Pila sa checkpoint, umaabot ng 2 oras... Random check na lang — PNP Chief Eleazar

ni Lolet Abania | August 8, 2021

Dalawang oras umano ang inabot ng ilang motorista bago sila pinadaan sa mga checkpoint habang nasa ilalim ng enhanced community quarantine ang National Capital Region (NCR).

Ayon sa isang motorista, pumila siya sa checkpoint sa boundary ng Caloocan at San Jose del Monte, Bulacan, kung saan lumagpas pa umano ng dalawang oras bago siya tuluyang pinadaan ng mga pulis nitong Sabado nang gabi.

Salaysay naman ng isa pa, “Hassle kasi may pasyente nga kaming dinala sa ospital. Nauna ‘yung ambulansiya, naipit kami... Galing po ako ng Cavite,” kung saan aniya, wala nang bakante sa mga ospital sa Metro Manila, kaya napilitan silang dalhin ang pasyente sa nasabing lugar.

Sa España Blvd. sa Maynila, binubusisi sa checkpoint ang mga dokumento ng bawat daraan para tiyakin umano ng mga awtoridad kung sila ay authorized person outside residence (APOR).

“Kapag po sila working APOR, hinahanapan ng Certificate of Employment. ‘Yung kanilang mga ID, kailangang ipakita para mapatunayan na working APOR. Kapag consumer APOR, kailangan, may quarantine pass,” paliwanag ni Police Lt. Ronald Calixto, team leader sa checkpoint. Iniutos naman ni Philippine National Police chief Gen. Guillermo Eleazar na sakaling ang pila sa mga checkpoint ay humaba, maaaring magpatupad na lang ng random check.

Gayundin, iisa-isahin na lamang ng mga pulis ang mga sasakyan kapag maigsi na umano ang pila nito sa checkpoint.

Ayon kay Eleazar, karaniwan na aniyang paglabag sa ECQ ang hindi at maling pagsusuot ng face mask, face shield at physical distancing. Kasama na rin dito ang hindi pagsunod sa curfew hours. “Itong tatlo, ito ang minimum public health standards natin ang nakikita natin (violation) pero most of them wina-warning-an lang naman,” sabi ni Eleazar. Babala naman ng PNP chief na kanilang papanagutin ang sinumang non-APOR driver na mang-aabuso. Aalamin nila sa mga employer nito kung tunay ang ipinakita nilang mga dokumento.

Nagbigay na rin ng direktiba si Eleazar sa Criminal Investigation and Detection Group (DILG) habang patuloy ang pakikipag-ugnayan ng ahensiya sa mga lokal na pamahalaan dahil sa posibleng pagdagsa naman ng mga nagpapabakuna kontra-COVID-19 sa mga vaccination sites.

Mga opisyal ng PNP, pasok din sa psychological exam

ni Lolet Abania | June 27, 2021

Tinatapos na lamang ng Philippine National Police (PNP) ang mga dapat na nakapaloob hinggil sa kanilang rekomendasyon na pagsasagawa ng Psychiatric-Psychological Exam (PPE) sa lahat ng PNP personnel sa gitna ng mga kaso ng grave misconduct sa ilang pulis.

Sa isang briefing kamakalawa, binanggit ng PNP ang tungkol sa tinatawag na police abuse – ito ang kaso ng isang police sergeant na walang habas na namaril sa loob ng Manila Police District (MPD) headquarters – na lalong nagpaigting na magkaroon ng periodic psychiatric exam hindi lamang sa mga ordinaryong pulis kundi maging sa lahat ng may mga ranggo.

Sinabi naman ni PNP Chief Police General Guillermo Eleazar na makakasama rin dito ang mga rekomendasyon ng Health Services sa pagbuo ng guidelines na isasagawa para sa regular na assessment ng emotional at mental health state ng mga pulis.

“This recent incident at MPD, along with the previous ones, highlights the need for us to closely look into the overall state of our men. Hindi nagtatapos sa kung paano nila ginagawa ang kanilang trabaho, kasama dito ang pagtingin sa kanilang physical, emotional at lalo na ang kanilang mental state,” ani Eleazar.

Matatandaang sinabi ni Eleazar na kinokonsidera niya na magkaroon ng PPE na gagawin tuwing tatlong taon bilang bahagi ng pagsisikap nilang mapabuti ang kalagayan at estado ng PNP personnel, lalo na ang mga nasa ground operations.

Samantala, tiniyak ni Eleazar sa publiko na nagsasagawa na ng malalimang imbestigasyon sa naganap na pamamaril ng isang pulis sa MPD headquarters nitong Biyernes.

“The investigation I ordered on the unfortunate incident goes beyond the shooting as this includes other aspects such as possible mental health issues of all our personnel,” sabi ni Eleazar.

Body camera sa mga pulis, gagamitin na

ni Mary Gutierrez Almirañez | May 10, 2021

Nakahanda na ang Philippine National Police (PNP) sa paggamit ng body camera sa lahat ng police operations, kung saan hinihintay na lamang ang ilang ipatutupad na protocols upang maiwasan ang legal technicalities, ayon kay bagong PNP Chief General Guillermo Eleazar ngayong Lunes, May 10.

Aniya, "With the guidance of the Supreme Court, with their protocol na ilalabas, maaaring at least du’n sa mga implementation at service of search warrant doon sa mga lugar na meron nang body cameras ay puwede na itong ilunsad."

Dagdag pa niya, "Na-distribute na itong almost 3,000 [body cameras] du’n sa 117 lang na city police stations, itong more than 1,000 municipal police stations, wala pa rin po pero inaasahan natin na darating 'yan."

Matatandaang ipatutupad sa PNP ang paggamit ng body camera upang may magsilbing recording o footage sa bawat operasyon at upang malaman kung umano’y nagkakaroon sa kanila ng pang-aabuso sa kapangyarihan.

Kampante naman si Eleazar na magiging matagumpay ang pagpapatupad ng body camera sa ilalim ng kanyang termino at labis niya iyong ipinagpapasalamat.