7 patay, 24 sugatan sa nagliyab na pampasaherong bangka sa Quezon — PCG

ni Lolet Abania | May 23, 2022

Nasa tinatayang pitong indibidwal ang nasawi habang 24 ang nasugatan matapos na masunog ang isang passenger boat sa baybaying lalawigan ng Quezon ngayong Lunes ng umaga, ayon sa Philippine Coast Guard (PCG).

“Merong pitong patay,” pahayag ni PCG spokesperson Commodore Armand Balilo sa isang radio. Ani Balilo, lima sa mga nasawi ay mga babae at dalawa namang lalaki.

Sinabi rin ng PCG, tatlo sa mga na-rescue ay nasa kritikal na kondisyon. Base report ng PCG, nasa 134 ang aktuwal na bilang na mga sakay ng bangka, kabilang dito ang 10 crew members. Ayon naman kay Police Major General Rhoderick Armamento, police commander sa Southern Luzon area, lahat ng mga pasahero na lulan ng bangka ay hawak na nila.

“’Yung pinakalatest ‘yung bata na-recover na ngayon lang, minutes ago. As of this very moment, ‘yung reported na 134 passengers ay accounted na unless na may other reports pa na papasok... kanina isa na lang ang hinahanap natin, minutes ago na-recover na ‘yung bata na eight years old,” saad ni Armamento sa parehong radio interview.

Sinabi ni Armamento na pinag-uusapan na ng pulisya, local government officials, PCG, mga opisyal ng Municipal Disaster Risk Reduction and Management (MDRRM) ang naganap na insidente.

Binanggit naman ni Balilo na ang passenger vessel ay may record na ng isang insidente ng paglubog nito. “Alam ko meron ‘tong lubog dati pero hindi naman ito luma. Itong mga Mercraft, bago ito,” pahayag ni Balilo.

Batay sa isang report mula sa local government unit (LGU) ng munisipalidad ng Polillo, ang bangkang MV Mercraft 2 ay umalis ng isla bandang alas-5:00 ng madaling-araw at patungo ito sa munisipalidad ng Real sa Quezon.

Pasado alas-6:00 ng umaga, ang kapitan nito ay nagbigay ng abandon ship command habang sumiklab na ang sunog sa loob ng bangka. Sinabi pa ni Balilo, ang bangka ay nagsimulang masunog nang tinatayang nasa 1000 yards na ito mula sa Port of Real.

Sa naunang report ni Balilo, nasa tinatayang 6 na pasahero ang dinala sa pinakamalapit na ospital. Aniya pa, hindi naman overloaded ang bangka base sa passenger manifest na hawak nila.

Patuloy pa ang mga awtoridad na nagsasagawa ng search and rescue operations sa lugar. Inaalam na rin nila ang sanhi at pinagmulan ng sunog sa loob ng naturang pampasaherong bangka.

Comelec, security forces: 'Pinas, handa na para sa Halalan 2022

ni Lolet Abania | May 8, 2022

Handang-handa at full alert na ang buong puwersa ng seguridad ng Pilipinas at Commission on Elections (Comelec) para sa Halalan 2022 bukas, Mayo 9, 2022.

Ngayong Linggo, maraming dumalo na mga Comelec commissioners at mga opisyal ng security forces ng bansa sa ginawang walkthrough inspection ng Philippine International Convention Center (PICC), kung saan ang National Board of Canvassers (NBOC) ay nakatakdang mag-convene sa Lunes.

Kabilang sina Comelec Chairman Saidamen Pangarungan, Commissioner George Garcia, Spokesperson Director John Rex Laudiangco, Philippine National Police (PNP) officer-in-charge Vicente Danao Jr., Armed Forces of the Philippines (AFP) Chief Andres Centino, at Philippine Coast Guard (PCG) Commandant Artemio Abu na nakiisa sa naturang inspeksyon.

Sa ginanap na press briefing, tiniyak ni Danao na mayroong 225,000 PNP personnel ang nakakalat at handang magsilbi para siguruhin at i-secure na tama at patas ang magaganap na eleksyon.

Gayundin, inanunsiyo ni Danao ang pagpapatupad ng nationwide total liquor ban, na epektibo ito noon pang Sabado nang gabi, Mayo 7 hanggang Lunes, Mayo 9.

Nagbabala naman ang PNP OIC sa mga susubok na magsagawa pa ng campaign activities ngayon dahil aniya, kanila itong huhulihin.

Binanggit naman ni Centino na ang AFP personnel ay full alert na rin, kabilang ang kanilang naval at air assets na handa na para sa May 9 elections.

“I have reminded our troops deployed all over the country to always remain non-partisan and neutral. And we assure the public that all our troops are on full alert as we have declared this full alert status yesterday. We will be ready with all our resources. Air and naval assets have been made available, and we are at this point- implementing the plans we prepared way before the election campaign,” ani Centino.

Sinabi naman ni Abu na ang Coast Guard ay handa na rin para tiyakin ang pagkakaroon ng ligtas na eleksyon.

“The guiding principle of the Comelec will be to protect the sanctity of the vote by all means and in whatever circumstances. Together with our partner agencies, the PNP, AFP, PCG, DepED, and other government agencies, we are going to pursue this to the end,” pahayag ni Pangarungan.

Katawan ng 5 batang nalunod sa Taal Lake, narekober na – PCG

ni Lolet Abania | May 4, 2022

Natagpuan na lahat ang mga katawan ng limang bata na pinaniniwalaang nalunod matapos na maligo ang mga ito sa Taal Lake, sa Balete, Batangas, kahapon.

Sa isang radio interview kay Captain Vic Acosta, commander ng Philippine Coast Guard (PCG) sa Batangas, sinabi nitong bandang alas-7:45 ngayong umaga ng Miyerkules, narekober ang bangkay ng dalawang bata, habang bandang alas-10:00 ng umaga naman nakita ang isa pang bata. Nasa edad 7 hanggang 12.

“Sa kasamaang-palad wala tayong na-revive,” ani Acosta. “Lahat po ay lifeless na po.”

Ayon pa kay Acosta, tinatayang nasa edad 6 hanggang 8, ang tatlong bata na narekober ngayong araw.

Una nang natagpuan nitong Martes, ang mga katawan ng dalawang batang biktima na sina Sherin Ashtrid Dela Rosa, 8, at Jamie Rose Ann Jacutan, 12.

“Allegedly base sa statement, ‘yung isa biglang nalunod, tapos ‘yung isa tinulungan sagipin hanggang sa lima silang nadisgrasya,” ani Acosta.