34K pulis, ide-deploy sa Holy Week

ni Eli San Miguel - Trainee @News | March 17, 2024

Magde-deploy ang Philippine National Police (PNP) ng 34,000 na police officers sa mga mataong lugar para tiyakin ang seguridad ng publiko sa pagdaraos ng Holy Week.

Sinabi ni PNP spokesperson Police Colonel Jean Fajardo na pananatilihin ng pulisya ang kanilang presensya sa mga simbahan, mga tourist spots, at mga pangunahing kalsada, kabilang ang mga terminal ng bus, paliparan, at pantalan. Maglalagay din ng mga help desks ng pulisya sa mga lugar na ito.

Magsisimula ang Holy Week o Semana Santa ngayong taon sa susunod na linggo, Marso 24, sa Palm Sunday. Magtatagal ito hanggang Marso 30, Black Saturday, at susundan ng Easter Sunday, kung kailan ipinagdiriwang ng mga Katolikong mananampalataya ang muling pagkabuhay ni Hesus.

2 pulis sa QC, sinibak dahil sa pagkalat ng video ni Ronaldo Valdez — PNP

ni Eli San Miguel - Trainee @News | December 20, 2023

Sinibak sa puwesto ang dalawang pulis dahil sa naiulat na pagkakasangkot sa pagkalat ng video na nagpapakita ng bangkay ng aktor na si Ronaldo Valdez, ayon sa Philippine National Police (PNP) ngayong Miyerkules.

Sinabi ni PNP spokesperson Colonel Jean Fajardo na ang dalawang pulis na tinanggal sa kanilang mga puwesto ang unang rumesponde.

“Kausap ko kanina si district director at ni-relieve na po niya 'yung first responder at kaniyang station commander para tignan ang liability," pahayag ni Fajardo sa isang press briefing sa Camp Crame.

Sinabi ni Fajardo na maaaring humarap sa administratibo at kriminal na kaso ang dalawa na kasalukuyang nasa QCPD holding unit habang iniimbestigahan.

"This is a regrettable incident na hindi dapat kumalat sa social media," pagbibigay-diin ni Fajardo.

"Kung ito ay kuha ng ating first police responders for documentation purposes, wala po sanang naging problema," dagdag niya.

Pumanaw si Valdez, isa sa mga pinakatanyag at sikat na aktor sa TV at pelikula sa bansa, noong Linggo sa edad na 76.

Disgrasya dahil sa mga paputok, bumaba

ni Eli San Miguel - Trainee @News | December 13, 2023

Bumaba ang bilang ng mga taong nadisgrasya dahil sa paputok sa loob ng nakaraang sampung taon, ayon sa ulat ng Philippine National Police – Firearms and Explosive Office (PNP-FEO) ngayong Miyerkules.

Batay sa datos ng FEO, naitala ng pulisya ang 306 na kaso ng disgrasya, kabilang ang isa na tinamaan ng ligaw na bala, sa pagdiriwang ng Bagong Taon para sa taong ito.

Bagaman mas mataas ang datos na ito kumpara sa mga nairehistro noong mataas ang pandemya noong 2021 at 2022, ipinakita ng datos ng FEO na mas mababa ito kumpara sa 904 na kaso noong 2013.

Samantalang naitala ang pinakakaunti na mga kaso noong 2021, na may 115 nadisgrasya, at noong 2022, na may kabuuang 188 disgrasya kaugnay ng paputok.

Sinabi ni FEO Explosive Management Division chief Colonel Al Abanales na kanilang sinimulan nang inspeksyunin ang mga tindahan ng paputok upang maiwasan ang pagtaas ng kaso at ang bentahan ng mga ilegal na paputok.