P68M shabu nasamsam, 1 timbog

ni Lolet Abania | April 27, 2021

Nagkakahalaga ng P68 milyon na tinatayang nasa 10 kgs. ng hinihinalang shabu ang nakumpiska sa isang drug personality matapos ang isinagawang operasyon ng Philippine National Police-Drug Enforcement Group (PNP-DEG) sa Cavite kahapon.

Kinilala ng mga awtoridad ang naarestong suspek na si Michael Lucas, 35-anyos.

Sa ulat ng PNP, ang suspek ay matagal na sa illegal drug trade na umabot ng mahigit dalawang taon at miyembro umano ito ng isang sindikato ng droga na siyang distributor ng shabu sa Region 3, NCR, Mindanao, at iba pang karatig-probinsiya.

Ayon kay PNP Chief Police General Debold Sinas, nakukuha ni Lucas ang suplay ng ilegal na droga mula sa isang Chinese na nakakulong sa Muntinlupa sa tulong ng iba pang kasamahan nito.

Sinabi pa ni Sinas, umaabot sa 10 hanggang 15 kgs. ng shabu ang naibabagsak umano ng suspek sa iba’t ibang lugar sa bansa.

“This is the result of the PNP’s intensified campaign against illegal drugs. We will continue to arrest drug personalities nationwide for a drug-free community,” ani Sinas.

Inihahanda na rin ang isasampang kaso laban sa suspek.

2 pulis, patay sa COVID-19

ni Mary Gutierrez Almirañez | April 18, 2021

Dalawang pulis ang iniulat na namatay nang dahil sa COVID-19, kung saan pumalo na sa 18,531 ang mga naitalang kaso sa kapulisan simula nu’ng lumaganap ang pandemya, ayon sa Facebook update ng Philippine National Police (PNP) ngayong araw, Abril 18.

Paliwanag pa ni PNP Chief Debold Sinas, "The PNP has now recorded 51 fatalities due to Covid-19 following the death of two police officer, a 40-year-old male cop assigned in Mountain Province died due to Acute Respiratory Failure and a 49-year-old male cop assigned in General Santos City with comorbidity died due to severe pneumonia."

Sa ngayon ay mahigit 16,204 na ang lahat ng mga gumaling na pulis at 169 ang nadagdag. Umabot naman sa 2,276 ang aktibong kaso mula sa 125 na nagpositibo kahapon.