73 Pinoy sa India na positibo sa COVID-19, bawal umuwi

ni Ronalyn Seminiano Reonico | May 2, 2021

Pauuwiin na ang mga Pinoy sa India na nais bumalik sa Pilipinas kapag muli nang binuksan ang mga commercial flights at kapag inalis na ang mga ipinatupad na travel ban, ayon sa ambassador sa New Delhi ngayong Linggo.

Una nang ipinagbawal ang pagdating sa bansa ng mga manggagaling sa India dahil sa paglobo ng kaso ng COVID-19 doon. Sa teleradyo interview kay Ambassador Ramon Bagatsing, Jr., aniya ay 73 na ang mga Pilipinong nagpositibo sa COVID-19 sa India.

Aniya, “Ang report na sa amin is 73… it is all over India. India is very, very huge… 73 po ang naka-record sa amin but most of them… sa aking balita, wala pa namang ganu’n kaseryoso maliban lang sa dalawang nasawi.” Ayon din kay Bagatsing, dahil sa mga ipinatupad na travel ban at walang direct flights mula sa India papuntang Pilipinas, hindi pa mapapauwi ang mga Pilipino.

Aniya, “No matter how much we want to come up with the repatriation flight, it’s extremely difficult. Logistically difficult dahil wala ngang flights na papapasukin. At ngayon, nag-order ang gobyerno natin na bawal ang India, we have to follow that. Bagama’t Filipino citizen ito, we have to follow that.” Hindi rin naman daw ganu’n karami ang mga Pinoy sa India na nais nang umuwi sa Pilipinas.

Saad ni Bagatsing, “Hindi pa naman ganu’n karami. Although, isang Pilipinong gustong umuwi, kinakailangang tulungan natin. But on the logistic side, we need at least 150 passengers to make it viable. "Sabi ni (Foreign Affairs) Secretary (Teodoro) Locsin, habang 'di pa puwede 'yan, siguro 'pag June or middle of the month, 'pag medyo okay na. But otherwise, we wait until the commercial flights to resume and then we can do that."

Samantala, noong Sabado, nakapagtala ang India ng highest record na mahigit sa 400,000 kaso ng COVID-19 sa isang araw lang. Sa kabuuang bilang, umabot na sa mahigit 19.5 million cases ang naitala sa India at higit 211,000 ang mga pumanaw.

Balik-iskul na rin ang mga bata… No face mask sa labas ng bahay, puwede na sa Israel

ni Ronalyn Seminiano Reonico | April 19, 2021

Maaari nang hindi magsuot ng face mask sa mga outdoor areas sa Israel dahil sa patuloy na pagbaba ng kaso ng COVID-19 sa naturang bansa at tinatayang aabot na rin sa 81% ng mga 16-anyos pataas na mamamayan ang nakatanggap na ng second dose ng Pfizer-BioNtech COVID-19 vaccine.

Ayon sa Health Ministry ng Israel, limitado pa rin ang pagpasok ng mga banyaga at ang mga hindi pa nababakunahang Israeli na galing sa ibang bansa ay kailangang sumailalim sa self-isolation.

Pahayag naman ni Prime Minister Benjamin Netanyahu, "We are leading the world right now when it comes to emerging from the coronavirus. (But) we have still not finished with the coronavirus. It can return."

Samantala, sa mga indoor public places, required pa rin ang pagsusuot ng face mask. Balik-eskuwelahan na rin ang mga estudyante at mahigpit na ipinatutupad ang social distancing.

Saad ni Health Ministry Official Sharon Alroy-Preis, "This is still a non-vaccinated population (children under the age of 16) that we want to safeguard."

57.17 M kaso ng COVID-19, naitala sa buong mundo

ni Thea Janica Teh | November 21, 2020

Tinatayang nasa 57.17 milyon na ang bilang ng kaso ng COVID-19 sa buong mundo nitong Biyernes at 1,365,111 dito ang namatay na, ayon sa tally ng Reuters.

Ang mga naimpeksiyon ay mula sa 210 bansa kabilang ang China kung saan unang nagkaroon ng kaso noong Disyembre, 2019.

Nangunguna ang US sa may pinakamataas na bilang na 11,737,129 kaso at 252,493 ang namatay. Sinundan naman ito ng India sa 9,004,365 kaso at 132,162 ang namatay; Brazil sa 5,981,767 kaso at 168,061 ang namatay; France sa 2,086,288 kaso at 47,127 ang namatay at Russia sa 2,039,926 kaso at 35,311 ang namatay.

Samantala, nakapagtala naman ang Pilipinas nitong Biyernes ng kabuuang 415,067 bilang ng kaso ng COVID-19 at 8,025 dito ang namatay.