1 pulis, patay sa COVID-19

ni Mary Gutierrez Almirañez | May 17, 2021

Isang pulis ang nadagdag sa listahan ng Philippine National Police (PNP) na namatay nang dahil sa COVID-19, kaya umabot na sa 61 ang kabuuang bilang ng mga pumanaw, batay sa tala ng PNP Health Service ngayong umaga, May 17.

Samantala, tinatayang 20,456 ang lahat ng mga gumaling, mula sa 85 na nakarekober ngayong araw.

Sa kabuuang bilang nama’y 21,924 na ang naitalang kaso, kung saan 69 ang nagpositibo, kaya umakyat na sa 1,407 ang active cases ng COVID-19 sa mga kapulisan.

Body camera sa mga pulis, gagamitin na

ni Mary Gutierrez Almirañez | May 10, 2021

Nakahanda na ang Philippine National Police (PNP) sa paggamit ng body camera sa lahat ng police operations, kung saan hinihintay na lamang ang ilang ipatutupad na protocols upang maiwasan ang legal technicalities, ayon kay bagong PNP Chief General Guillermo Eleazar ngayong Lunes, May 10.

Aniya, "With the guidance of the Supreme Court, with their protocol na ilalabas, maaaring at least du’n sa mga implementation at service of search warrant doon sa mga lugar na meron nang body cameras ay puwede na itong ilunsad."

Dagdag pa niya, "Na-distribute na itong almost 3,000 [body cameras] du’n sa 117 lang na city police stations, itong more than 1,000 municipal police stations, wala pa rin po pero inaasahan natin na darating 'yan."

Matatandaang ipatutupad sa PNP ang paggamit ng body camera upang may magsilbing recording o footage sa bawat operasyon at upang malaman kung umano’y nagkakaroon sa kanila ng pang-aabuso sa kapangyarihan.

Kampante naman si Eleazar na magiging matagumpay ang pagpapatupad ng body camera sa ilalim ng kanyang termino at labis niya iyong ipinagpapasalamat.

Pulis na patay sa COVID-19, 58 na

ni Mary Gutierrez Almirañez | May 7, 2021

Isang police corporal na naka-assign sa Maguindanao, Bangsamoro Autonomous Region ang pang-58 sa mga pulis na pumanaw dulot ng COVID-19, ayon sa tala ng Philippine National Police (PNP) ngayong umaga, Mayo 7.

Ayon sa ulat, isinugod sa ospital ang 47-anyos na pulis nu’ng ika-3 ng Mayo dahil sa lagnat at ubo. Sumailalim din ito sa RT-PCR test kaya nakumpirmang positibo sa COVID-19. Pumanaw ito ilang araw matapos magpositibo at makaranas ng Acute Respiratory Failure.

Dagdag pa ng PNP Health Service, mayroon din itong Diabetes.

Nagpahayag naman ng pakikiramay si PNP Chief Police General Debold M. Sinas.

Giit pa niya, "To our police officers with a comorbidity, always check your health and double your protection, if you feel any symptoms, immediately seek the advice of a medical practitioner. To protect others, start taking care of yourself first."

Sa ngayon ay umakyat na sa 1,540 ang aktibong kaso ng COVID-19 sa mga kapulisan, mula sa 87 na huling nagpositibo. Tinatayang 19,365 naman ang mga gumaling sa mahigit 20,963 na naitalang kaso.