Suspek sa MSU bombing, dating estudyante

Fni Angela Fernando - Trainee @News | December 7, 2023

Ipinaalam ng Mindanao State University sa Marawi City na dating estudyante ng eskwelahan ang isa sa 2 sinasabing persons of interest sa nangyaring pambobomba kamakailan.

Aktibong nakipag-ugnayan ang unibersidad sa mga pulisya kaya agad na nakumpirma ang pagkakakilanlan ng dalawang suspek.

Ayon sa Philippine National Police, dati nang nasasangkot sa mga insidente ng pambobomba ang dalawang suspek at may isa pang nagsilbing lookout ang kasalukuyang pinaghahanap.

Sa kabilang banda, muling nagsagawa ng misa sa loob ng unibersidad ilang araw matapos ang malagim na pagsabog at nagpahayag ang paaralan na muli na silang magbabalik sa kanilang face-to-face classes at academic activities sa darating na Lunes.

Mga bomb threat, iniimbestigahan na ng PNP

ni Angela Fernando - Trainee @News | December 7, 2023

Nagpaalala ang Philippine National Police sa publiko nitong Huwebes na maging maingat sa mga kahina-hinalang email matapos nilang makita ang ilang banta ng pambobomba kasunod ng nangyaring pagsabog sa isang misa sa Mindanao State University sa Marawi City nu'ng Linggo.

Ayon kay PNP spokesman Col. Jean Fajardo, sunud-sunod ang kanilang naitalang banta ng bomba kamakailan na agad namang nirespondehan ng kapulisan.

Aniya, base sa imbestigasyong ginawa ng Anti-Cybercrime Group, karamihan sa umiikot na nasabing email ay galing sa labas ng 'Pinas.

Saad ni Fajardo, may isang pekeng email na umano'y galing sa nagngangalang Takehiro Karasawa na sinasabing isang Japanese lawyer ang umiikot hindi lamang sa bansa kundi sa mga bansa tulad ng South Korea, Taiwan, at China, noon pang buwan ng Setyembre at Oktubre.

"Nakikipag-ugnayan na ang ating PNP Anti-Cybercrime group sa ating mga foreign counterparts, para ma-trace ang origin nitong email na ‘to," dagdag niya.

3 Chinese na dinukot, na-rescue

ni Angela Fernando - Trainee @News | November 11, 2023

Nailigtas ng Philippine National Police (PNP) ang 3 Chinese nationals na dinukot at dinala sa bahay sa isang subdivision sa Brgy. Pandayan, Meycauyan, Bulacan nu'ng Biyernes.

Ayon sa Meycauayan Police Station, dinala ng punong sekyu ng subdivision sa istasyon ang isang lalaking Chinese na sugatan.

Saad ni Meycauayan police chief Lt. Col. Jordan Santiago, tumalon ito mula 3rd floor ng bahay at nakitang nakaposas ang biktima.

Nagsagawa ng imbestigasyon ang PNP-AKG sa sinasabing bahay at doon nakita ang dalawa pang biktima na nakapiring at nakagapos.

Napag-alamang ang mga biktima ay dating trabahador sa isang POGO.

Patuloy naman sa kanilang imbestigasyon ang mga awtoridad.