Taas-hulog sa SSS, hinarang

ni Lolet Abania | January 11, 2021

Hiniling ng mga manggagawa at grupo ng mga employers sa gobyerno na ipagpaliban muna ang pagtataas ng kontribusyon para sa lahat ng miyembro ng Social Security System (SSS).

Sa isang forum, ayon kay Sonny Matula, chairperson ng isang labor group na Nagkaisa, maaaring magbigay ang pamahalaan ng kanilang contribution sa SSS base sa Section 20 ng Social Security Act of 2018.

“'Yung national government ay ni-require na magbibigay ng appropriations sa SSS annually pero hindi ito sinusunod ng ating gobyerno mula noong naitayo itong SSS,” sabi ni Matula.

“Ang nagko-contribute lang ay ang employer at workers mula 1957 maliban sa naunang P500,000 seed money ng SSS na nagmula sa gobyerno,” dagdag ng labor leader.

Ipinunto naman ng Philippine Chamber of Commerce and Industry (PCCI) chairperson at pangulo ng Employers Confederation of the Philippines (ECP) na si Sergio Ortiz-Luis na hirap makabangon ang marami sa mga negosyante dahil labis na naapektuhan ng COVID-19 pandemic.

Ayon pa kay Luis, ang magiging dagdag na kontribusyon ng mga miyembro ng SSS ay napakahalaga sa kanila lalo na sa mahihirap.

“Marami sa mga tao natin, nawalan ng trabaho. Alam naman natin, 98% ng enterprises natin, eh, mga micro industries. Kalahati noon, halos nagsara. ‘Yung iba, nag-iisip pa kung magbubukas o hindi,” sabi ni Luis.

“Napakahalaga kahit na piso eh, dito sa time na 'to dahil kulang na kulang 'yung pera ng tao. Although, sasabihin na maliit lang naman ‘yan, eh, para naman doon sa talagang isang kahig, isang tuka, malaki 'yan, malaking bagay 'yan,” dagdag ni Luis.

Ang Social Security Act of 2018, na naipasa para matiyak ang long-term viability ng SSS' fund life, ay may mandato ng 1% dagdag sa kontribusyon ngayong taon na aabot ng monthly contribution rate na 13%.

Matatandaang noong January 4, ipinag-utos ni Pangulong Rodrigo Duterte ang pagpapaliban ng 2021 contribution hike para sa lahat ng miyembro ng PhilHealth. Noong January 6 naman, ang House Makabayan bloc ay naghain ng House Bills 8310 at 8311 para isaayos ang mga probisyon sa batas na may mandato ng awtomatikong pagtataas ng kontribusyon sa SSS at PhilHealth.

Gayundin noong January 7, inihain ni Speaker Lord Allan Velasco ang House Bills 8316 at 8317 na magbibigay ng awtoridad sa pangulo upang isuspinde ang nakatakdang pagtataas sa PhilHealth at SSS contribution rates sa panahon ng national emergencies.

Taas-singil ng PhilHealth, sopla kay PDu30

ni Ronalyn Seminiano Reonico | January 5, 2021

Ipinag-utos ni Pangulong Rodrigo Duterte na ipagpaliban ang taas-singil ng Philippine Health Insurance Corp. (PhilHealth) sa mga miyembro nito, ayon kay Senator Christopher “Bong” Go.

Pahayag ni Go, “Ipina-defer na muna (ni President Duterte ang) increase sa PhilHealth (contribution).”

Aniya pa, “Base sa usapan namin ni Pangulong Duterte, sang-ayon naman po siya na ipagpaliban pansamantala ang pagtaas sa rates ng contributions ng PhilHealth habang may pandemya pa tayong kinakaharap.

“Sinabi niya na kung may maipapasang batas ang lehislatibo na naglalayong ipatupad ang deferment, o kung may kailangang aprubahan na dagdag na pondo mula sa gobyerno para hindi maantala ang serbisyo ng PhilHealth, pipirmahan niya ito pagkatapos mapag-aralan nang mabuti.”

COVID-19 testing, ititigil dahil sa P762.8-M utang ng PhilHealth

ni Ronalyn Seminiano Reonico | January 5, 2021

Nagbabala si Phil. Red Cross Chairman at Sen. Richard Gordon na “anytime” ay maaaring itigil ang pagsasagawa ng COVID-19 testing ng PRC dahil sa malaking utang sa kanila ng Philippine Health Insurance Corporation (PhilHealth) na umabot sa P762.8 million.

Pahayag ni Gordon, "We will stop anytime because masyadong kampante ang PhilHealth. Akala nila, we are government. We are not government.”

Ayon din kay Gordon, umorder ang PRC ng 480,000 test kits na nagkakahalaga ng $5 million at kailangan ding bayaran ang mga medical technologists.

Aniya, "Hindi naman kami puwedeng malugi. Ano, kami [ang] magpapakamatay dahil sa negligence at mal-administration ng PhilHealth? Hindi naman tama iyon.”

Samantala, hindi tinanggap ni Gordon ang paliwanag ng PhilHealth na ang pagre-review ng mga dokumento ang dahilan umano ng mabagal na pagbabayad nito sa PRC.

Saad ni Gordon, "They are just looking for excuses. How can they say that? Lahat ng tine-test namin, galing sa kanila. Lahat ng isinulat doon, galing sa kanila.”