Barko ng BFAR sa WPS, binomba ng Chinese Coast Guard

ni Angela Fernando - Trainee @News | December 9, 2023

Binomba ng water cannon ng Chinese Coast Guard (CCG) nitong Sabado ang sasakyang pandagat ng Bureau of Fisheries and Aquatic Resources (BFAR) na patungo sa Scarborough Shoal. 

Kasalukuyang nasa misyon ng paghahatid ng langis at iba pang kagamitan ng mga mangingisda ang sasakyan ng BFAR nang mangyari ang insidente.

Nagsimula ang pambobomba ng water cannon bandang alas-9:00 ng umaga at nagpatuloy ito hanggang alas-12:00 ng tanghali.

Base sa mga natanggap na ulat, humanap muna ng tiyempo ang CCG bago itinutok ang water cannon at direktang binomba ang nasabing barko ng ‘Pinas.

Suportado rin ng mga barkong-militar ng China ang mga bangka ng CCG na lumapit sa sasakyan ng BFAR.

Barko ng China sa WPS, nabawasan na

ni Angela Fernando - Trainee @News | December 6, 2023

Malaki ang ibinababa ng bilang ng mga barkong pandagat ng China sa Julian Felipe Reef, ayon sa pahayag ng militar ngayong Miyerkules.

Ito ay matapos ihayag ng isang mataas na mambabatas na magpadala ng mas maraming barko ng Philippine Navy upang pigilan ang presensya ng nasabing bansa sa West Philippine Sea.

Saad ni Philippine Navy Vice Admiral Alberto Carlos ng Western Command, ang bilang ng mga sasakyang pandagat ng China na nasa lugar ay malaki ang ibinaba mula sa 135 na dami nito kamakailan.

Dagdag niya, kasalukuyan pang tinitingnan ang lokasyon ng mga sasakyang pandagat.

Aniya, kasama sa standard operating procedure ng 'Pinas pagdating sa mga vessel ng China ang paglabas ng mga radio challenge at pagsusuri sa presensya ng mga ito.

Ayon pa kay Carlos, laging nandoon ang Philippine Navy at ang Philippine Coast Guard sa tuwing nakikita nila ang pagtaas sa presensya ng mga sasakyang pandagat ng dayuhang bansa sa teritoryo ng WPS.

Sa kabilang banda, nagpahayag si House Deputy Minority Leader France Castro ng pagkadismaya dahil sa pagpasok ng China sa bahagi ng bansa sa kabila ng ipinapakitang pagtutol at mga diplomatikong protesta ng mga Pinoy at sinabing hindi gumagana ang existing procedures na sinasabi ng Philippine Navy.

Dahil sa pambobomba sa MSU Gym... Seguridad, pinaigting ng PCG

ni Angela Fernando - Trainee @News | December 5, 2023

Nagpahayag ang Philippine Coast Guard (PCG) ngayong Martes na kanilang pinalakas ang mga hakbang sa seguridad matapos ang kamakailang pagsabog ng bomba sa Mindanao State University (MSU) sa Marawi City.

Ayon kay PCG spokesperson Rear Admiral Armand Balilo sa isang Bagong Pilipinas Ngayon Public briefing, itinaas na ang antas ng babala sa ahensya dahil sa insidente sa MSU.

Aniya, nagdagdag sila ng tauhan sa mga nakikita nilang maaaring maapektuhan ng pambobomba lalo na sa mga port na involved sa bahagi ng Mindanao.

Saad ni Balilo, dinagdagan na rin nila ang mga naka-deploy na K9 units sa gitna ng pinaigting na inspeksyon at pagsusuri sa ports.

Merong mga floating assets na rin ang umiikot sa mga baybayin para sa mas mahigpit na seguridad.

Sinigurado naman ng PCG kasama ang Philippine Ports Authority, Philippine National Police (PNP), at ang Armed Forces of the Philippines (AFP) ang kaligtasan ng mga biyahe at ng mga pasahero.