29 volcanic quake sa nakalipas na 24-oras, naitala sa Bulusan Volcano — PHIVOLCS

ni Lolet Abania | June 6, 2022

Umabot sa kabuuang 29 volcanic earthquakes ang na-monitor sa Bulusan Volcano sa Sorsogon sa nakalipas na 24 oras, ayon sa Philippine Institute of Volcanology and Seismology (PHIVOLCS) ngayong Lunes.

Sa kanilang 5AM volcano bulletin, sinabi pa ng PHIVOLCS na ang phreatic eruption ay nai-record ng alas-10:37 ng umaga nitong Linggo na tumagal ng 17 minuto.

Ayon sa PHIVOLCS, ang plume mula sa crater ng Bulusan Volcano ay umabot ng hanggang 150 metrong taas saka pumailanglang patungong hilagang kanluran. Ani pa ng PHIVOLCS,

“The volcano edifice was also inflated.” Nananatili ring nakataas sa Alert Level 1 ang buong Bulusan Volcano. Ipinagbawal naman ng PHIVOLCS sa publiko, ang pumasok sa 4-kilometer-radius sa Permanent Danger Zone (PDZ) gayundin, hindi maaaring pumasok ng walang pag-iingat sa Extended Danger Zone (EDZ).

Ayon kay PHIVOLCS Director at Science Undersecretary Renato Solidum Jr., na ang danger zone sa Bulusan ay kanilang in-extend ng hanggang dalawa pang kilometro.

“Nagdagdag tayo ng dalawang kilometro sa southeast sector EDZ kasi doon sa side na ‘yun may mga bitak din ng mga nakaraang eruption na nagkaroon din ng pagsabog doon,” ani Solidum sa isang interview ngayong Lunes. Sinabi pa ni Solidum na may nai-record namang “steaming” mula sa northwest vent ng bulkan kung saan maaaring magkaroon din ng pagsabog.

Ang mga munisipalidad ng Juban, Casiguran, at Irosin ay apektado ng ashfall dahil sa Bulusan Volcano, ayon pa kay Solidum.

Nagbabala naman ang opisyal sa mga residenteng naninirahan malapit sa mga ilog sa posibleng pagkakaroon ng lahar, sakaling bumuhos ang malakas na ulan.

“’Yung mga bahay po na nasa gilid ng mga ilog, kapag maulan po ay puwedeng maanod ang mga abo na nadeposito sa gilid ng bulkan at magkaroon ng lahar kaya kailangan pag-ingatan din lalong-lalo na kung malakas ang ulan,” paliwanag ni Solidum.

Surigao del Sur, niyanig ng 5.6 magnitude na lindol

ni Lolet Abania | June 3, 2022

Niyanig ng 5.6-magnitude na lindol ang Surigao del Sur ngayong Biyernes ng madaling-araw, ayon sa Philippine Institute of Volcanology and Seismology (PHIVOLCS).

Batay sa bulletin ng PHIVOLCS, alas-2:54 ng madaling-araw naitala ang lindol na isang tectonic, habang may lalim itong 9 kilometro. Ang epicenter ng lindol ay nasa layong 49 kilometro southeast ng Cagwait, Surigao del Sur.

Nai-record ang Intensity IV sa mga munisipalidad ng Cagwait, Bayabas, at San Agustin sa Surigao del Sur, habang Intensity III ay naramdaman sa Bislig City at Hinatuan, Surigao del Sur, at sa Rosario, Agusan del Sur.

Naitala rin ang Instrumental Intensity I sa Tandag City, Surigao del Sur; Nabunturan, Davao de Oro; at Cabadbaran City, Agusan del Norte. Ayon sa PHIVOLCS, asahan na ang mga aftershocks at posibleng pinsala matapos ang lindol.

Batangas, niyanig ng 6.1 magnitude na lindol — Phivolcs

ni Lolet Abania | May 22, 2022

Niyanig ng magnitude 6.1 na lindol ang baybayin ng Batangas ngayong Linggo ng umaga, ayon sa Philippine Institute of Volcanology and Seismology (Phivolcs).

Sa tala ng Phivolcs, alas-5:50 ng umaga naganap ang lindol at ang epicenter nito ay nasa layong 18 kilometro sa baybayin ng Calatagan, Batangas.

Habang may lalim na 122 km at tectonic ang pinagmulan. Naramdaman ang pagyanig na naitalang Intensity IV sa Calatagan, Batangas; Intensity III sa Quezon City, Pasay City, Pasig City, Tagaytay City, Mendez, Amadeo at Alfonso, Cavite, Obando, Bulacan; Intensity II sa Abucay, Bataan, Gapan City, Nueva Ecija, Castillejos, Zambales, Mandaluyong City, Manila City, Makati City, at Tanay, Rizal.

“Hindi ganoon kalakasan ang naramdaman na lindol dahil ito ay malalim,” saad ni Phivolcs Officer-in-Charge at Science Undersecretary Renato Solidum Jr. sa radio interview ngayong Linggo.

Asahan na ang mga aftershocks at pinsala matapos ang lindol, ayon sa Phivolcs. Gayunman, sinabi ni Ishmael Narag, officer-in-charge ng Earthquake and Tsunami Monitoring division ng Phivolcs sa isa ring radio interview ngayong araw, na walang inaasahang tsunami makaraan ang pagyanig. Nang tanungin si Narag sa posibleng dahilan ng lindol, sinabi nitong ang Eurasian Plate na nag-slide sa Manila Trench.

“’Yung Eurasian Plate, bumubunggo sa Pilipinas, duma-dive pailalim sa Manila Trench,” paliwanag ni Narag. Ayon naman kay Office of Civil Defense (OCD) Region 4B information officer Georgina Opinion, sa ngayon ay wala pang nai-report na mga pinsala at mga nasawi dahil sa lindol.

‘"Wala pa kaming natanggap na ulat ng damages at casualties matapos ang lindol,” sabi rin ni Opinion sa radio interview. Ani pa Opinion, nakikipag-ugnayan na rin ang OCD sa mga local government units (LGUs) upang idetermina ang anumang naging epekto ng lindol.

“Patuloy ang ating pagmo-monitor. Fortunately, wala naman kaming reported damages na natanggap,” pahayag naman ni Ronald Torres ng Municipal Disaster Risk Reduction and Management Office (MDRRMO) ng Calatagan sa radio interview.

Inaalam na rin ng Provincial Disaster Risk Reduction and Management Office (PDRRMO) sa Bulacan, katuwang ang mga LGUs kaugnay sa posibleng pinsala sa lugar.

“Nag-iikot ang ating mga LGU sa mga barangay... Sana walang naging malaking damage sa Mimaropa,” saad ni Liz Mungcal ng PDRRMO Bulacan sa radio interview.