P-BBM, 5 days sa Amerika, diretsong London

ni Mylene Alfonso | May 1, 2023

Tumulak na kahapon patungong Estados Unidos si Pangulong Ferdinand Marcos, Jr., kasama ang kanyang delegasyon para sa 5-day official woking visit sa Washington D.C.

Ayon kay Marcos, layunin ng kanyang biyahe na mas lalong paigtingin ang magandang ugnayan sa pagitan ng Pilipinas at Amerika sa loob ng ika-21 siglo.

"My visit is an important as they all are because they are part of our efforts to further reinforce our already strong bonds with the United States by bringing our alliance into the 21st century," wika ng Pangulo.

Mahalaga rin aniya ang kanyang pagtungo sa Amerika at lalo na ang pagpupulong nila ni US President Joe Biden para maisulong ang pambansang interes at pagpapatibay ng napakahalagang alyansa ng dalawang bansa.

Ipaparating niya kay President Biden at sa kanyang gabinete ang mas matatag na ugnayan sa Amerika sa lahat ng aspeto kabilang na rito ang food security, agricultural productivity development, digital economy, energy security, climate change, cybersecurity maging ang pagtiyak sa katatagan laban sa mga banta sa ekonomiya, balakid sa global supply chain at economic coercion.

"Towards this end, one of my priorities for this visit is to push for greater economic engagement, particularly through trade and investment, and science, technology, and innovation cooperation, between the United States and the Philippines," pahayag niya.

"I intend to speak and find opportunities in the semiconductor industry, critical minerals, renewable and clean energy, including nuclear, and infrastructure projects that will improve our digital telecommunication systems and facilitate sustainability efforts to address climate change," dagdag pa ni Marcos.

Samantala, makikipagkita rin ang Pangulo sa Filipino community sa Amerika upang kumustahin at iparating ang mga ginagawa ng kanyang gobyerno.

Nauna nang inihayag ng Department of Foreign Affairs na mayroong 4.21 milyong Pilipino sa US.

Inaasahang aalis si Marcos sa Washington DC sa Mayo 5, at tutuloy sa London para dumalo naman sa koronasyon ni King Charles III sa Mayo 6.

‘Wag mag-alala sa PH-US military bases.. Marcos sa China: ‘Di namin kayo lalabanan

ni Mylene Alfonso | April 11, 2023

Wala umanong dapat ikapangamba ang China kaugnay sa mga karagdagang site sa ilalim ng Pilipinas at ng Enhanced Defense Cooperation Agreement (EDCA) ng Estados Unidos.

Ito ang mensahe ni Pangulong Ferdinand Marcos, Jr., sa China lalo na kung wala naman aniyang nangyaring pag-atake.

“Kaya’t kung wala naman sumusugod sa atin, hindi na sila kailangan mag-alala dahil hindi naman sila natin lalabanan. Ang ginagawa lamang natin ay ipagpatuloy natin na pinapatibay natin ang depensa ng ating teritoryo, ang pagdepensa ng Republika,” sabi ni

Marcos sa sidelines ng Araw ng Kagitingan na ginanap sa Mount Samat National Shrine.

Kabilang sa apat na bagong EDCA sites ay ang Naval Base Camilo Osias at Lal-lo Airport na nasa Cagayan, Camp Melchor Dela Cruz sa Gamu, Isabela, at Balabac Island sa Palawan.

Hindi rin aniya papayagan ng Pilipinas na gamitin ng mga tropang Amerikano ang mga base bilang bahagi ng EDCA para sa paglulunsad ng mga opensibang pag-atake.

“Ngayon, ang reaction ng China ay hindi naman siguro kataka-taka dahil nag-aalala sila.

Pero hindi naman tayo, hindi naman gagamitin, hindi tayo papayag, ang Pilipinas, hindi tayo papayag na gamitin ang mga bases natin para sa kahit anong offensive na action.

Ito ay para lamang tulungan ang Pilipinas, kapag nangangailangan ng tulong ang Pilipinas,” diin ni Marcos.

Agawan sa WPS.. PH-US vs. China, no way! — Marcos

ni Mylene Alfonso | February 19, 2023

Iginiit ni Pangulong Ferdinand “Bongbong” Marcos Jr., na hindi niya gagamitin ang Philippines-US Mutual Defense Treaty kaugnay sa nangyaring panunutok ng military grade laser ng China sa Philippine Coast Guard sa Ayungin Shoal noong Pebrero 6.

Sa kanyang talumpati sa almuni homecoming ng Philippine Military Academy sa Baguio, sinabi ni Marcos na hindi sapat para gamitin ang Mutual Defense Treaty sa pagitan ng Pilipinas at Amerika kung saan lalo lamang lalala ang tensyon sa lugar.

“If we activate that, what we are doing is escalating, intensifying the tensions in the area. And I think that would be counterproductive,” punto ni Marcos.

“Besides, despite the fact that it was a military-grade laser that was pointed at our coast guard, I do not think that that is sufficient for it to trigger the Mutual Defense

Treaty,” saad pa ng Pangulo.

“We are in constant contact with our treaty partners, not only with the US but our ASEAN partners and other partners here in Asia.”

Nabatid na ang MDT ay nilagdaan noong 1951 na naguutos sa Manila at Washington na tumulong sa isa’t isa kung ang alinmang bansa ay nasa ilalim ng armadong pag-atake.