Kahulugan ng alimasag at nasipit ang daliri

ni Maestra Estrellia de Luna @Panaginip Gabay ng Buhay | Sep. 30, 2024

Analisahin natin ang panaginip na ipinadala ni Lorna ng Bohol.

Dear Maestra, 

Napanaginipan ko na bumili ako ng alimasag. Sa kasamaang palad, nasipit ang daliri ko. Namutla ako sa sobrang sakit, at para bang hindi ako makahinga.

Ano ang ibig sabihin ng panaginip ko?

Naghihintay,

Lorna

---

Sa iyo, Lorna,

Ang ibig sabihin ng panaginip mo na bumili ka ng alimasag, at nasipit ang daliri mo ay dapat mong iwasan ang paglalakbay sa karagatan.

Ang nakaramdam ka ng sobrang sakit ay nangangahulugan na hindi magiging mabuti ang pakiramdam mo sa darating na mga araw, at may posibilidad na magkasakit ka.

Samantala, ang namutla ka ay nagpapahiwatig na iwasan mo ang sobrang pagtatrabaho. Kumbaga, hinay-hinay lang. Huwag mong pagurin ang sarili mo, at mamahinga ka rin kung kinakailangan upang ‘di magkasakit.

Matapat na sumasaiyo,

Maestra Estrellia de Luna

Kahulugan ng wolf at multo

ni Maestra Estrellia de Luna @Panaginip Gabay ng Buhay | Sep. 28, 2024

Analisahin natin ang panaginip na ipinadala ni Domeng ng Cavite.

Dear Maestra,

Napanaginipan ko na dumungaw ako sa bintana namin. May natanaw akong wolf, kaya naman sinara ko agad ang bintana at pumasok na sa kuwarto ko.

Pero ramdam kong parang may multo sa paligid ko.

Ano ang ibig sabihin ng panaginip ko?

Naghihintay,

Domeng

---

Sa iyo, Domeng,

Ang ibig sabihin ng panaginip mo na dumungaw ka sa bintana ay nag-aalala ka tungkol sa best friend mo. Alam kong iniisip mo ngayon na hindi siya dapat pagkatiwalaan, ngunit nagkakamali ka, dahil ang best friend mo ay isang maaasahan at handa kang tulungan sa lahat ng sandali.

Ang may natanaw kang wolf ay nangangahulugan na hindi lahat ng mga kaibigan mo ay maaasahan gaya ng best friend mo. ‘Yung iba sa kanila ay may lihim na inggit sa iyo, kaya dapat mong talasan ang iyong pakiramdam, dahil isa sa kanila ang magtatangkang siraan at pabagsakin ka.

Samantala ang pumasok ka sa kuwarto at feeling mo may multo ay babala na kailangan mong mag-ingat sa pakikitungo sa iyong kapwa para ‘di ka nila kainisan at mapagkamalang mayabang.

Matapat na sumasaiyo,

Maestra Estrellia de Luna

Senyales na magbabago ang takbo ng buhay

ni Maestra Estrellia de Luna @Panaginip Gabay ng Buhay | Sep. 27, 2024

Analisahin natin ang panaginip na ipinadala ni Leonardo ng Pasay City.

Dear Maestra,

Napanaginipan ko na may mga dala akong bagahe sa airport at hirap na hirap akong dalhin ang mga ito. Habang naglalakad, bigla ko namang nakasalubong ‘yung best friend ko. May bagahe rin siyang dala at nagpatulong siya sa akin dalhin ‘yung iba. Matapos ko siyang tulungan, agad niya akong inabutan ng regalo.

Ano ang ibig sabihin ng panaginip ko? 

Naghihintay,

Leonardo

---

Sa iyo, Leonardo,

Ang ibig sabihin ng panaginip mo na may dala kang mga bagahe sa airport at hirap na hirap kang dalhin ang mga ito ay pagkalugi sa negosyo. Malulugi ang kasalukuyan mong negosyo at kakailanganin mo munang kumayod upang umunlad ang iyong buhay.  

Samantala, ang nagpatulong sa iyo ang best friend mo na dalhin ang iba niyang bagahe at binigyan ka niya ng regalo dahil sa pagtulong mo sa kanya ay nangangahulugan na makakatanggap ka ng magandang balita na siyang magpapabago sa buhay mo. 

Matapat na sumasaiyo,

Maestra Estrellia de Luna