Masbate, niyanig ng kambal na lindol

ni Lolet Abania | May 18, 2022

Niyanig ng dalawang lindol ang probinsiya ng Masbate ngayong Miyerkules ng umaga, ayon sa Philippine Institute of Volcanology and Seismology (Phivolcs).

Sa ulat ng Phivolcs, ang unang lindol ay nagtala ng magnitude 3.8 na tumama 6 kilometro hilagang-silangan ng Masbate City ng alas-9:29 ng umaga at may lalim na 10 kilometro.

Naramdaman ang pagyanig na naitalang Intensity IV sa Masbate City at kalapit na bayan ng Aroroy, at Intensity II sa San Jacinto, Masbate. Inilarawan ng mga state seismologists ang Intensity IV bilang “moderately strong”, kung saan ang vibration ay naramdaman gaya ng pagdaan ng malaking truck habang ang nakasabit na mga bagay anila, “swing considerably.”

Bandang 9 na minuto matapos ang unang lindol, isang malakas na pagyanig na may magnitude 4.8 ang tumama 7 kilometro hilagang-silangan ng bayan ng Mobo, at may lalim na 5 kilometro, ayon sa Phivolcs.

Sinabi ng Phivolcs, naitala ang tinatawag na “strong” Intensity V sa Masbate City. Sa nasabing intensity, ang malakas na pagyanig ay posibleng naramdaman sa mga gusali, matinding gumalaw ang mga nakasabit na bagay at ramdam ang pag-uga sa mga sasakyan.

Sa isang video, ang mga empleyado ng Department of Education (DepEd) sa Masbate ay makikitang nagsialisan sa kanilang mga opisina matapos tumama ang ikalawang lindol.

Ayon pa sa Phivolcs, wala namang inaasahang aftershocks, habang wala ring naitalang napinsala matapos ang dalawang lindol.

Cagayan, niyanig ng 5.1-magnitude na lindol

ni Lolet Abania | May 17, 2022

Nakapagtala ng 5.1-magnitude na lindol ang Philippine Institute of Volcanology and Seismology (PHIVOLCS) na malapit sa Dalupiri Island sa Calayan, Cagayan ngayong Martes ng hapon.

Alas-4:42 ng hapon nai-record ang lindol na tectonic ang pinagmulan at may lalim na 16 kilometro. Ang epicenter ay natagpuan na nasa 31 kilometro southeast ng Dalupiri Island.

Naramdaman naman ang pagyanig at naitala ang Intensity IV sa Calayan, Cagayan; Intensity III sa Pasuquin, Bacarra at Laoag City, Ilocos Norte, at Sanchez Mira, Cagayan; Intensity III sa Pasuquin, Ilocos Norte; Intensity II sa Laoag City, Ilocos Norte at Claveria, Cagayan; at Intensity I sa Gonzaga, Cagayan.

Ayon sa PHIVOLCS, wala namang naiulat na pinsala matapos ang lindol subalit asahan na magkaroon ng mga aftershock

Davao Oriental, nagtala ng 5.8-magnitude na lindol

ni Lolet Abania | May 5, 2022

Niyanig ng 5.8-magnitude na lindol ang baybayin ng Davao Oriental ngayong Huwebes nang hapon, ayon sa Philippine Institute of Volcanology and Seismology (Phivolcs).

Batay sa Phivolcs, alas-4:21 ng hapon naitala ang lindol na may lalim na 2 kilometro, at tinatayang nasa 147 kilometro timog-silangan sa bayan ng Tarragona.

Nai-record ang Intensity 3 sa Malungon at Alabel sa Sarangani; Davao City, at Tampakan, South Cotabato.

Naitala ang Intensity 2 sa Tupi, South Cotabato, General Santos City at Kiamba sa Sarangani, habang Intensity 1 ay naiulat sa Santo Niño, South Cotabato at Palimbang, Sultan Kudarat.

Naramdaman naman ang instrumental intensities sa mga sumusunod na lugar:

• Intensity III - Malungon at Alabel, Sarangani

• Intensity II - Davao City; Tupi, at Koronadal City, South Cotabato; Glan, at Kiamba, Sarangani; Nabunturan, Davao De Oro

• Intensity I - T'boli, South Cotabato; Maasim, Sarangani; Kidapawan City, Cotabato; Kidapawan City

Ayon sa Phivolcs, wala namang napinsala matapos ang lindol. Subalit, nagbabala ng ahensiya sa posibleng mga aftershocks.

Una nang naitala ang magnitude 5.7 na lindol ngayon ding Huwebes nang madaling-araw sa nasabi ring lugar.