3 lalaki, tiklo sa ecstasy

ni Jasmin Joy Evangelista | September 27, 2021

Arestado ang tatlong lalaki sa Parañaque City matapos mahulihan ng umano'y party drug na ecstasy sa isang buy-bust operation ng Philippine Drug Enforcement Agency (PDEA) at Southern Police District.

Ayon sa PDEA, agad ikinasa ang buy bust operation sa Quirino Avenue, Barangay San Dionisio, Parañaque City, nang makatanggap sila ng impormasyon na sangkot sa pagbebenta ng party drugs ang mga suspek.

Nakumpiska mula sa mga suspek ang 105 piraso ng MDMA o Ecstasy na nagkakahalaga ng P178,500.

Nakuha rin mula rin mula sa mga ito ang buy-bust money at mga cellphone.

Nahaharap ang mga suspek sa kasong paglabag sa Republic Act 9165 o “The Comprehensive Dangerous Drugs Act of 2002".

Mahigit P7-M halaga ng shabu, nasamsam sa Clark airport

ni Jasmin Joy Evangelista | September 17, 2021

Limang pakete ng shabu na itinago sa loob ng isang electric airpot flask at tinatayang nagkakahalagang P7.4 milyon ang nasabat ng Bureau of Customs at Philippine Drug Enforcement Agency sa Clark International Airport nitong Martes.

Ang shipment ay idineklarang “flask” na nagmula sa Lilongwe, Malawi pero inalerto ito ng Enforcement and Security Service (ESS) - Customs Anti-Illegal Drug Task Force (CAIDTF) matapos makatanggap ng impormasyon na may nakatagong droga sa kargamento.

Nang makita ang kahina-hinalang bagay sa x-ray inspection, agad isinailalim sa physical examination ang kargamento kung saan tumambad ang limang pakete ng shabu na kinumpirma ng PDEA sa kanilang laboratory examination.

Naglabas na ng warrant of seizure and detention laban sa kargamento si Port of Clark District Collector Alexandra Lumontad at inilipat na nila sa PDEA ang kustodiya ng mga pakete ng shabu.

Nakasilid sa pakete ng tsaa... P331 M shabu nakumpiska, mag-asawa kulong

ni Lolet Abania | September 10, 2021

Arestado ang mag-asawa matapos na makuhanan ng higit sa P331 milyong halaga ng umano’y shabu sa ikinasang buy-bust ng mga awtoridad sa lalawigan ng Cavite, nitong Huwebes nang gabi.

Ayon sa Philippine Drug Enforcement Agency (PDEA), nakumpiska ang bulto-bultong mga pakete ng hinihinalang shabu sa bahay ng mag-asawa sa Imus, Cavite.

Nakasilid sa mga pakete ng tsaa ang nasa 48 kilo ng umano’y shabu na may standard drug price na mahigit sa P331 milyon.

Gayunman, hindi binanggit ng PDEA ang pagkakakilanlan ng mag-asawang suspek. Itinanggi naman ng mag-asawa na sa kanila ang nasabing kontrabando dahil anila, ipinatago lamang umano ito sa kanila ng 2 lalaki na parokyano nila sa negosyong pagpaparenta ng sasakyan.

Hindi rin umano nila batid kung ano ang laman ng mga kahon na iniwan sa kanila.

Duda naman ang mga tauhan ng PDEA sa paliwanag ng mga suspek.

Ayon pa sa PDEA, ilang buwan na silang nagsasagawa ng surveillance sa mag-asawa at nang magpositibo, saka nila isinagawa ang entrapment operation.

Batay rin sa impormasyon ng PDEA, nakatakdang dalhin sa Mindanao ang mga nasamsam na hinihinalang shabu.