Zambales, niyanig ng 4.3-magnitude na lindol

ni Lolet Abania | March 15, 2021

Niyanig ng 4.3-magnitude na lindol ang Zambales, ayon sa Philippine Institute of Volcanology and Seismology (Phivolcs).

Ayon sa Phivolcs, ang pagyanig ay naramdaman sa layong 17 kilometers southwest ng bayan ng Iba sa Zambales bandang alas-7:20 ng gabi ngayong Lunes.

Ang lindol ay tectonic in origin at may lalim na 28 kilometers, batay sa ulat ng Phivolcs. Nakapagtala naman ng Intensity II sa Mabalacat City sa Pampanga at maging sa Quezon City. Nai-report din ang instrumental intensities sa mga sumusunod na lugar: * Intensity II - Guagua, Pampanga * Intensity I - Quezon City; Marikina City; Calumpit, Bulacan; Dagupan City; San Jose, Nueva Ecija.

Ayon pa sa Phivolcs, wala namang naitalang napinsala matapos ang pagyanig, gayundin, walang aftershocks. Patuloy na pinapayuhan ang publiko na maging mapagmatyag at mag-ingat sa lahat ng oras.

Mt. Pinatubo, nag-aalburoto, bawal puntahan

ni Mary Gutierrez Almirañez | March 6, 2021

Nananatili sa alert level 1 ang Mt. Pinatubo sa Pampanga dulot ng sunud-sunod na paglindol, ayon sa Philippine Institute of Volcanology and Seismology (Phivolcs).

Ayon kay Phivolcs Director Renato Solidum, “Babantayan nating mabuti ang Pinatubo pero wala namang recommendation na mag-evacuate. Ang restriction lang natin kung wala namang importanteng gagawin sa crater ng Pinatubo, 'wag nang pumunta. Kung meron man, extreme caution, ibayong pag-iingat.”

Dagdag pa niya, “Yung huling taon na kung saan may konting aktibidad ang bulkang Pinatubo, nag-alert level 2 ay nu'ng 1995. Ibinaba natin ito at zero na noong January, 1996. Magmula noon, wala tayong kakaibang nakikita sa Pinatubo. Baka kasi may iba pang mangyari sa mga susunod na panahon kaya kailangang abisuhan ang mga tao at ang pag-abiso natin sa publiko tungkol sa aktibidad ng bulkan ay through alert level.”

Matatandaang naminsala ang Mt. Pinatubo noong 1991 kung saan tinatayang 847 katao ang nasawi habang 250,000 ang pamilyang lumikas.

Mahigit P12.5 bilyon ang halaga ng mga nasirang ari-arian, agrikultura at imprastruktura dulot nu'n.

Sa ngayon, wala pa namang nakikitang ebidensiya na magkakaroon ng imminent eruption at wala pang senyales na may umaakyat na magma o gas mula sa bulkan.

Davao Oriental, niyanig ng magnitude 5.7 na lindol

ni Ronalyn Seminiano Reonico | February 8, 2021

Niyanig ng magnitude 5.7 na lindol ang Davao Oriental ngayong Lunes, pasado alas-otso nang umaga.

Ayon sa Philippine Institute of Volcanology and Seismology (Phivolcs), ang lindol ay may lalim na 44 km at naganap sa 211 kilometers southeast ng Governor Generoso, Davao Oriental.

Naitala rin ang Instrumental Intensity II sa General Santos City at munisipalidad ng Alabel at Kiamba, Sarangani at ang Instrumental Intensity I sa Koronadal City.