Bagong Pasig Market: Tahanan ng kabuhayan at pag-asa para sa lahat

ni Chit Luna @News | Apr. 14, 2025

PASIG CITY — Dito sa puso ng Pasig umuugong ang buhay.

Sa loob ng maraming taon, ang Pasig Public Market ang takbuhan ng mga mamimili at pangunahing sentro ng kalakalan. Ngunit sa kabila ng laki at halaga nito, matagal na rin itong naiwan ng panahon.

Marumi, mainit, at masikip—ito ang karaniwang reklamo ng mga negosyante at mamimili. Sa halip na kaginhawaan, abala at disorganisasyon ang kanilang nararanasan.

Isinusulong ni Ate Sarah ang PWD Empowerment Program—isang makabagong inisyatibong nagbibigay ng pantay na oportunidad.

Kaya't naniniwala si Ate Sarah Discaya na panahon na para bigyan ito ng bagong anyo.

Sa ilalim ng programang Serbisyong Ate Sarah, isusulong ang modernisasyon ng Pasig Public Market.

Gagawing mas maayos, maaliwalas, at maginhawa ang palengke para sa bawat Pasigueño.

Para kay Ate Sarah, ang palengke ay tahanan ng kabuhayan at pangarap ng maraming pamilya.

Kabilang sa mga pagbabagong inaasahan ang pagpapaluwag ng mga pasilyo, pagpapaayos ng drainage at basura at pagtatayo ng maayos na terminal.

Lahat ng ito ay bahagi ng pagbibigay respeto at dignidad sa mga tao ng palengke.

Ngunit higit pa sa pisikal na pagbabago, ang bagong Pasig Market ay magiging simbolo ng makataong pamumuno—ang mamamayan ang tunay na sentro ng serbisyo. Dito matututo, lalago, at magsisimula ng bagong yugto ng kabuhayan.

Sa Pasig, bawat isa ay may lugar sa pag-asenso. At sa muling pagbangon ng Pasig Market, muling maipapakita na ang tunay na pag-unlad ay ramdam sa araw-araw.

Sunog, sumiklab sa Pasig City Hall

ni Eli San Miguel - Trainee @News | November 23, 2023

Sumiklab ang sunog sa ika-apat na palapag ng Pasig City Hall ngayong Huwebes, ayon sa Bureau of Fire Protection (BFP).

Ayon sa BFP, nagsimula ang sunog ng alas-9:18 ng umaga at idineklara itong fire out alas-9:26 ng umaga.

Sa isang abiso ng pamahalaang lungsod, ipinahayag na itinigil ang lahat ng operasyon sa city hall dahil patuloy pa ring lumalabas ang usok mula sa gusali kahit na idineklara nang fire out.

"Ang mga non-essential personnel ay pinayuhan nang umuwi, at ang mga essential personnel para sa pag-manage ng insidente na lamang ang required na manatili sa city hall," saad dito.

Ipinag-utos ni Mayor Vico Sotto ito upang tiyakin ang kaligtasan ng lahat ng city government workers.

Patuloy na iniimbestigahan ang sanhi ng sunog at ang tinatayang pinsalang naidulot nito sa mga ari-arian.

Senior citizen, sapul ng sunog sa Pasig City

ni Lolet Abania | May 15, 2022

Sumiklab ang sunog sa isang residential area sa Pasig City ngayong Linggo ng umaga.

Batay sa report ng Bureau of Fire Protection (BFP), nagsimula ang sunog bandang alas-10:29 ng umaga sa kahabaan ng Baltazar St., Barangay Pinagbuhatan at umabot sa ikatlong alarma ng alas-10:54 ng umaga.

Alas-11:05 ng umaga idineklara ng BFP na under control ang sunog, habang tuluyang naapula ang apoy o fire out ng alas-11:48 ng umaga.

Isang senior citizen naman ang naiulat na bahagyang nasaktan sa insidente. Patuloy na iniimbestigahan ng mga awtoridad ang naging sanhi habang inaalam na rin ang halaga ng pinsala matapos ang sunog.