Dating village president, nagbanta.. Gulo sa Multinational Village sa Parañaque, nakaamba

ni Chit Luna @News | September 2, 2024

Pangamba at takot ang umiiral ngayon sa mga residente ng Multinational Village makaraang makarating sa kanila ang balitang manggugulo umano ang kanilang dating village president at mga opisyales ng asosasyon.

Sa panayam kay Atty. Phil Ephraim Elgo, may perpetual disqualification na kay Arnel Gacutan, ang dating presidente ng Multinational Village Homeowners Association Inc. (MVHAI) kasama ng kanyang mga opisyales ng 2019 board.

Kaya naman apela nila rito, respetuhin ang desisyon ng hukuman. Naglabas na ng pinal na desisyon ang Human Settlements Adjudication Commission (HSAC) na hindi na maaari pang maging opisyales ng village association si Gacutan at ang kanyang mga kasamahan.

Bukod pa rito, napawalang bisa rin ng HSAC at ng Court of Appeals ang pagkakahalal kay Gacutan sampu ng kanyang mga kasamahan noong 2019 matapos na mapag-alaman na gumamit ito ng hindi ratipikado at kwestyunableng bylaws ng asosasyon.

Ayon sa mga concerned homeowners, sa panahon ni Gacutan naglipana ang illegal Chinese migrants sa nasabing lugar kaya't kanilang pinangangambahan na sa kanyang pagbabalik ay muling dadami ang mga ito.

Ayon pa sa mga residente, sa ilalim umano ni Gacutan sumulpot ang mga Chinese businesses sa Multinational Village na pinamamahayan ng mga illegal immigrants mula sa Mainland China.

Sa nakaraang raid ng Bureau of Immigration, umabot sa 300 illegal migrants ang nasakote sa Multinational Village. Kaya naman noong nakaraang eleksyon, nanalo via majority vote ang Filipino businessman na si Julio Templonuevo bilang presidente ng MVHAI.

Apela ng mga taga-Multinational Village sa kanilang dating presidente, respetuhin ang desisyon ng korte na nagpataw sa kanya ng perpetual disqualification from holding office.

5 lungsod sa Metro Manila, bibigyan ng Sputnik V

ni Mary Gutierrez Almirañez | May 2, 2021

Ipamamahagi na sa 5 lungsod sa Metro Manila ang bakunang Sputnik V COVID-19 vaccines na nakaimbak sa MetroPac cold storage facility ng Marikina City, ayon kay Department of Health (DOH) Director Napoleon Arevalo.

Kabilang sa mabibigyan ay ang mga lungsod ng Manila, Makati, Taguig, Parañaque at Muntinlupa na may negative 18 degree Celsius cold storage facility na siyang requirement para hindi masira ang bakuna.

Matatandaang dumating kahapon ang initial 15,000 doses ng Sputnik V ng Gamaleya Research Institute at inaasahan namang masusundan ito ng 485,000 doses ngayong buwan.

3 tulak, nanlaban, patay sa Parañaque at Pasay

ni Mary Gutierrez Almirañez | April 12, 2021

Tatlong drug pusher ang patay sa magkasunod na buy-bust operation na isinagawa sa Pasay at Parañaque nitong weekend, kung saan mahigit P81.6 milyong halaga ng shabu na nakalagay sa Chinese tea bag ang nakumpiska ng mga awtoridad.

Ayon kay Metro Manila Police Chief Vicente Danao, nakipagtransaksiyon sila kay alyas Richard sa West Service Road, Barangay Sun Valley sa Parañaque nitong Sabado nang gabi, subalit nang makakutob na pulis ang katransaksiyon ay nagsimula na itong magpaputok ng baril.

Tinatayang 5 kilo ng shabu na nagkakahalagang P43 milyon ang nakumpiska rito.

Nagpatuloy pa ang operasyon ng mga awtoridad hanggang Linggo nang madaling-araw, kung saan 2 tulak ang kasunod na namatay sa C5 Extension, Pasay Road.

Nakuha sa kanila ang 7 kilo ng shabu na may halagang P47.6 milyon. Kinilala rin sila bilang sina alyas Domeng at alyas Rey na nanlaban din umano kaya nauwi sa madugong transaksiyon ang naganap na buy-bust operation.

Paliwanag naman ni Chief Danao, hindi parte ng plano ang pagpatay sa 3 drug suspek ngunit kailangan umanong gawin upang protektahan ang buhay ng mga pulis at mga sibilyan.

Dagdag pa niya, kilalang drug pusher sa kanilang lugar ang mga suspek. Nanggagaling pa umano ang mga droga mula sa Chinese supplier at mayroon ding Pinoy contact na involved sa distribusyon.