Nilatag ng Duterte administration... Paggamit ng nuclear energy, tuloy sa termino ni BBM – DOE

ni Zel Fernandez | May 14, 2022

Sa pagpasok ng bagong administrasyon, naniniwala ang Department of Energy na mas lalakas pa umano ang pagsasabuhay ng nuclear energy sa bansa, makaraang mailatag nang maayos ng Duterte administration ang planong paliwigin ang paggamit nito sa Pilipinas.

Sa pahayag ni Energy Undersecretary Gerardo Erguiza, Jr. sa naganap na Laging Handa briefing, inaasahan umano ng ahensiya na tututukan ng susunod na mamumuno sa bansa ang paggamit ng alternative energy sources, kabilang na ang nuclear energy.

Aniya, naging maganda ang paglalatag ni Pangulong Rodrigo Duterte sa balangkas ng nuclear energy at paniniyak ni Erquiza, magiging maganda pa ang tatahakin ng naturang inisyatibo sa nalalapit na pamamahala ni presumptive president Ferdinand “Bongbong” Marcos, Jr. sa anim na taong termino nito.

Gayundin, tiniyak ni Erquiza na pasok umano ang tinatawag na constant factors standards ng energy plan sa bansa batay sa security, reliability, at sustainability, maging ang affordability aniya nito.

Giit ni Erquiza, kaakibat din nito ang pagsunod sa global direction na clean energy at decarbonization.

245 insidente ng vote-buying sa 2022 elections, nakumpirma — Año

ni Zel Fernandez | May 12, 2022

Tinatayang aabot sa 245 insidente ng vote-buying ang naitala umano mula Enero 1 hanggang Mayo 9 ngayong taon kaugnay ng nakaraang 2022 National and Local Elections sa bansa.

Pagbabahagi ni DILG Secretary Eduardo Año kay Pangulong Rodrigo Duterte, 25 sa mga naitalang insidente ay nakuhanan ng ebidensiya at validated na rin.

Batay sa ulat, sa kasalukuyan ay dalawa (2) umano sa mga kaso ng kinumpirmang vote-buying ay sumasailalim na sa imbestigasyon; ang apat (4) ay nai-refer na sa prosecution office, habang ang isa (1) naman ay nakasampa na sa korte.

Kabilang umano sa mga lugar na naitalang nagkaroon ng vote-buying ay ang

Ilocos Region (Region I) , Central Luzon (Region III), at Central Visayas (Region VII) .

Anang kalihim, umabot umano sa 41 indibidwal ang natukoy na suspek sa mga insidenteng ito.

Samantala, 28 naman sa mga ito aniya ang naaresto na, habang nasa 13 pa ang kasalukuyan nang pinaghahahanap ng mga awtoridad.

Para sa next administration... Presidential transition team, binuo – Palasyo

ni Lolet Abania | May 12, 2022

Bumuo ang administrasyong Duterte ng isang transition committee na magtitiyak para sa maayos na paglilipat ng kapangyarihan o transfer of power, bago sumapit ang Hunyo 30.

Sa Talk to the People na ipinalabas ngayong Huwebes nang umaga, sinabi ni Executive Secretary Salvador Medialdea na nag-isyu si Pangulong Rodrigo Duterte ng Administrative Order 47, para sa paglikha ng Presidential Transition Committee (PTC).

“The PTC will oversee the implementation of the transition activities of the entire government and see to it that delivery of services to the public remains unhampered,” paliwanag ni Medialdea.

Ayon kay Medialdea, nakasaad din sa AO ang isang direktiba para sa lahat ng mga departamento, bureau, at instrumentalities ng gobyerno na bumuo ng kanilang sariling internal transition committees.

Si Medialdea ang magsisilbing chairperson ng komite.

Kabilang sa kanilang mga miyembro ay sina Department of Foreign Affairs (DFA) Secretary Teodoro Locsin Jr., Department of Finance (DoF) Secretary Carlos Dominguez III, Department of Budget and Management (DBM) Undersecretary Tina Rose Marie Canda, at Socioeconomic Planning Secretary at National Economic and Development Authority (NEDA) chief Karl Kendrick Chua.

“We will work closely with the representatives of the incoming administration to ensure a peaceful and orderly transfer of power,” ani Medialdea.

Base sa unofficial count, parehong sina presidential candidate Ferdinand “Bongbong” Marcos Jr. at kanyang running mate, vice presidential candidate Sara Duterte, ang nangunguna sa katatapos na 2022 elections, na may mahigit sa 98% ng election returns na naipadala na sa Commission on Elections (Comelec).