Kahulugan ng manok at bubuyog

ni Maestra Estrellia de Luna @Panaginip Gabay ng Buhay | Oct. 18, 2024

Analisahin natin ang panaginip na ipinadala ni Laura ng Taguig.

Dear Maestra, 

Napanaginipan ko na pumunta ako sa poultry. Mas nadagdagan pala ang mga alaga naming manok, habang libang na libang akong panoorin ang mga ito, bigla naman akong kinuyog ng mga bubuyog. 

Meron pala kasing pugad ng bubuyog malapit sa kulungan ng mga manok namin. 

Ano ang ibig sabihin ng panaginip ko?

Naghihintay,

Laura

---

Sa iyo, Laura,

Ang ibig sabihin ng panaginip mo na pumunta ka sa poultry at mas nadagdagan ang bilang ng mga manok ay pansamantalang made-delay ang mga plano mo sa buhay, at may mga sagabal kang mararanasan. 

Ang kinuyog ka ng mga bubuyog ay nagpapahiwatig na ang kasalukuyan mong trabaho ay hindi magiging madali. Marami kang kakaharaping pagsubok at kakailanganin mo rin ang matinding pagsisikap. Ngayon ka dapat mas maging masipag at matiyaga. Pero, huwag kang mag-alala, dahil lahat ng pagsisikap mo ay gagantimpalaan din ng tadhana.

Magtatagumpay ka at uunlad ang iyong pamumuhay, hanggang sa yumaman at kilalanin ka sa inyong lugar. 

Samantala, ang pugad ng bubuyog malapit sa poultry n’yo ay tanda na ang matindi mong pagsisikap, pagtitiyaga, kasipagan at tibay ng loob ang magdadala sa iyo sa tugatog ng tagumpay.

Matapat na sumasaiyo,

Maestra Estrellia de Luna

Pahiwatig ng kabiguan sa pag-ibig

ni Maestra Estrellia de Luna @Panaginip Gabay ng Buhay | Oct. 16, 2024

Analisahin natin ang panaginip na ipinadala ni Loida ng Makati.

Dear Maestra,

Napanaginipan ko na natuwa ako dahil may matatanggap akong mana mula sa yumao kong distant relative. 

Hindi ako makapaniwala, kaya naman tuwang-tuwa ako sa natanggap kong balita. 

Ano ang ibig sabihin ng panaginip ko?

Naghihintay,Loida

---

Sa iyo, Loida,

Ang ibig sabihin ng panaginip mo na natuwa ka dahil may matatanggap kang mana mula sa yumao mong distant relative ay hindi totoo. Kunwari lang ‘yun para ma-impress ka mula sa lalaking gustung-gusto kang pakasalan, kahit na ‘di mo naman siya bet. 

Samantala, ang tuwang-tuwa ka ay nagpapahiwatig ng kabiguan. Mabibigo ka sa pag-ibig. Ito rin ay paalala na huwag kang basta-basta magtitiwala sa mga lalaking nanliligaw sa iyo. Mag-ingat ka sa pagpili ng iyong mapapangasawa, dahil may posibilidad na lumuha ka lamang, lalo na kung magkamali ka sa pagpili.

Matapat na sumasaiyo,

Maestra Estrellia de Luna

Senyales na malapit nang yumaman

ni Maestra Estrellia de Luna @Panaginip Gabay ng Buhay | Oct. 15, 2024

Analisahin natin ang panaginip na ipinadala ni Jun ng Pangasinan.

Dear Maestra,

Napanaginipan ko na nasa taniman ako. Nangongolekta ako ng iba't ibang klase ng prutas at gulay. 

Ngunit bigla na lamang pinulikat ang paa ko, kaya umuwi agad ako sa bahay namin. Pag-uwi ko sa bahay, ang dami kong nakitang maruming damit sa sala. Kaya naman inalis ko agad at inilagay sa tabi ng washing machine. 

Ano ang ibig sabihin ng panaginip ko?

Naghihintay,

Jun

---

Sa iyo, Jun,

Ang ibig sabihin ng panaginip mo na nangolekta ka ng mga prutas at gulay ay malapit ka nang yumaman. Uunlad at sasagana na rin ang iyong buhay. Isa pa, susuwertehin ka rin sa maraming bagay. 

Ang pinulikat ka ay nangangahulugan na bigla na lamang magbabago ang takbo ng iyong buhay, at hindi ka na makakaranas pa ng kahirapan sa buhay.

Samantala, ang umuwi ka ng bahay, at nakita mo ‘yung maruming damit sa sala, kaya naman nilagay mo muna ang mga ito sa tabi ng washing machine ay nagpapahiwatig na dapat kang umiwas sa pakikipagtalo at sa mga ‘di makatotohanang tsismis sa paligid mo, dahil may posibilidad na masangkot ka sa kaguluhan.

Matapat na sumasaiyo,

Maestra Estrellia de Luna