Roque: DDS o hindi, babakunahan

ni Mary Gutierrez Almirañez | May 27, 2021

Nilinaw ni Presidential Spokesperson Harry Roque na walang political discrimination o pamumulitika sa vaccination rollout ng COVID-19 sa ilalim ng administrasyon ni Pangulong Rodrigo Duterte, kaugnay sa isyung prayoridad lamang nito ang mga kapartido.

Aniya, "Scientifically, you can’t discriminate because you’re defeating the purpose of a mass vaccination. No one is safe until we are all safe. It does not make sense if you give priority to areas just because they are political supporters and ignore other areas because the nature of the virus is it does not discriminate against or for political allies or opponents."

Matatandaan namang mahigit 1,600 empleyado ng House of Representatives (HoR) na ang nabakunahan kontra COVID-19 at ilang pulitiko na rin mula sa iba’t ibang local government units (LGU) na nasa high-risk area ng COVID-19 ang napasama sa priority list.

Kabilang din sa isinusulong ng mga opisyal ay ang mas mabilis na vaccination rollout, kung saan inirerekomendang bakunahan na rin ang publiko kahit hindi pa prayoridad sa listahan.

Sa ngayon ay 4,495,375 indibidwal na ang nabakunahan kontra COVID-19. Kabilang dito ang mga healthcare workers, senior citizens at may comorbidities o nasa A1 hanggang A3 priority list.

Inaasahan namang susunod na ang rollout sa ilalim ng A4 at A5, kung saan kabilang ang economic frontliners at mga mahihirap.

Samantala, pinag-aaralan na ng Food and Drug Administration (FDA) ang isinumiteng application para sa emergency use authorization ng Pfizer COVID-19 vaccines upang iturok sa edad 12 hanggang 15-anyos.

"Ang ating mga experts, in-evaluate. In fact, early this evening, I already got the recommendations of our experts and it's very favorable… Within the week, we will issue an amendment and we will be able to use it in children of 12 to 15 years old," sabi pa ni FDA Director General Eric Domingo.

Pfizer COVID-19 vaccine, sa mahihirap iturok — P-Du30

ni Lolet Abania | May 20, 2021

Iniutos na ni Pangulong Rodrigo Duterte ang pagbabakuna ng donasyong Pfizer-BioNTech COVID-19 vaccines sa indigent population, ayon kay Presidential Spokesperson Harry Roque.

Ayon kay Roque, ibinaba ng Pangulo ang direktiba batay sa kondisyon na ibinigay ng global aid na COVAX Facility na nag-donate ng 193,050 doses ng Pfizer-BioNTech vaccines na nai-deliver na sa bansa.

“Ipinag-utos ni Presidente na ibigay ang Pfizer sa mahihirap at indigent population. Under COVAX guidelines, it is A1, A2, A3 and A5,” ani Roque sa press briefing ngayong Huwebes.

Sa ilalim ng vaccination program ng gobyerno, ang A1 ay mga health workers, A2 ay mga senior citizens, A3 ay mga taong may comorbidities habang ang A5 ay mga mahihirap at indigents.

Ang A4 naman ay mga essential workers o mga kinakailangang mag-report physically sa trabaho sa kabila ng umiiral na quarantine restrictions.

“Iyong Pfizer, hindi po ‘yan ilalagay sa mall. Ilalagay ‘yan sa barangays na mababa ang uptake ng vaccine,” diin ni Roque.

“On A4, we will use the ones (vaccines) paid for by the government,” dagdag ng kalihim.

Batay sa naging evaluation ng Food and Drug Administration (FDA) ng bansa, ang Pfizer-BioNTech ay may efficacy rate na 95% sa isinagawang study population habang may 92% naman na angkop para sa lahat ng lahi.

Pfizer COVID-19 vaccines, mas dinumog kesa sa ibang brand

ni Mary Gutierrez Almirañez | May 19, 2021

Pinaaalalahanan ang publiko ng Metro Manila Center for Health Development na magparehistro muna bago pumunta sa COVID-19 vaccination site upang maiwasan ang mahabang pila at patuloy na maipatupad ang social distancing, ayon kay Director Gloria Balboa ngayong araw, May 19.

Kaugnay ito sa nangyaring pila sa ilang vaccination sites sa Metro Manila, kung saan karamihan sa mga pumunta ay nag-walk-in o pumila kahit hindi naka-schedule, kaya may ilang senior citizens at persons with comorbidity ang umuwi na lamang.

Sabi pa ni Balboa, "'Wag po silang pumunta kung hindi pa sila naka-schedule kasi bawat vaccination center, mayroong limit na puwedeng bakunahan for that day... Alam naman natin 'pag pila at ‘di ma-maintain ang social distancing, malaki ang risk na naman na kakalat ang sakit."

Matatandaang dinagsa kamakailan ang rollout ng Pfizer COVID-19 vaccines at ngayo’y ubos na ang suplay sa ilang lungsod.

Bagama’t limitado ang suplay ay kapansin-pansing mas dinumog ang bakunang gawa ng America, kumpara sa ibang brand na inaaloka sa katabing vaccination site, sapagkat hindi ganu’n kahaba ang pila roon nu’ng araw na ‘yun.

Gayunman, tiniyak ni Balboa na ligtas gamitin ang kahit anong brand ng COVID-19 vaccines.

Sa ngayon ay hinihikayat din niya ang publiko na tanggapin ang anumang available na bakuna laban sa virus dahil lahat iyon ay epektibo at aprubado ng Food and Drug Administration (FDA).