100 barko ng China, naispatan sa WPS

ni Mylene Alfonso | April 29, 2023

Mahigit 100 barko ng China ang naispatan ng Philippine Coast Guard (PCG) sa West Philippine Sea (WPS).

Ayon kay Coast Guard spokesperson Commodore Jay Tarriela, isinumite na ng PCG sa

National Task Force West Philippine Sea (NTFWPS) ang ulat kaugnay sa mga barko ng China sa WPS partikular na ang Chinese warship sa Philippines' Exclusive Economic Zone (EEZ).

Bukod pa sa ginagawang agresibong aksyon ng Chinese Coast Guard (CCG) laban sa barko ng PCG.

Nabatid na nakita ng PCG ang mahigit 100 barko ng China sa isinagawang maritime patrols sa WPS noong Abril 18 hanggang 24.

Kabilang sa mga barko ng China ang kanilang Chinese Maritime Militia vessels, People's Liberation Army Navy corvette, at dalawang China Coast Guard vessels.

Sa malapit umano sa Sabina Shoal, 18 na Chinese Maritime Militia vessels, ang nakita.

Hindi umano sumunod ang mga barko ng China na lisanin ang lugar sa kabila ng napakaraming tawag sa radyo.

Sa may Pag-asa Island, apat pang Chinese Maritime Militia vessels, ang nakita na nangingisda sa karagatan na pinaalis ng Philippine vessels.

Sa bisinidad naman ng Julian Felipe Reef, 17 grupo ng mahigit 100 Chinese Maritime Militia vessels ang nakita.

Idineploy ng PCG ang kanilang Rigid Hull Inflatable Boats para sila ay paalisin pero hindi sila sumunod.

Noong Abril 21, 2023, isang Chinese People's Liberation Army (PLAN) Navy vessel na may bow number 549 ang humarang sa PCG vessels sa distansiya ng seven nautical miles mula Pag-asa Island.

Binantaan pa ng Chinese gray ship ang PCG sa radyo na lisanin ang lugar o magkakaproblema sila kapag hindi sila umalis.

At nitong Abril 23, CCG vessels na 5201 at 4202 ang naharang ng PCG sa Ayungin Shoal.

Unang iginiit ni Pangulong Ferdinand Marcos, Jr. na hindi isusuko ng Pilipinas sa China kahit pa ang pinakamaliit na teritoryo ng Pilipinas.

Oil spill sa Oriental Mindoro, kontrolado na — PCG

ni Mylene Alfonso | April 14, 2023

Inanunsyo ng Philippine Coast Guard (PCG) na kontrolado na ang oil spill sa Oriental Mindoro na dulot nang lumubog na barkong MT Princess Empress.

Ito ang inihayag ni PCG Commandant Admiral Artemio Abu sa kanyang pagharap sa isinagawang pulong sa Department of Justice (DOJ) kaugnay sa update ng oil spill.

Sinabi ni Abu na mula sa naunang 23 tagas na nakita ng remotely operated vehicle (ROV) ay 11 tagas na lang ito ngayon at anim ang sumailalim sa ‘bagging operations’ o sinasakluban ng supot ang tagas na siyang sasalo sa sumisirit na langis.

Ipinaliwanag ni Abu na ang apat ay hindi na nilagyan ng bag, dahil bagama’t may tagas pa rin ay wala na aniyang lumalabas na langis, habang ang isa pa ay hindi na nilagyan ng bag dahil hindi magawa ang bagging operations at ‘very slow intermittent leakage’ lamang ito.

Dahil dito, iginiit ni Abu na nakontrol na ang leakage mula sa MT Princess Empress.

“So ibig sabihin we have significantly controlled the leakages from the distressed vessel,” ayon kay Abu.

Pero tiniyak ng opisyal na tuluy-tuloy pa rin ang PCG, mga lokal na pamahalaan at kaukulang mga ahensya sa kanilang mga clean-up operations at preventive measures upang hindi kumalat ang tumagas na langis.

Samantala, umapela naman ang mga mangingisda na payagan na silang pumalaot.

Ferry boat nasunog, 29 patay

ni Jeff Tumbado | March 31, 2023

Tinatayang nasa 29 indibidwal ang kumpirmadong namatay sa pagkasunog ng isang pampasaherong barko sa karagatang sakop ng Basilan nitong Miyerkules ng gabi.

Ayon kay Philippine Coast Guard (PCG) District BARMM Commander Commodore Rejard Marfe, kabilang sa nakita ang mga labi ng 18 biktima sa loob ng nasunog na MV Lady Mary Joy 3.

Nasa sampu naman ang naunang naitalang nasawi na nalunod matapos tumalon mula sa nasusunog na barko.

“As of now, continuous ‘yung pag-search natin sa barko para makita natin kung meron pang cadavers na madi-discover,” pahayag ni Marfe.

“Nalunod 'yung sampu. Ito ‘yung tumalon na walang lifejacket and nalunod,” dagdag ni Marfe.

Sinabi ni Marfe, nasa 230 ang nakaligtas sa trahedya kasama ang mga crew ng barko habang 9 sa mga nakaligtas ang nagtamo ng sugat at kinailangang dalhin sa pagamutan.

Samantala, batay naman sa nakuhang impormasyon ni Basilan Gov. Hadjiman Hataman-Saliman, galing sa Zamboanga City ang MV Lady Mary Joy 3, at papunta sa Sulu nang masunog ito.

Idinagdag niya na batay sa kuwento ng ilang nakaligtas, natutulog sila nang mangyari ang sunog alas-11 ng gabi nang Miyerkules.

Idineklarang naapula ang sunog sa ferry boat alas-7:30 ng umaga ng Huwebes.

Ayon sa imbestigasyon, sinabi umano ng kapitan ng barko na dinala niya ang sasakyan sa Baluk-Maluk Island sa Hadji Muhtamad nang magkaroon ng sunog, para maisalba ang mga pasahero.

Pinaniniwalaan na nagmula sa accommodation area sa second deck ng barko ang sunog.

Hindi naman umano overloaded ang barko na 430-katao ang kapasidad at 205 lang ang pasahero at may 35 crew nang mangyari ang sunog.

Wala ring ulat ng oil spill mula sa barko, ayon sa PCG.

Sa isang pahayag, nagpaabot naman ng pakikiramay si Basilan Rep. Mujiv Hataman sa mga kaanak ng mga nasawi.

Patuloy umano ang isinasagawang paghahanap sa mga posibleng nakaligtas sa trahedya, at maging sa labi ng mga nasawi.

Nakikipag-ugnayan din umano ang tanggapan ng kongresista sa Department of Social Welfare and Development para mabigyan pa ng karagdagang tulong pinansiyal ang mga nakaligtas para sa kanilang gastusin.

"Nakikipag-usap din kami sa mga awtoridad at mga opisyal ng lokal na pamahalaan upang siyasatin kung ano ang puwedeng gawin para maiwasan ang mga ganitong insidente," ani Hataman.