Seguridad para sa BSKE, kasado na

ni Eli San Miguel - Trainee @News | October 29, 2023

Naihanda na ang lahat ng mga hakbang sa seguridad upang tiyakin ang ligtas, malaya, at maayos na Barangay and Sangguniang Kabataan Elections (BSKE) sa Lunes, Oktubre 30.

Ayon sa Armed Forces of the Philippines (AFP) at Philippine Coast Guard (PCG), handa silang tumulong sa Philippine National Police (PNP) sa pag-aasikaso ng mga presinto ng botohan, mga tauhan ng halalan, at mga botante.

Kabuuang 117,000 military personnel at 20,000 coast guardians ang itinataguyod sa buong bansa, lalo na sa 361 na mga lugar ng halalan na tinukoy ng Joint Peace and Security Coordinating Council (JPSCC).

Nauna nang inihayag ng PNP na may kabuuang 187,600 pulis ang inatasan para sa mga responsibilidad sa halalan.

Samantala, sinabi ni PCG Commandant Admiral Ronnie Gil Gavan na bahagi ng kanilang pagkakatalaga ang mga intelligence operative, K9 units, mga tauhan ng PCG at PCG Auxiliary na may tungkulin na magpatupad ng mahigpit na seguridad sa mga pantalan at mag-asikaso ng mga helpdesk na itinayo ng Department of Transportation (DOTr).

Itinaas ng PCG ang kanilang status sa "full alert" mula Oktubre 25 hanggang Nobyembre 5 upang tiyakin ang maayos na operasyon ng mga pasilidad ng transportasyon sa dagat at ang maginhawang paglalakbay ng mga biyahero.

Mula alas-12 ng hatinggabi hanggang alas-6 ng umaga ng Linggo, mino-monitor ng PCG ang 27,530 na mga pasahero na palabas at 28,532 na mga pasahero na pabalik sa lahat ng mga pantalan sa buong bansa.

Bangka ng 3 namatay na mangingisda, narekober na

ni Angela Fernando - Trainee @News | October 16, 2023

Narekober ng Philippine Coast Guard nitong Linggo ang bangkang binangga ng isang dayuhang barko nu'ng Oktubre 2 malapit sa Bajo de Masinloc na pumatay sa tatlong Pilipinong mangingisda.

Mapupunta umano ang nawasak na bangkang "FB Dearyn" sa pangangalaga ng fact-finding committee ng PCG bilang bahagi ng patuloy na imbestigasyon sa nangyaring banggaan.

Sa isinagawang press conference nitong Lunes, Oktubre 16, sinabi ni Coast Guard Vice Admiral Joseph Coyme, ang lider ng task force na Kaligtasan sa Karagatan, ang nakuhang bangka ay nagsisilbing ebidensiya laban sa mga responsable sa salpukan at upang masampahan ito ng kaso.

Nanawagan din ang PCG sa Scene of the Crime Operatives ng suporta upang matukoy kung anong barko ang kumitil sa buhay ng mga mangingisda.

Walang kinalaman ang China — PCG.. Pagkamatay ng 3 Pinoy, aksidente

ni Mylene Alfonso @News | October 6, 2023

Aksidente ang pagkamatay ng tatlong mangingisdang Pilipino makaraang mabangga ng isang dayuhang commercial vessel ang sinasakyan nilang fishing boat noong Lunes ng madaling-araw sa karagatang sakop ng Agno, Pangasinan.

"As far as the initial information that we have right now, we can say na hindi naman ito talaga deliberate," pahayag ni Philippine Coast Guard Spokesman Commodore Jay Tarriela sa Bagong Pilipinas Ngayon public briefing.

"Ito ay isang aksidente. Walang kinalaman sa Tsina," wika pa ni Tarriela.

"Hindi ito nangyari sa Bajo de Masinloc. Hindi ito 'yung naglalabasang espekulasyon kahapon na baka Chinese Maritime Militia o Chinese Coast guard ang deliberately nag-ram," paglilinaw pa ng opisyal.

Aniya, batay sa testimonya ng 11 nakaligtas na mangingisda, masyadong madilim ang lugar at masama ang panahon kaya hindi sila napansin ng bumangga sa kanila na Pacific Anna Crude Oil Tanker.

Nabatid na nakipag-ugnayan na rin ang PCG sa naturang foreign vessel na may Marshall Island flag.