27 patay; kapitan umamin — PCG.. Bangka overloaded, mga pasahero ‘di pinag-life jacket

ni Mylene Alfonso, Mai Ancheta, Benjamin Chavez @News | July 29, 2023

Sinabi ni Philippine Coast Guard (PCG) Spokesman Armand Balilo na umamin umano ang kapitan ng lumubog na bangka sa Binangonan, Rizal na nag-overload ito ng pasahero at hindi pinagsuot ng life jacket ang mga sakay.

“May pag-amin na ginawa ang kapitan na talagang in-overload niya ang boat at hindi pinagsuot ng life jacket,” ani Balilo.

Sinasabing 42 lamang ang kapasidad ng motorbanca pero sa naganap na trahedya, 43 ang nailigtas ng mga awtoridad at 27 ang namatay dahil sa pagkalunod.

Lumabas pa sa inisyal na imbestigasyon na bago bumiyahe ang pampasaherong bangka na Princess Aya ay 22 lamang ang pasaherong nasa manipesto na ipinakita umano ng kapitan ng bangka sa Coast Guard personnel.

Dahil wala namang indikasyon ng masamang panahon, pinayagan umano ang paglalayag ng pampasaherong bangka.

Kaugnay nito, sinibak sa puwesto ang dalawang personnel ng PCG na nakadestino sa Binangonan, Rizal matapos ang insidente.

Ayon kay PCG Commandant Artemio Abu, ang dalawang sinibak na personnel ay nakatoka sa pag-monitor sa biyahe ng mga pampasaherong bangka sa lugar.

Malalaman aniya sa gagawing imbestigasyon kung nagkaroon ng kapabayaan ang dalawang PCG personnel sa pagganap sa kanilang tungkulin.

Hindi pinangalanan ni Abu ang dalawang sinibak na tauhan.

Ang pagsibak aniya sa dalawang tauhan ay upang hindi maimpluwensyahan ang gagawing imbestigasyon sa insidente.

Sinuspinde na ng Maritime Industry Authority (MARINA) ang safety certificate ng MB Aya Express dahil sa kuwestiyon ng integridad nito

Mga pasahero nag-panic sa lakas ng hangin.. Bangka tumaob, 21 patay

ni Jeff Tumbado / Madel Moratillo / Mai Ancheta @News | July 28, 2023

Umabot sa 21 pasahero ang nasawi habang 30 naman ang nailigtas sa paglubog ng bangka sa Talim Island, Barangay Kalinawan, Binangonan sa Rizal, kahapon.

Sa panayam kay Philippine Coast Guard (PCG) Spokesperson Rear Admiral Armand Balilo, 51 ang kabuuang bilang ng mga sakay sa MBCA Princess Aya.

Bandang ala-1 ng hapon, hinampas umano ng malakas na hangin ang 45-metrong bangka kaya’t nataranta ang mga pasahero at nagpuntahan sa kaliwang bahagi ng sasakyan kaya’t nawalan ng balanse at lumubog.

Ayon pa kay Balilo, binigyan ng clearance na maglayag ang bangka dahil walang sama ng panahon sa area.

Patuloy pa umano ang imbestigasyon sa insidente.

Barko nagliyab, 65 sakay

ni Mylene Alfonso | June 19, 2023

Nakaligtas sa kapahamakan ang tinatayang nasa 65 na pasahero ng isang pampasaherong barko matapos masunog sa karagatan kahapon ng umaga malapit sa Tagbiliran Port.

Batay sa report ng Philippine Coast Guard, umusok at nag-apoy umano ang barkong M/V Esperanza Star pasado alas-3 ng madaling-araw.

Padaong na umano ang barko sa Tagbiliran port nang sumiklab ang apoy at agad namang nakaresponde ang PCG pati na ang emergency responders ng Bohol

government.

Ayon kay Bohol Provincial Disaster Risk Reduction Management Office Chief Anthony Damalerio, nailigtas ang lahat ng pasahero at tripulante ng barko.

Kasama rin umanong sumaklolo sa nasunog na barko ang mga bangkang pangisda na nagbayanihan para maisalba ang mga pasahero, pati na ang dumaang barko ng Trans Asia.

Ang M/V Esperanza Star ay may rutang Iligan City, Siquijor, Cebu City at Bohol.

Iniimbestigahan pa ng ang sanhi ng sunog