Ipinapadalang sexy pictures, ginagamit para pagkakitaan... Dating apps online, delikado — PNP

ni Jasmin Joy Evangelista | September 3, 2021

Nagbabala sa publiko si Philippine National Police (PNP) Chief Gen. Guillermo Eleazar na maging maingat sa paggamit ng mga dating apps dahil maaaring nagagamit ang mga ito para sa krimen.

Ito ay makaraang i-raid noong Martes ng Optical Media Board (OMB) ang isang opisina sa Quezon City na napag-alamang sangkot sa cybersex operation.

"Huwag mag-engage sa mga ganyan... kung mayroon kayong ka-chat o kausap doon na mako-compromise o magkakaroon kayo ng intimacy to the point na [iyong] private parts ay ipakita ninyo," ani Eleazar, "tandaan ninyo na 'yan ay nagiging daan para kuhanan nila, basehan na eventually, iba-blackmail na kayo at ang punta noon, extortion na," dagdag niya.

Modus umano sa nahuling cybersex den ang paggamit ng messaging at dating apps para mag-alok ng mga malalaswang litrato o massage services at iba pang serbisyo.

Kapag nakumbinse ang kostumer, gagamitin na ang kanilang credit card details para mangikil at pagnakawan sila.

Inaresto na ng OMB ang 16 na manggagawa na naaktuhang nag-o-operate ng negosyo at susuriin ang mga gamit na nakuha rito upang makakalap ng iba pang impormasyon tungkol sa ilegal na gawain ng naturang opisina.

Libu-libong pulis, ikinalat na para sa ECQ sa NCR

ni Ronalyn Seminiano Reonico | August 6, 2021

Nag-deploy na ng libu-libong kapulisan ang Philippine National Police (PNP) para masiguro na nasusunod ang ipinatutupad na health and safety protocols sa ilalim ng enhanced community quarantine (ECQ) sa Metro Manila at bantay-sarado na ang 89 Quarantine Control Points (QCPs) sa rehiyon, sa tulong ng Inter-Agency Task Force for the Management of Emerging Infectious Diseases (IATF-MEID) ngayong Agosto 6.

Hanggang sa Agosto 20 isasailalim ang NCR sa ECQ.

Nasa 4,346 iba pang PNP personnel naman ang inatasan para sa Mobile Control Points sa iba’t ibang lugar sa Metro Manila para sa uniformed curfew hours.

Nanawagan naman si PNP Chief Guillermo Eleazar sa publiko lalo na sa mga residente ng NCR Plus na makiisa sa ipinatutupad na paghihigpit sa mga borders dahil sa banta ng COVID-19 Delta variant.

Aniya pa, “Nauunawaan namin ang sinasabing quarantine burnout na nararamdaman ng ating mga kababayan subalit maling-mali ang pananaw na walang epekto ang mga paghihigpit na ito dahil ang mga public experts na mismo ang nagrekomenda nito at kami mismo sa PNP ay napatunayan namin kung gaano kaepektibo ito upang maiwasan ang pagkalat ng virus.

“This security personnel are under strict instructions to ensure that public health protocols are observed and mass gatherings are disallowed.”

Nasa 7,337 pulis naman ang ipinadala sa 2,745 vaccination centers habang 4,877 naman ang nasa 2,535 quarantine areas.

Sa labas naman ng NCR Plus bubble, nagpadala na umano ng 9,180 police personnel ang PNP para sa 1,103 Quarantine Control Points.

Saad pa ni Eleazar, “Despite the uphill battle against COVID-19 and surmounting challenges we are facing, the PNP remains resilient in assisting the government to quell the community transmission of the Delta variant. At bilang dating commander ng Joint Task Force COVID shield, hindi na bago sa inyong Pambansang Pulisya ang anumang uri ng quarantine restrictions kaya makakaasa ang lahat ng aming kahandaan sa anumang plano at ipag-uutos ng ating IATF at mga lokal na pamahalaan.

“Ngunit tayong lahat ay dapat kumilos para mapigilan ang pagkalat ng mas nakahahawang Delta variant. Bukod sa bakuna at pagsunod sa minimum public health safety standards, disiplina po ang kailangan ng bawat isa sa atin.”

82 pulis na positibo sa COVID, pinagbantay sa SONA.. Hepe ng QC Station 3, sibak!

ni Ronalyn Seminiano Reonico | July 29, 2021

Sinibak sa puwesto ang hepe ng Quezon City Police Station 3 kaugnay ng pag-deploy sa mga pulis sa huling State of the Nation Address (SONA) ni Pangulong Rodrigo Duterte kahit hindi pa nila nakukuha ang kanilang COVID-19 test result.

Ayon kay Philippine National Police Chief Police General Guillermo Eleazar, "In view of the apparent breach of protocol when most of these PNP personnel were deployed for SONA duties even if they were still waiting for their RT-PCR results, I have already ordered the administrative relief of the Station Commander, Police Station 3 of the QCPD, for command responsibility."

Aniya, matapos makuha ang resulta kung saan lumalabas na 82 pulis ang nagpositibo sa COVID-19, kaagad na isinailalim ang iba pang QCPD personnel sa RT-PCR at nagsagawa na rin ng contact-tracing simula pa noong Miyerkules. Sa ngayon ay hinihintay pa ang RT-PCR results ng 167 pang PNP personnel.

Ani Eleazar, "Hindi pa natin alam kung Delta variant ang tumama sa aming mga kasamahan sa QCPD kaya nakikiusap tayo sa ating mga kababayan na iwasan ang mga espekulasyon tungkol dito. "But your PNP has long prepared for all worse-case scenarios like this, which include aggressive vaccination and preparing for more isolation and medical facilities, so we assure the relatives of those who were infected and also our kababayan of full attention and care for our personnel."

Samantala, nanawagan din si Eleazar na itigil ang pambabatikos at ang mga "unnecessary and insensitive comments" sa mga kapulisan na tinamaan ng COVID-19.

Aniya, "Huwag sana nating kakalimutan na kaya naman sila na-deploy ay para tiyakin na mapayapa at maayos na maisagawa ang karapatan ng ilan nating kababayan na magprotesta at maghayag ng saloobin habang pinapangalagaan din ang karapatan ng mga motorista at mga kababayan nating commuters na hindi maabala ng mga kilos-protesta sa mga lansangan na regular na dinadaanan nila.

"Hindi makatwiran at hindi makatao na hamakin pa ang ating kapulisan sa kabila ng kanilang sinapit dahil halos lahat ng mga pulis na tinamaan ng COVID ay dahil naman sa pagtupad ng kanilang sinumpaang tungkulin.

Sila ay may mga pamilyang nag-aalala rin at higit sa lahat, sila ay kapwa natin Pilipino, kaya nakikiusap tayo na maging sensitibo tayo sa ating mga binibitawang salita."