Pinoy na mangingisda sa Bajo de Masinloc, Zambales, dumarami – PCG

ni Lolet Abania | March 25, 2022

Dumarami na ang mga Pilipinong mangingisda na nagpapalaot sa Bajo de Masinloc, Zambales, ayon sa Philippine Coast Guard (PCG) ngayong Biyernes.

Sa isang pahayag, sinabi ng PCG na naka-monitor sila ng tinatayang 45 na mga bangkang Pinoy, kung saan nangingisda ang mga ito sa bisinidad ng coastal waters ng Bajo de Masinloc, sa kanilang isinagawang maritime operations mula Pebrero 28 hanggang Marso 5.

Ayon kay PCG commandant Admiral Artemio Abu, ang dami ng mga mangingisda ay sadyang nakapagtala ng kagandahan para maitaguyod ang maritime security at maritime safety sa lugar na matatagpuan sa 124 nautical miles west ng Zambales.

“Seeing more Filipino fishing boats in Bajo de Masinloc is a proof of our intensified efforts to safeguard Filipino fishermen who consider fishing as their primary source of livelihood,” sabi ni Abu.

Tiniyak naman ni Abu sa mga mangingisda na patuloy ang PCG sa kanilang ginagawang aktibidad at presensiya sa lugar para maprotektahan ang mga ito at masiguro ang kanilang kaligtasan.

Ayon sa PCG, ang mga tauhan ng BRP Capones (MRRV-4404) ay nagbigay din ng mga relief supplies at COVID-19 kits sa mga mangingisda sa pamamagitan ng “Bayanihan sa Karagatan” program.

Matatandaang ipinahayag ng PCG na noong 2021, mayroong mga kahina-hinalang foreign vessels at sinasabing “nakadaong” na China Coast Guard (CCG) ships sa bisinidad ng karagatan ng Bajo de Masinloc, kung saan ang PCG at ang Bureau of Fisheries and Aquatic Resources (BFAR) ay tinutugunan ang isyu sa pamamagitan ng nababatay na kautusan at mapayapang usapan.

Iginiit naman ni NTF-WPS chairman at National Security Adviser Secretary Hermogenes Esperon na ang mga Pinoy na mangingisda ay dapat na hikayatin na mangisda sa kanilang traditional fishing ground, sa Bajo de Masinloc.

Una nang nagbigay ng direktiba si Department of Transportation (DOTr) Secretary Arthur Tugade sa PCG na ipagpatuloy ang kanilang isinasagawang intensified deployment ng mga assets at personnel sa lugar para maprotektahan ang mga Pinoy na mangingisda.

“The Area Task Force – North of the NTF-WPS provides operational direction for Bajo de Masinloc and Philippine Rise. Our units will continue to augment and support the Area Task Force – North of the NTF-WPS to safeguard Filipino fishermen in the said vicinity waters,” saad ni Abu.

“The PCG is here to be of service to the Filipino people by remaining steadfast in its duty to protect the country’s waters and safeguard every Filipino at sea. This is our commitment to the nation,” dagdag ng opisyal.

133 personnel ng Phil. Coast Guard, may COVID-19

ni Lolet Abania | January 13, 2022

Mahigit sa 100 tauhan ng Philippine Coast Guard ang nagpositibo sa COVID-19, ayon sa PCG ngayong Huwebes.

Batay sa ahensiya, nasa kabuuang 133 officers at personnel ng PCG mula sa national headquarters ang tinamaan ng virus. Sa ngayon, naka-quarantine na ang mga infected personnel.

Gayundin, ang tatlong opisina ng national headquarters ng PCG ay isinailalim sa temporary lockdown dahil na rin sa pagtaas ng COVID-19 cases habang isinara ito mula Enero 10 hanggang 14.

Kabilang sa ini-lockdown ay ang Office of the Deputy Chief of Coast Guard Staff for Comptrollership (CG-6), Coast Guard Public Affairs, at ang Coast Guard Finance Service.

Sinabi ng PCG na ilan sa kanilang mga tauhan na na-deploy sa “one-stop shops” na itinakda ng gobyerno ang mga tinamaan ng COVID-19.

Tiniyak naman ng ahensiya na lahat ng infected employees ay nabibigyan nila ng medical assistance habang agad nilang pinalitan ng mga bagong grupo ng personnel para hindi maantala ang kanilang operasyon.

Biyahe ng RoRo sa Caticlan, balik-normal na

ni Jasmin Joy Evangelista | December 19, 2021

Balik-normal na ang vessel trip papunta at paalis sa Caticlan jetty port simula alas-5:00, umaga ng Sabado, Disyembre 18.

Ito ay matapos tanggalin ang tropical cyclone wind signal sa Aklan bunsod ng pananalasa ng bagyong Odette.

Ayon kay Chief Master Jackielou Ang ng Philippine Coast Guard (PCG) Aklan, simula kahapon ng umaga ay nakabalik na ang mga biyahe ng Ro-Ro vessel mula sa Caticlan papuntang Batangas, Mindoro at Romblon.

Balik-biyahe na rin ang mga unit ng Caticlan-Boracay Transport Multi-purpose Cooperative (CBTMPC) mula sa isla ng Boracay patawid sa mainland Malay at vice versa.

Samantala, inabisuhan ng PCG-Aklan ang lahat ng mga pasahero na patuloy na sundin ang health, safety, at travel protocols upang maiwasan ang pagkalat ng COVID-19 lalo pa at nakapasok na ang Omicron variant sa bansa.