Sa mga checkpoint.. Pagkapkap at pagbukas ng box ng motor, bawal

ni Madel Moratillo @News | August 29, 2023

Kasabay ng pagsisimula ng checkpoint para sa Barangay at Sangguniang Kabataan Elections (BSKE), pinaalalahanan ang mga pulis na irespeto ang mga motorista kung ayaw nilang magpakapkap o magpabukas ng box ng motor.

Paalala ni PNP chief information officer Police Brigadier General Red Maranan, ang pagkapkap ay hindi kasama sa plain view doctrine na dapat pairalin sa checkpoint.

Ang pagkapkap, pagbukas ng glove compartment o box ng motor ay puwede lang kung may consent ng may-ari. Pero kung tumakbo sa checkpoint, puwede itong habulin ng mobile car ng PNP. Puwede lang aniya ang warning shot kung malalagay sa panganib ang publiko.

2,313 violators, arestado sa election gun ban — PNP

ni Lolet Abania | April 3, 2022

Umabot na sa 2,313 indibidwal ang naaresto ng Philippine National Police (PNP) dahil sa paglabag sa nationwide election gun ban.

Sa kanilang report ngayong Linggo, ayon sa PNP na 2,249 ng mga violators ay mga sibilyan, 40 security guards, 14 police officers, at 10 na mga military personnel.

Nakumpiska sa mga lumabag mula sa ikinasang 2,209 police operations ay 1,785 firearms, 10,157 piraso ng ammunition, at 826 deadly weapons o nakamamatay na armas.

Ayon sa PNP, karamihan sa mga violators na nai-report ay nasa National Capital Region (NCR) na may 854, kasunod ang Calabarzon na 250, at Central Visayas na 241.

Sa ilalim ng Resolution No. 10728, ipinagbabawal ng Commission on Elections (Comelec), “the bearing, carrying, or transporting of firearms or deadly weapons outside of the residence and in all public places from January 9 until June 8.”

Exempted naman dito ang mga law enforcers, subalit kailangan nila ng awtorisasyon mula sa Comelec at dapat na nakasuot ng prescribed uniform ng kanilang ahensiya habang sila ay nasa official duty sa panahon ng election period.

Nitong Miyerkules, ang Comelec ay nag-recalibrate ng mga guidelines para sa gun ban exemptions bago pa ang eleksyon sa Mayo 9.

Sa ginanap na Comelec’s en banc meeting, ayon kay Comelec Chairman Saidamen Pangarungan, ang mga amendments para sa Resolution No. 10728 ay layon na mag-produce ng aniya, “a more efficient system of issuing certificates of authority, include the decentralization of the granting of exemption to the Regional Directors and Election

Officers and the grant of automatic exemption to justices, judges, and prosecutors, including the Ombudsman.”

9 na nagpanggap na opisyal ng PNP at Phil. Army, arestado sa checkpoint

ni Lolet Abania | June 6, 2021

Timbog ang siyam na lalaki na nagpakilala umanong mga opisyal ng Philippine National Police (PNP) at Philippine Army sa isang checkpoint sa bayan ng San Jorge, Samar.

Ayon kay San Jorge Municipal Police Station chief Police Captain Cañete, pinara sa checkpoint ng kanyang mga tauhan ang sasakyan ng grupo at napansin nilang may kakaibang galaw ang mga suspek. Agad na hinanapan ng mga awtoridad ng travel authority ang grupo habang isang papel umano mula sa Palasyo ang ipinakita ng mga ito, kung saan nakasaad dito na pinapayagan silang bumiyahe patungo sa Maynila mula Mindanao at gayundin pabalik.

Nang hingan ng mga pulis ng identification card ang grupo, nagpakita naman umano ang mga ito ng kanilang IDs na nakalagay pa rito na sila ay mga opisyal ng PNP at Philippine Army.

Ayon kay Capt. Cañete, agad niyang ipina-verify sa Maynila ang mga IDs at travel authority ng mga suspek, kung saan lumabas na peke ang mga ito habang walang pangalan ng mga opisyal na tugma sa mga IDs.

Nakumpiska sa mga suspek ang mga pekeng IDs at pekeng travel authority na nanggaling umano sa Malacañang, ilang hindi lisensiyadong baril at mga communication equipment, mga bala ng baril, bullet proof vest at Philippine Army at PCG uniform. Patuloy ang imbestigasyon ng mga pulis sa nangyaring insidente.