780K doses ng reformulated Pfizer vaccine para sa mga batang edad 5-11 dumating na sa bansa

ni Jasmin Joy Evangelista | February 17, 2022

Dumating na sa bansa ang ikatlong batch ng reformulated Pfizer vaccine para sa mga batang edad 5-11 nitong Miyerkules.

Lumapag ito sa Ninoy Aquino International Airport Terminal 3 bandang 9 p.m. lulan ng Air Hong Kong flight LD456.

Ang mga vaccine doses na ito ay binili ng bansa sa pamamagitan ng loan mula sa World Bank.

Ang first at second tranches ng reformulated na vaccine ay dumating noong February 4 at 10.

Ayon kay Health Undersecretary Myrna Cabotaje, inaasahang darating sa bansa ang nasa 5 hanggang 6 na milyong reformulated Pfizer vaccines sa buong buwan ng Pebrero.

As of February 14, nasa 148,000 minors edad 5-11 ang nakatanggap na ng L COVID-19 vaccine. Sa tala na ito, walo ang nakaranas ng non-serious reactions matapos maturukan.

Karagdagang 780K doses ng Pfizer vaccine para sa mga batang edad 5-11, dumating na sa bansa

ni Jasmin Joy Evangelista | February 11, 2022

Dumating na sa bansa ang karagdagang 780,000 ng Pfizer COVID-19 vaccine doses para sa mga batang edad 5 hanggang 11 nitong Huwebes ng gabi.

Ayon sa National Task Force (NTF) Against COVID-19, ang mga naturang bakuna ay lulan ng Air Hong Kong flight LD456 at lumapag sa Ninoy Aquino International Airport Terminal 3 bandang 9 p.m.

Ang mga bakunang ito ay binili ng gobyerno sa pamamagitan ng loan sa World Bank.

Ito na ang ikalawang batch ng Pfizer vaccine doses na nakalaan para sa naturang age group.

Noong Pebrero 7 ginanap ang unang araw ng pagbabakuna para sa mga batang edad 5 hanggang 11 kung saan halos 10,000 minors ang nabakunahan kontra-COVID-19.

30 M doses ng Pfizer, nakalaan sa pagbabakuna ng edad 5-11 – DOH

ni Lolet Abania | February 5, 2022

Umabot sa 30 milyon doses ng Pfizer-BioNTech vaccine ang na-secure ng gobyerno para sa pagbabakuna ng mga kabataang edad 5 hanggang 11 laban sa COVID-19, ayon sa Department of Health.

Sa isang interview ngayong Sabado, sinabi ni DOH Undersecretary Maria Rosario Vergeire na nagawa ng gobyernong makipagkasundo sa vaccine manufacturer na Pfizer para sa suplay ng bakuna kontra-COVID-19 na ilalaan sa naturang grupo ng mga kabataan.

“Mayroon na tayong committed na 30 million doses ng Pfizer vaccine for 15 million na 5 to 11 year-old children,” sabi ni Vergeire, na aniya ang mga bata ay makatatanggap ng dalawang doses ng bakuna sa loob ng 21-day interval matapos na makuha ang unang shot nito.

Una nang iniurong ng pamahalaan ang COVID-19 vaccination ng mga minors sa Lunes, Pebrero 7, kung saan ang orihinal na iskedyul ay noong Pebrero 4, dahil anila ito sa logistical challenge.

Ayon din sa Malacañang, ang inisyal na pagbabakuna ay isasagawa sa anim na vaccination sites sa National Capital Region noong Biyernes.

Kabilang dito ang Philippine Heart Center, Philippine Children’s Medical Center, National Children’s Hospital, Manila Zoo, SM North Edsa (Skydome), at sa Fil Oil Gym sa San Juan City.

Binanggit naman ni Vergeire na ang vaccination ng mga edad 5 hanggang 11 ay magsisimula ng alas-10:00 ng umaga sa Lunes.

Sa Miyerkules, Pebrero 9, ayon kay Vergeire, palalawigin pa sa 38 ang mga vaccination sites sa buong Metro Manila at sa Region 3 at Region 4A.

“By next week, we will be launching in specific regions in the country like Davao and Cebu,” saad ng opisyal.

Aniya, magiging phased implementation ang pagbabakuna kontra-COVID-19 sa mga naturang kabataan.

“Dumating ang 780,000 doses ng bakuna kagabi para sa ating kabataan. Sunud-sunod nang darating ang mga bakuna kaya we will have our expansion within this month,” dagdag ni Vergeire.

Paliwanag naman ni Vergeire, ang vaccination sa mga nasabing kabataan ay purely voluntary o pawang boluntaryo lamang at ang mga magulang ang dapat na magpasya kung payag o hindi sila na bakunahan ang kanilang mga anak laban sa COVID-19.

Sinabi pa ng kalihim na handa rin ang nakalaang system para ma-detect ang anumang adverse event na maaaring maranasan ng mga bata dahil sa vaccination, subalit giit ni Vergeire, ang benepisyo ng bakuna ang nananatiling nakahihigit sa panganib na dulot ng COVID-19.

Gayundin, ayon kay Vergeire, “vaccination will prevent a reported phenomenon in children called Multi-system Inflammatory Syndrome, a severe form of COVID-19 which results in multiple organ failures.”