Beermen tumungga ng panablang panalo kontra Gin Kings

ni Rey Joble @Sports | Oct. 17, 2024

Photo: Si eight-time Most Valuable June Mar Fajardo at six-time champion na si Justin Brownlee - PBA PH

Nalagpasan ng San Miguel Beer ang isa na namang eksplosibong laro ni Justin Brownlee sa pamamagitan ng mas balanseng produksyon para iposte ang 131-121 panalo kontra Barangay Ginebra at itabla ang serye ng kanilang PBA Governors’ Cup best-of-seven semifinals series sa Smart Araneta Coliseum Miyerkules ng gabi.

Anim na players ang naglagak ng double figures para sa Beermen, tatlo rito ang pumuntos ng 20 o higit pa, dahilan para mas manaig ang pinagsamang ambagan ng mga puntos para malusutan ang 49 na naitala ng six-time champion na si Brownlee.

Pinakasolidong ipinakita ay si eight-time Most Valuable Player June Mar Fajardo na tumipa ng 29 puntos bukod sa nahakot na 16 na rebounds.

Double-double rin ang kontribusyon ng import ng San Miguel na si Ejimofor Anosike na may 27 puntos at 11rebounds. May 20 puntos ring naidagdag si CJ Perez habang tig-15 naman sina Marcio Lassiter at Don Trollano at 14 naman ang ibinigay ni Terrence Romeo.

Dahil sa panalo ng Beermen, muling naitabla ang serye na ngayon ay 2-2 patungo sa krusyal na engkwentro ngayong Biyernes na gaganapin sa Ynares Center sa Antipolo. “Ang ganda ng adjustments namin.

Hinahanap ako ng mga teammates ko at pinapasahan ako,” ang sabi ni Fajardo na nagpasok ng 12 sa kanyang 15 tira sa laro. Pero nag-step up talaga yung buong team. “

Rain or Shine huminga pa, inilusot ang Game 3 kontra TNT

ni Rey Joble @Sports | Oct. 14, 2024

Solidong kinumpleto ni Aaron Fuller ang laro kung saan nagbuhos siya ng 26 puntos at 16 na rebounds, pero higit na mas naging importante ang kanyang three-point play sa dulo ng laro. Photo: PBA PH

Humihinga pa at tila walang planong sumuko ang Rain or Shine Elasto Painters at nitong Linggo ng gabi, ipinakita ng mga bataan ni coach Yeng Guiao na kaya nilang makipagsabayan sa nagtatanggol na kampeon na TNT Tropang Giga.

Nawala man ang 15 puntos na kalamangan, hindi sinayang ng import na si Aaron Fuller ang pagkakataon para pamunuan ang Elasto Painters sa makapigil-hiningang 110-109 panalo sa City of Dasmarinas Arena sa Cavite.

Kinumpleto ni Fuller ang solidong laro kung saan nagbuhos siya ng 26 puntos at 16 na rebounds, pero higit importante ang kanyang three-point play sa dulo ng laro na siyang nagtawid sa Rain or Shien tungo sa panalo. Ito ang unang panalo ng Elasto Painters kontra Tropang Giga sa kanilang best-of-seven semis series kung saan lamang pa rin ang TNT, 2-1.

“We were able to hang in there against a strong team with a great import,” ang sabi ni Rain or Shine coach Yeng Guiao. “Poy Erram played one of his best games and we were able to survive that. Every game is a learning process, learning experience for us.

Mabuti nailusot namin ito kasi ayaw naming ma-sweep ulit katulad yung nangyari sa nakaraang series against San Miguel.” May pagkakataong maitabla ng Elasto Painters ang serye na magbabalik sa Miyerkules kung saan inaasinta nila ang panalo sa Game 4 sa Smart Araneta Coliseum.

“We’ll just have to keep on improving from what we did today,” dagdag pa ni Fuller. Para naman kay Guiao, isa itong magandang simula para mapatibay ang kanilang tsansa na makapasok sa finals.

“After that Game 2 loss, ang iniisip lang namin, manalo lang muna ng isa. Mahirap naming pangarapin mong makapunta sa finals na hindi ka pa nananalo ng isa,” dagdag pa ni Guiao.

“Nakita namin yung mga mali namin sa video and I’d like to give credit to my assistant coaches for putting together in helping out the videos and formulating game plans.”

Beermen tinablahan ang Gin Kings, Romeo rumesbak

ni Rey Joble @Sports | Oct. 12, 2024

Photo: PBA PH

Hindi pa handa si Terrence Romeo na ibigay ang trono kay Rhon Jay Abarrientos bilang isa sa pinakamagaling na point guards sa Philippine Basketball Association. Nagtala ng 26 puntos si Romeo, dating scoring champion ng liga, kabilang na rito ang siyam na puntos sa overtime at pangunahan ang San Miguel Beer sa 131-125 panalo kontra Ginebra sa Game 2 ng PBA Governors’ Cup best-of-seven semifinals series sa Smart Araneta Coliseum nitong Biyernes ng gabi.

Dalawa sa mga importanteng ipinukol ni Romeo ay ang kanyang three-point shot na sinundan pa ng four-point basket na siyang nagtulak para sa Beermen na maitabla ang serye. Hangad ng Beermen na muling makasungkit ng panalo at tuluyang umabante sa serye sa Linggo na gaganapin sa Dasmarinas, Cavite.

“Stay ready lang ako,” ang sabi ni Romeo. “May experience na rin naman ako so alam ko yung pakiramdam ng playoffs, ng semis. Alam ko yung pakiramdam kung paano mag-perform. Hindi naman nagbabago yung hardwork ko. Kaya hindi rin bumababa yung kumpiyansa ko sa mga ganung moments.”

Natabunan ng magandang laro ni Romeo ang matamlay na ipinakita ni Abarrientos na may naiambag lamang na apat na puntos para sa Ginebra. Bukod kay Romeo, todo kayod rin si EJ Anosike na may ibinuhos na 35 puntos habang 26 puntos naman ang naidagdag ni CJ Perez.

The Scores (OT): SAN MIGUEL 131 – Anosike 35, Perez 28, Romeo 26, Fajardo 23, Lassiter 12, Cruz 5, Tautuaa 2, Ross 0, Rosales 0, Trollano 0, Enciso 0, Manuel 0 GINEBRA 125 – Brownlee 39, J.Aguilar 29, Thompson 16, Ahanmisi 15, Holt 14, Abarrientos 4, Tenorio 3, Cu 2, Devance 2, Pinto 1, Pessumal 0, Adamos 0 QUARTERS : 22-24, 51-47, 85-76, 110-110, 131-125