Senyales na susuwertehin sa lahat ng bagay

ni Maestra Estrellia de Luna @Panaginip Gabay ng Buhay | Oct. 8, 2024

Analisahin natin ang panaginip na ipinadala ni Linda ng Pasig.

Dear Maestra,

Napanaginipan ko na birthday ko. May nagregalo sa akin ng cake, at may biglang dumating na dalawang paru-paro na nagpaikut-ikot sa akin. 

Patay na ang mga magulang ko, kaya naisip ko na baka sila ‘yung mga paru-paro na dumalaw sa akin. 

Ano ang ibig sabihin ng panaginip ko?

Naghihintay,

Linda

---

Sa iyo, Linda,

Ang ibig sabihin ng panaginip mo na may nagregalo sa iyo ng cake, dahil birthday mo ay susuwertehin ka sa lahat ng bagay.

Kung hinipan mo ang candle sa cake, ito ay nangangahulugan na magiging maganda ang kalusugan mo, at magiging masagana ka rin sa lahat ng bagay.

Pero kung hiniwa mo naman ang cake, ito ay nagpapahiwatig na pansamantala lamang ang suwerteng darating sa buhay mo. 

Samantala, ang may dumating na paru-paro ay senyales na liligaya ka na sa susunod na mga araw. 

Ang bilang ng dalawa ay tanda na pabagu-bago ang iyong isip, at madali kang magpalit ng desisyon. Ang inakala mong magulang mo ‘yung umikot na paru-paro ay babala na madadamay ka sa kaguluhan, pero may tutulong sa iyo, para maiwasan mo ito.

Matapat na sumasaiyo,

Maestra Estrellia de Luna

Kahulugan ng eroplano at tulay

ni Maestra Estrellia de Luna @Panaginip Gabay ng Buhay | Oct. 7, 2024

Analisahin natin ang panaginip na ipinadala ni Jonathan ng Baguio.

Dear Maestra,

Ano ang ibig sabihin kapag madalas mong napapanaginipan ang eroplano at tulay?

Naghihintay,

Jonathan

---

Sa iyo, Jonathan,

Kung ang eroplano sa panaginip mo ay nasa himpapawid, at tanaw na tanaw mo ay pahiwatig ng malaking pagbabago sa takbo ng iyong buhay. 

Pero kung nakasakay ka sa eroplano, ito ay paalala na mag-ingat ka sa pagpapasya. Huwag kang pabigla-bigla, at planuhin mo muna ang mga binabalak mo para hindi ka mabigo.

Samantala, depende rin sa tulay ang ibig sabihin ng panaginip mo. Kung napadaan ka sa ilalim ng tulay, ito ay nangangahulugan na masasangkot ka sa kaguluhan, pero hindi rin ito magtatagal, dahil agad mo rin itong maiiwasan.

Kung ikaw naman ay naglalakad sa ibabaw ng tulay, o nakasakay sa sasakyan, ito ay senyales na magtatagumpay ka sa mga binabalak mo sa buhay. 

Pero kung tanaw na tanaw mo ang tubig, ito ay tanda na hindi mo agad makakamit ang tugatog ng iyong tagumpay. Alalahanin mo, hindi ito magic, dahil kailangan mong kumilos.

Matapat na sumasaiyo,

Maestra Estrellia de Luna

Tanda na liligaya sa pag-ibig at magtatagumpay sa negosyo

ni Maestra Estrellia de Luna @Panaginip Gabay ng Buhay | Oct. 6, 2024

Analisahin natin ang panaginip na ipinadala ni Loida ng Mandaluyong.

Dear Maestra,

Napanaginipan ko na namasyal kami ng dati kong kaklase sa probinsya. Ang ganda ng tanawin, ang daming palm tree, at ang dami ring prutas gaya ng peach, pears, at pineapple.

Ano ang ibig sabihin ng panaginip ko?

Naghihintay,

Loida 

---

Sa iyo, Loida,

Ang ibig sabihin ng namasyal kayo sa probinsya, at nakakita kayo ng magandang tanawin ay yayaman na kayo, at magtatagumpay din kayo sa mga gawaing spiritual.

Ang peach ay nangangahulugan ng kaligayahan sa pag-ibig, tagumpay sa negosyo, at mga kaibigan na maaasahan sa sandali ng kagipitan.

Ang pears naman ay nagpapahiwatig na lalago na ang inyong negosyo. Marami kang kikitain, at tuluy-tuloy ka nang yayaman. Ito rin ay senyales na magiging maligaya ka sa pag-ibig. 

Samantala, ang pineapple ay may kaugnayan naman sa pag-aasawa, kung wala ka pang asawa, ngayon mo na matatagpuan ang magiging kaagapay mo habambuhay. Subalit kung may asawa ka na, makakatanggap ka naman ngayon ng wedding invitation. Magiging masaya ang kasalang dadaluhan mo, at mag-e-enjoy ka nang husto.

Matapat na sumasaiyo,

Maestra Estrellia de Luna