Unified vaccination card, isinusulong ng mga MM mayors

ni Ronalyn Seminiano Reonico | August 14, 2021

Nakikipag-ugnayan ang mga Metro Manila mayors sa Department of Information and Communications Technology (DICT) para sa isinusulong na unified vaccination card.

Ayon kay Parañaque Mayor Edwin Olivarez sa isang panayam, isinumite na umano ng mga lokal na pamahalaan sa DICT ang listahan ng mga bakunado nang residente para sa naturang vaccine card project.

Aniya, “Napag-usapan po namin ‘yan sa Metro Manila Council. In fact, ‘yung aming mga IT ay patuloy na nagda-download na po sa DICT para sa unified vaccination card. So, tuluy-tuloy po na ginagawa ‘yan ng LGU rito sa Metro Manila."

Aniya, bago matapos ang buwan ng Agosto ay inaasahang maisusumite na rin ang lahat ng listahan ng mga LGUs.

Saad pa ni Olivarez, “Lahat naman po kaming LGUs, may system kami… I-download lang ‘yan sa DICT para sa concentration ng data para roon sa unified vaccination card."

Samantala, noong Huwebes pa inatasan ng DICT ang mga LGUs na magsumite ng listahan ng mga bakunado nang residente na kanilang nasasakupan at ayon kay Secretary Gregorio “Gringo” B. Honasan II, nakikipag-ugnayan na rin ang ahensiya sa Department of Health para sa vaccine certificate na ibibigay sa mga nakakumpleto na ng bakuna laban sa COVID-19.

Gimik para sa bakuna, gagawing uniform sa lahat ng siyudad

ni Mary Gutierrez Almirañez | May 31, 2021

Nagkasundo ang 17 Metro Manila mayors na panatilihin sa general community quarantine (GCQ) ang buong NCR Plus sa pagtatapos ng umiiral na heightened GCQ ngayong araw, May 31.

Ayon kay Metro Manila Council (MMC) Chairman at Parañaque Mayor Edwin Olivarez, "Ang recommendation ng Metro Manila Council ay GCQ pa rin po tayo pero may kaunting pagbubukas ng kaunting negosyo."

Paliwanag niya, "'Di po tayo puwede mag-relax. Alam po nating bumababa ang cases at utilization ng healthcare pero ‘di po tayo kailangang mag-relax para totally ma-contain ang COVID na ito."

Sa ngayon ay kani-kanyang pakulo na ang bawat local government units (LGU) upang mahikayat ang publiko na magpabakuna kontra COVID-19.

"Ang ibang LGU, nag-umpisa nang magpa-raffle para ma-encourage... Pinag-uusapan po para uniform ang policy," sabi pa ni Olivarez.

Kaugnay nito, inaasahan na ring magsisimula ngayong Hunyo ang vaccination rollout sa mahigit 30 million economic frontliners at essential workers na nasa ilalim ng A4 priority list.

Giit pa ni Department of Labor and Employment (DOLE) Assistant Secretary Ma. Teresita Cujueco, "Isinama na ang private workers who go out of their residences, who physically have to report to work, all government employees. Nandu’n din po ang informal sector and self-employed who go out of their residences."

Sa kabuuang bilang nama’y 5,120,023 indibidwal na ang mga nabakunahan kontra COVID-19. Kabilang dito ang 1,189,353 na fully vaccinated at ang 3,930,670 na nabakunahan ng unang dose.

MM Mayors, ‘di pabor sa ‘no vaccine, no entry’ policy

ni Mary Gutierrez Almirañez | May 19, 2021

Naniniwala ang Metro Manila Council (MMC) na hindi pa panahon upang ipatupad ang ‘vaccine pass’ o ang ‘no vaccine, no entry’ sa mga indoor establishments, batay sa panayam kay MMC Chairman at Parañaque Mayor Edwin Olivarez ngayong umaga, May 19.

Aniya, "Very unfair naman po ‘yan na bibigyan natin ng policy na ‘yun lang makakapasok sa indoors, sa ating mga restaurant, at iba pang mga establishment ay ‘yung mga nabigyan ng vaccination pass."

Dagdag niya, "Sa amin sa MMC, parang hindi pa ho tama ang panahon ngayon po para i-implement ‘yang policy na ‘yan."

Sumang-ayon naman sa kanya ang 17 Metro Manila Mayors na binubuo ng MMC.

Matatandaang hindi rin pabor ang Department of Health (DOH) at Department of Trade and Industry (DTI) sa ganitong panukala dahil kaunti pa lamang ang bilang ng mga nababakunahan kontra COVID-19 sa bansa.

Gayunman, nilinaw ni Vaccine Czar Carlito Galvez, Jr. na magsisimula nang umarangkada ang mabilis na vaccination rollout sapagkat narito na ang mga bakuna, kung saan tina-target nila ang 500,000 bakunado kada araw.