente ng karahasan ay galing sa Bangsamoro at may kinalaman sa pamamaril.

Dagdag ni Fajardo, may 40 insidente ng karahasan ang iniulat nu'ng araw ng halalan na nagresulta sa anim na pagkasawi at 25 na sugatan.

Magpapatuloy ang PNP sa pagbibigay ng seguridad hanggang sa maiproklama ang mga nanalong kandidato kahit tapos na ang araw ng eleksyon.

Merong 12.5% na pagbaba sa bilang ng mga nai-validate na insidente ng halalan mula 40 pababa sa 35 na kaso nu'ng 2018 at tumaas naman ng 29.63% mula sa 27 na kasong naitala nu'ng 2022.

Seguridad para sa BSKE, kasado na

ni Eli San Miguel - Trainee @News | October 29, 2023

Naihanda na ang lahat ng mga hakbang sa seguridad upang tiyakin ang ligtas, malaya, at maayos na Barangay and Sangguniang Kabataan Elections (BSKE) sa Lunes, Oktubre 30.

Ayon sa Armed Forces of the Philippines (AFP) at Philippine Coast Guard (PCG), handa silang tumulong sa Philippine National Police (PNP) sa pag-aasikaso ng mga presinto ng botohan, mga tauhan ng halalan, at mga botante.

Kabuuang 117,000 military personnel at 20,000 coast guardians ang itinataguyod sa buong bansa, lalo na sa 361 na mga lugar ng halalan na tinukoy ng Joint Peace and Security Coordinating Council (JPSCC).

Nauna nang inihayag ng PNP na may kabuuang 187,600 pulis ang inatasan para sa mga responsibilidad sa halalan.

Samantala, sinabi ni PCG Commandant Admiral Ronnie Gil Gavan na bahagi ng kanilang pagkakatalaga ang mga intelligence operative, K9 units, mga tauhan ng PCG at PCG Auxiliary na may tungkulin na magpatupad ng mahigpit na seguridad sa mga pantalan at mag-asikaso ng mga helpdesk na itinayo ng Department of Transportation (DOTr).

Itinaas ng PCG ang kanilang status sa "full alert" mula Oktubre 25 hanggang Nobyembre 5 upang tiyakin ang maayos na operasyon ng mga pasilidad ng transportasyon sa dagat at ang maginhawang paglalakbay ng mga biyahero.

Mula alas-12 ng hatinggabi hanggang alas-6 ng umaga ng Linggo, mino-monitor ng PCG ang 27,530 na mga pasahero na palabas at 28,532 na mga pasahero na pabalik sa lahat ng mga pantalan sa buong bansa.