PGH nasunog

ni Ronalyn Seminiano Reonico | May 16, 2021

Nasunog ang ikatlong palapag ng Philippine General Hospital (PGH) sa Taft Avenue, Manila ngayong Linggo, bandang alas-12:41 nang madaling-araw.

Itinaas sa ikalawang alarma ang sunog bandang 2 AM at mabilis na inilikas ang mga pasyente kabilang na ang mga may COVID-19.

Walang iniulat na nasaktan sa insidente ngunit ayon kay Fire Senior Inspector Hector Agadulin, chief of operations ng Bureau of Fire Protection-Manila, dahil nagmula ang sunog sa linen area ng operating room, mabilis na kumalat ang apoy dahil sa mga tela.

Ayon naman kay Senator Richard Gordon, chairman ng Philippine Red Cross (PRC), kabilang ang mga PRC personnel sa rumesponde sa insidente.

Aniya, “I have ordered to dispatch 2 fire trucks and 6 ambulances to extinguish the fire, provide first aid and transport patients right away.”

Samantala, idineklara ng Bureau of Fire Protection-Manila na under control na ang apoy bandang alas-2:46 nang madaling-araw. Nagdeklara naman ng fire out kaninang 5:41 AM. Iniimbestigahan pa ng BFP ang sanhi ng sunog. Ayon naman sa Manila Public Information Office, 12 pasyente ng PGH ang dinala sa Sta. Ana Hospital.

42 pasyente, pag-eeksperimentuhan ng VCO kontra COVID-19

ni Mary Gutierrez Almirañez | May 8, 2021

Isinalang sa clinical trials ng virgin coconut oil (VCO) ang 42 pasyenteng may COVID-19 upang malaman kung epektibo itong gamot laban sa virus, ayon sa Department of Science and Technology (DOST) ngayong Mayo 8.

Anila, “Currently, the project team has screened 832 patients wherein 42 were enrolled to the study. Out of the 42 enrollees, 20 patients were under the VCO group while 22 received only the standard care.”

Matatandaang nagsimula ang trial ng VCO sa Philippine General Hospital (PGH) nu’ng nakaraang Hunyo, 2020 at inaasahang matatapos iyon ngayong buwan.

Patuloy namang pinaaalalahanan ang publiko na mag-ingat sa pag-inom ng kahit anong gamot kontra COVID-19 hangga’t hindi pa tuluyang napapatunayan ng mga eksperto ang bisa nito.

Maliban sa VCO, ilang hinihinalang gamot na rin ang isinasailalim sa clinical trials laban sa lumalaganap na pandemya.

Bishop Pabillo, binanatan si Roque sa pagiging pikon

ni Mary Gutierrez Almirañez | April 13, 2021

Dinepensahan ni Manila Bishop Broderick Pabillo ang publiko, partikular na ang reporter na nabansagang ‘unchristian’ ni Presidential Spokesperson Harry Roque matapos kuwestiyunun ang pagkaka-admit nito sa Philippine General Hospital (PGH) gayung maraming COVID-19 patients ang naghihintay ding ma-admit at nananatiling nasa waiting list ng mga ospital.

“I think that’s an unchristian question. Ang aking assurance lang sa administrasyon po ni Presidente Duterte, lahat ng merong pangangailangang medikal, eh, mabibigyan po ng tulong. At ‘yun naman po ay dahil sa ating isinulong na Universal Healthcare nu’ng 17th Congress,” matatandaang sagot ni Roque sa virtual conference kahapon, na kaagad ding umani ng batikos sa social media.

Paliwanag ni Pabillo sa naging panayam sa kanya ngayong umaga, "It was uncalled for na bansagan mo ang mga taong nagtatanong nang maayos naman at legitimate naman ang question. Hindi. Papaano naging 'unchristian' 'yun? It was an innocent question."

Dagdag niya, "Ang public figures dapat, maging transparent sila sa pagsagot sa mga tao. 'Yan ang problema. ‘Pag nagtatanong, sa halip na sagutin ang tanong, ad hominem ang kanilang sagot, titirahin ang nagtatanong. Hindi naman tama 'yun."

Tumanggi namang magkomento ang Department of Health (DOH) sa prioritization na naganap.