Robredo hiniling sa Comelec na payagang magpatuloy ang kanyang pandemic efforts sa campaign period

ni Jasmin Joy Evangelista | January 26, 2022

Ire-review ng Commission on Elections (Comelec) ang request ni Vice President Leni Robredo na ipagpatuloy ang kanyang pandemic initiatives sa kasagsagan ng campaign period.

Ayon kay Comelec spokesperson James Jimenez, ie-evaluate pa ng poll body kung ang pandemic response efforts na pinangungunahan ni Robredo ay para mapunan ang pangangailangan ng mga mamamayan.

“That is still being evaluated, if I am not mistaken. The law department has to evaluate the request first to see if it fulfills a humanitarian need. Normally exemptions to election bans can be granted on humanitarian grounds to see whether or not kailangan talaga siya (it is really needed or not), so it will be along those lines,” ani Jimenez.

Pormal na nag-request sa Comelec si Robredo upang bigyang-pahintulot ang pandemic efforts ng Office of the Vice President kabilang ang Swab Cab, Bayanihan E-Konsulta, at Vaccine Express na magpatuloy kahit panahon ng kampanyahan para sa national candidates.

Sa ilalim ng Section 13 ng Comelec Resolution No. 10747, sinasabi rito na “candidates are required to secure a certificate of exception for projects, activities, and programs of social welfare projects and services”.

Noong nakaraang eleksiyon, exempted ang disaster relief operations sa kautusang ito, ayon kay Jimenez.

Sa pagtugon sa COVID-19 pandemic.. Kung nagkulang ako, sorry — P-Duterte

ni Lolet Abania | September 8, 2021

Ipinahayag ni Pangulo Rodrigo Duterte na ginagawa niya ang lahat para matugunan ang problema sa pandemya ng COVID-19 sa bansa habang humingi ito ng paumanhin para sa iba na sa tingin nila ay nagkukulang siya.

“Sabihin ko sa inyo, iyong oath of office ko, talagang tinupad ko. Kung sabihin ninyo [na] ako ang nagkulang, eh sorry. Ginawa ko ang lahat ko,” ani P-Duterte sa isang taped address na ipinalabas nitong Miyerkules nang umaga. “Kung ang lahat ko ay kulang pa, patawad po. ‘Yun lang talaga ang kaya ko,” sabi pa ng Pangulo.

Umapela naman si Pangulong Duterte sa mga healthcare workers na dagdagan ang kanilang pasensiya hinggil sa pagkaantala ng pagre-release ng mga allowances na para sa kanila sa gitna ng pandemya, aniya ang kanilang benepisyo ay agad na ibibigay kapag na-secure na ng gobyerno ang pondo para rito.

“Gusto ko ring ipaabot sa health workers na alam mo sa totoo lang, kung may pera lang talaga, hindi namin pigilan, ibigay namin lahat ‘yan total anuhin namin ang pera sa kamay namin?” saad ng Pangulo.

“Give us time to adjust the finances because we had to collate whatever was left or available under Bayanihan 1 and 2 [laws]. Kaunting pag-unawa po kasi kung meron talaga, bakit hindi namin ibigay?” dagdag ni P-Duterte.

Aminado naman si Department of Health Secretary Francisco Duque III, na naroon din sa briefing, na ang pamahalaan ay patuloy na naghahanap ng pondo para sa meals, accommodation and transportation (MAT) allowances ng mga healthcare workers sa gitna ng COVID-19 pandemic.

“The needed MAT allowance, the DBM and DOH are currently looking for funds for these benefits so we can grant them to health workers in both public and private hospitals,” sabi ni Duque.

Ayon kay Duque, mula sa Setyembre 2020 hanggang Hunyo ngayong taon, nakapag-release na ang gobyerno ng P14.3 bilyon halaga ng benepisyo para sa mga health workers.

Simula noon, sinabi ng kalihim na ang pamahalaan ay nakapag-release rin ng P311 milyon at P888 milyon para sa special risk allowance (SRA) ng mga health workers.

Agad namang nakapagbigay ng SRA ang gobyerno matapos na ang mga health workers ay nagprotesta at nagbantang magre-resign habang ang bansa ay patuloy sa pagsirit ng kaso ng COVID-19.

Gayunman, parehong sina Pangulong Duterte at Duque ay hindi binanggit na ang tinatayang nasa P6.4 bilyon halaga ng hindi nagamit na pondo sa Bayanihan 2 law ay reverted na o ibinalik sa Bureau of Treasury matapos na ang naturang batas ay mag-expire nitong Hunyo 30.

Higit 500K sa Brazil, pumanaw dahil sa COVID

ni Ronalyn Seminiano Reonico | June 20, 2021

Umabot na sa mahigit kalahating milyon ang mga nasawi dahil sa COVID-19 sa Brazil noong Sabado at nagbabala ang mga eksperto na maaari pang lumala ang second-deadliest outbreak kung hindi papaigtingin ng pamahalaan ang social distancing at ang pagbabakuna sa mga mamamayan.

Dahil 11% pa lamang ng mga Brazilians ang fully vaccinated na laban sa COVID-19, ayon sa epidemiologists, maaari pang madagdagan ang bilang ng mga nasasawi dahil sa Coronavirus.

Ayon sa datos ng Health Ministry noong Sabado, nakapagtala na ang Brazil ng 500,800 death toll at sa kabuuang bilang ay pumalo na rin sa 17,883,750 ang naitalang kaso ng COVID-19.

Noong mga nakaraang linggo, 2,000 katao ang nasasawi sa Brazil dahil sa COVID-19 kada araw. Naitala naman ng Pan American Health Organization (PAHO) ang pagtaas ng kaso ng COVID-19 sa anim na Mexican states tulad ng Belize, Guatemala, Panama at iba pang lugar sa Caribbean.

Nagbabala rin ang PAHO na maaaring lumala pa ang sitwasyon sa Colombia dahil napupuno na ang mga intensive care unit beds. Saad naman ni Gonzalo Vecina, former head of Brazilian health regulator Anvisa, "I think we are going to reach 700,000 or 800,000 deaths before we get to see the effects of vaccination.

"We are experiencing the arrival of these new variants and the Indian variant will send us for a loop." Libu-libong residente ng Brazil ang nagpoprotesta laban kay President Jair Bolsonaro dahil sa pagma-manage nito sa pandemya at sinisisi siya ng publiko sa mataas na death toll.

Samantala, ayon naman sa researcher ng Brazilian biomedical center na Fiocruz na si Raphael Guimaraes, mas mararamdaman ang malalang epekto ng delayed na vaccination program hanggang sa Setyembre.

Aniya pa, "We are still in an extremely critical situation, with very high transmission rates and hospital bed occupancy that is still critical in many places.”