Comet, babala na malalagay sa kapahamakan ang ating bansa

ni Maestra Estrellia de Luna @Panaginip Gabay ng Buhay | Sep. 26, 2024

Analisahin natin ang panaginip na ipinadala ni Mary Ann ng Nueva Ecija.

Dear Maestra,

Napanaginipan ko na sabay-sabay kaming kumain ng dinner. Habang nakatingin ako sa bintana, may nakita akong comet at mga nagliliparang uwak sa langit. 

Ano ang ibig sabihin ng panaginip ko?

Naghihintay,

Mary Ann

---

Sa iyo, Mary Ann,

Ang ibig sabihin ng panaginip mo na sabay-sabay kayong nag-dinner ay may paparating na paghihirap sa buhay mo at kakapusin ka sa pang-araw-araw na pangangailangan mo. 

Ang may natanaw kang comet sa bintana ay babala na ang ating bansa ay malalagay sa malaking panganib at kapahamakan. 

Samantala, ang nagliliparang uwak sa langit ay nangangahulugan na madadawit ka sa isang kaguluhan. Matatalo ka ng kaaway mo at mauuwi sa demandahan ang inyong pagtatalo, na kung saan mawawalan ka ng katarungan. Dito na rin magsisimulang magbago ang iyong buhay. 

Matapat na sumasaiyo,

Maestra Estrellia de Luna

Kahulugan ng apple, almond at apricot

ni Maestra Estrellia de Luna @Panaginip Gabay ng Buhay | Sep. 25, 2024

Analisahin natin ang panaginip na ipinadala ni Loyda ng Imus, Cavite. 

Dear Maestra,

Napanaginipan ko ang apple, almond at apricot. Ano ang ibig sabihin ng mga ito?

Naghihintay,

Loyda

---

Sa iyo, Loyda,

Ang ibig sabihin ng apple ay malapit mo nang marating ang tugatog ng iyong tagumpay. Pero kung namimitas ka ng apple, ito ay nagpapahiwatig na isa sa mga anak mong lalaki ang magiging mayaman.

Samantala, kung ang almond sa panaginip mo ay kinakain mo, ito ay senyales ng paglalakbay. Makakapaglakbay ka sa ibang bansa. 

Ang apricot naman ay nagpapahiwatig na susuwertehin ka sa pag-ibig. Ikakasal ka sa lalong madaling panahon at magiging masaya ang pag-iisang dibdib n’yo. Pagpapalain din kayo ng magiging asawa mo.

Matapat na sumasaiyo,

Maestra Estrellia de Luna

Kahulugan ng iba't ibang hayop

ni Maestra Estrellia de Luna @Panaginip Gabay ng Buhay | Sep. 23, 2024

Analisahin natin ang panaginip na ipinadala ni Kevin ng Tarlac.

Dear Maestra,

Napanaginipan ko na pumunta ako sa poultry namin para bisitahin ang mga alaga naming manok. Nang makita ko ‘yun, nagulat ako dahil ang laki na pala ng mga sisiw na inalagaan namin. Makalipas ang ilang saglit, naisipan kong umuwi, habang naglalakad ako patungo sa amin, may nakasalubong akong iba't ibang uri ng hayop tulad ng kalabaw, baka, kambing at iba pa. Ano ang ibig sabihin ng panaginip ko?

Naghihintay,

Kevin

---

Sa iyo, Kevin,

Ang ibig sabihin ng panaginip mo na pumunta ka sa poultry at nakita mo na ang lalaki na pala ng inalagaan n’yong sisiw ay palatandaan na may mga pagbabagong magaganap sa buhay mo, pero naka-pending pa ito. Hindi muna ito mapapasaiyo, at kailangan mo pang maghintay ng kaunting panahon.

Samantala, ang may nakasalubong kang iba't ibang uri ng hayop ay babala ng mabibigat na gawain. Kakailanganin mong magtrabaho nang husto, makakaranas ka rin ng matinding pagsubok at kapighatian, subalit huwag kang mag-alala, dahil may gantimpalang nakalaang para sa iyo. 

Sa dakong huli, tiyak na ika’y magtatagumpay at pagpapalain habambuhay.

Matapat na sumasaiyo,

Maestra Estrellia de Luna