Mayor Vico humingi ng paumanhin sa naganap na gulo sa pila ng TUPAD program sa Pasig City

ni Jasmin Joy Evangelista | February 23, 2022

Humingi ng paumanhin si Pasig City Mayor Vico Sotto matapos na mauwi sa tulakan, siksikan, at balyahan ang pila sa Tulong Panghanapbuhay sa Ating Disadvantaged/Displaced Workers (TUPAD) program ng Department of Labor and Employment sa Rainforest Park at Plaza Bonifacio.

Sa report ng "24 Oras," ang mga aplikante ay nagbabalyahan at nagsisigawan habang nakikiusap ang mga organizers na huwag magtulakan upang maiwasan ang stampede.

Ang ilan ay hindi rin maayos na nakasuot ng face mask.

"Hindi namin inaasahan na ganoon. Sa kadamihan ng tao, nagkatulakan na sila," pahayag ng isang aplikante.

Sa isang pahayag, humingi ng paumanhin si Mayor Vico.

"Ako po ay humihingi ng paumanhin sa panandaliang kaguluhan na nangyari sa dalawang venue ng LGU-TUPAD sign up natin," aniya.

"Ayon sa report ng Peace and Order Department, maayos ang pila noong nag-umpisa ito kaninang umaga. Ngunit sa Plaza Bonifacio ay biglang may sumigaw ng, 'Bara-barangay ang pila!' kaya nagkagulo-gulo ang pilahan. Sa Rainforest Park naman ay may tumulak ng isang gate kaya nag-unahan ang mga tao papasok ng venue noong bumukas ito," dagdag niya.

Ang TUPAD program ay isang community-based package ng tulong kung saan nagbibigay ito ng trabaho para sa mga displaced workers, underemployed, at self employed workers.

Driver, namatay dahil sa COVID-19... Vico Sotto, walang sintomas, naka-quarantine

ni Ronalyn Seminiano Reonico | March 15, 2021

Kasalukuyang naka-quarantine si Pasig City Mayor Vico Sotto matapos mamatay dahil sa COVID-19 ang kanyang driver noong nakaraang Biyernes.

Ayon kay Mayor Vico, huli siyang na-expose sa kanyang driver noong Miyerkules bago ito dalhin sa ospital matapos makaranas ng mga sintomas ng COVID-19.

Pahayag ng Pasig mayor sa kanyang Facebook page, "Following DOH protocol, I will be in QUARANTINE until MARCH 24 (2 weeks from when he last drove for me).

“I will continue working via Zoom and phone.”

Ayon din kay Vico, na-PCR test na silang mga nagkaroon ng close contacts sa kanyang driver at mamayang hapon ang resulta.

Aniya pa, “‘Wag mag-alala, okay naman po kaming lahat... walang sintomas.”

Christmas gifts sa Pasig, inihahatid sa bahay

ni Lolet Abania | December 13, 2020

Nagbabahay-bahay na ng pamimigay ng pamaskong handog sa bawat pamilya ang lokal na pamahalaan ng Pasig City. Ayon sa Pasig City information office, sa ginawang distribusyon, hinihingi lamang nila ang kailangang PasigPass QR code sa bawat pamilyang residente ng siyudad at proof of identity.

"Kung may tatlong pamilya sa isang bahay, tatlong PasigPass QR code (isa kada pamilya) ang kailangang ipa-scan, at tatlong Pamaskong Handog packs ang matatanggap," ayon sa Facebook post ng opisina ng Pasig City.

“Ang simpleng handog na ito ay taos-pusong pasasalamat sa inyong pakikiisa sa mga program ng lokal na pamahalaan at sa ating patuloy na laban kontra COVID-19," sabi ni Mayor Vico Sotto.

Matatandaang sinimulan ang programang ito ng lungsod noong December 5, kung saan maaaring magpunta sa barangay hall para makapagparehistro at makapagpa-print ng PasigPass QR code o bisitahin na lamang ang kanilang website.

Sa ngayon, araw-araw nang naglalabas ng iskedyul ng pamamahagi ng Christmas packs na may kasamang grocery items sa Pasig City. Nakahiwalay naman ang pamimigay sa mga condominium sa nasabing lugar.