Tropang Giga, swak na sa semifinals

ni Rey Joble @Sports News | Oct. 2, 2024

Walang makakaawat sa isang determinadong TNT Tropang Giga, ang nagtatanggol na kampeon ng PBA Governors’ Cup. Muling tumibay ang tsansa ng Tropang Giga na depensahan ang kanilang titulo matapos magaang na idispatsa ang NLEX Road Warriors, 125-96 sa 2nd game nitong Martes ng gabi sa Ninoy Aquino Stadium.

Gaya nang inaasahan, double-double na laro na naman ang nakumpleto ni dating Best Import Rondae Hollis-Jefferson na nagpakawala ng 35 puntos at 11 rebounds para pangunahan ang Tropang Giga papasok sa semifinal round at samahan dito ang Barangay Ginebra. Bukod kay Hollis-Jefferson, solidong mga laro rin ang ipinakita ng lima pang miyembro ng mga Ka Tropa.

May 19 puntos na naiambag si Rey Nambatac, na muling maglalaro sa semifinal round makalipas ang ilang taon. Isa siya sa mga bagong players na nakuha ng Tropang Giga bago magsimula ang 49th season. Tumipa si Roger Pogoy ng 18 puntos habang double-double din ang nakumpleto ni Calvin Oftana na may 11 puntos at 10 rebounds. May 11 puntos na nalikom si Glenn Khobuntin habang 10 kay JP Erram.

“Two things, by looking at the stats, first our turnovers,” ang sabi ni TNT coach Chot Reyes. “We were among the teams with the fewest turnovers in the elimination round, but in Game 2 we have 16, but now we have 17. That’s too high for us. So that’s something we have to take a look at.” “Number two is our free throw percentage. We just need to make sure that we do a better job making our free throws in the semifinals.”

Converge binura ang 27 na abanse ng SMB, Stockton namayani

ni Rey Joble @Sports News | Oct. 1, 2024

Nagbuhos ng 48 puntos sa 4th quarter ang Converge, kabilang ang makapigil-hiningang, buzzer-beating jumper ni Alec Stockton at manatiling buhay ang kanilang kampanya sa PBA Governors’ Cup matapos maisalba ang 114-112 panalo kontra San Miguel Beer.

Sa harap ng mga nanonood nitong Lunes ng gabi sa 2nd game, isa si Stockton sa 6 na players na tumapos ng double figures, pero higit sa lahat ang pinakaimportanteng jump shot na nagtawid sa FiberXers sa panalo at manatiling humihinga sa torneo.

“We have nothing to lose, we’re down 0-2 and we just kept fighting,” ang sabi ni Stockton. “I’m speechless. But we just didn’t give up.” Dinumog ng kanyang mga kakampi si Stockton matapos pumasok ang initsang jump shot na halos malapit na sa three-point area kasabay ng pagtunog ng buzzer, pero sapat na ito para masungkit ng FiberXers ang pahirapang panalo.

“This is just one. When you think about it, it’s hard to beat this team three straight,” dagdag pa ni Converge coach Franco Atienza. “But we didn’t give up and we’re thinking of one game muna that is this Friday.”

Kinailangan ng FiberXers na magpaulan ng mga puntos at ang 48 puntos ang naging dahilan para mahabol nila ang 27 puntos na kalamangan ng San Miguel. Ibinaon ng Beermen ang FiberXers, 83-56, sa papatapos na bahagi ng 3rd period at tila naghahanda na ang San Miguel na sundan ang Barangay Ginebra papasok sa semifinal round. Pero hindi pa handa ang Converge na isuko ang bandera.

Sa pinagsamang lakas nina Stockton, Justin Arana, import Jalen Jones, Bryan Santos, King Caralipio at Schonny Winston, nagawang makahabol ng FiberXers at nagkaroon ng pagkakataon na matuka ang Beermen sa dulo ng laban sa kabayanihan ng dating star player ng FEU.

Solidong numero na naman ang ibinuhos ni Arana na may double-double performance na 23 puntos at 11 rebounds. May 20 puntos namang naiambag si Stockton habang double-double rin si Jones na may 17 puntos at 14 na rebounds.

Tumapos ng 15 puntos si Santos, lahat ng ito ay nagmula sa three-point area, para painitin ang opensiba ng Converge, habang 11 naman ang naitala ni Caralipio. May 10 namang naidagdag si Winston.

Brownlee walang kupas ang pamamayani, Gin King lumapit sa semis

ni Rey Joble @Sports News | Sep. 30, 2024

Gaya ng dati, muling rumesponde si Justin Brownlee para isalba ang Barangay Ginebra para matakasan ang mahigpit na karibal na si Allen Durham at Meralco Bolts, 104-103, sa PBA Governors’ Cup sa Smart Araneta Coliseum nitong Sabado ng gabi.

Naging balikatan ang labanan gaya ng inaasahan pero gaya ng kanyang nakagawian, muling bumida si Brownlee para isalba ang kanyang koponan.

Sariwa pa sa alaala ng PBA fans ang kabayanihang ginawa ni Brownlee kung saan ipinukol niya ang buzzer-beating three-point shot noong 2016 Governors’ Cup sa unang beses na nagkaharap ang Ginebra at Meralco sa best-of-seven championship series, pero tila nanumbalik sa memorya ng mga taga-Barangay Ginebra ang emosyonal at dramatikong panalong iyon.

Si Brownlee na naman ang siyang gumiya sa kanyang koponan kung saan ang kanyang step back three-point shot sa huling 10 segundo ng laban ang nagbalik trangko para sa Barangay Ginebra. Pero kinailangan ng Gin Kings ang solidong depensa sa huling opensiba ng Bolts bago tuluyang maitakas ang panalo.

Dahil sa panalo, lumapit ang Ginebra patungo sa Final 4 matapos maiposte ang 2-0 na kalamangan sa best-of-five series. Nais isara ng Ginebra ang serye sa Lunes kung saan tangka nilang walisin ang Meralco.

“We jumped on to the broad shoulders of Justin. He had done that many times in the past,” ang sabi ni Barangay Ginebra coach Tim Cone. “But we also have some realization that we can’t do that every night. We need to do better in our next game. But tonight, it’s Justin’s night.” Kumana ng 39 puntos si Brownlee, kabilang dito ang isang three-point shot.