KAHULUGAN NG LASING, LINDOL AT AGILA

ni Maestra Estrellia de Luna @Panaginip Gabay ng Buhay | Nov. 25, 2024

Analisahin natin ang panaginip na ipinadala ni Reden ng Bulacan.

Dear Maestra,

Napanaginipan ko na nalasing ako at dinig na dinig ko ang malakas na tunog ng drum. Kasabay nu’n ay lumindol ng malakas pero agad din naman itong huminto at nakakita rin akong agila sa langit.

Ano ang ibig sabihin ng panaginip ko?

Naghihintay,

Reden

---

Sa iyo, Reden,

Ang ibig sabihin ng nalasing ka ay malalagay ka sa kahihiyan dahil sa iyong kapabayaan at hindi magandang ugali o asal. 

Ang lumindol ng malakas pero agad din naman itong tumigil ay nagpapahiwatig na kailangan magkaroon ka ng tamang desisyon sa isang bagay na binabalak mong ipatupad.

Samantala, ang may nakita kang agila sa langit ay senyales na uunlad ang kasalukuyan mong pinagkakakitaan, basta maging masipag ka lang at huwag maniniwala agad sa mga scammer.

Matapat na sumasaiyo,

Maestra Estrellia de Luna

Sign na handang pakasalan ng boylet

ni Maestra Estrellia de Luna @Panaginip Gabay ng Buhay | Nov. 20, 2024

Analisahin natin ang panaginip na ipinadala ni Lorry ng Pasay.

Dear Maestra,

Palagi kong napapanaginipan na binibigyan ako ng mga alahas ng dyowa ko at madalas din akong magselos sa kanya. 

Ano ang ibig ipahiwatig ng mga panaginip ko?

Naghihintay,Lorry

---

Sa iyo, Lorry,

Maganda ang ibig sabihin ng mga alahas, lalo na kung ito ay binigay sa iyo ng dyowa mo, ito ay nangangahulugang mahal na mahal ka niya at nagbabalak na siyang pakasalan ka sa lalong madaling panahon.

Ang madalas kang magselos sa dyowa mo ay tanda ng pag-aalala at pagkabalisa. Kung may negosyo ka, ito ay babala ng pagkalugi, kakapusin ka sa pera at mapipilitan kang mag-loan.

Matapat na sumasaiyo,

Maestra Estrellia de Luna

Sign na may matatanggap na pera

ni Maestra Estrellia de Luna @Panaginip Gabay ng Buhay | Nov. 13, 2024

Analisahin natin ang panaginip na ipinadala ni German ng Pampanga.

Dear Maestra,

Napanaginipan ko na may pupuntahan akong event. Ang gusto kong isuot ay ang linen kong damit. Kaya agad kong binuksan ang aparador ko, pero naka-lock iyon kaya hindi ko mabuksan, agad kong kinuha ‘yung duplicate key ko baka sakaling mabuksan ko iyon at sa katagalan nga ay nabuksan ko rin iyon. 

Ano ang ibig ipahiwatig ng panaginip ko?

Naghihintay,

German

---

Sa iyo, German,

Ang ibig sabihin ng linen ay depende sa kulay nito. Ang puting linen ay nangangahulugan na makakatanggap ka ng mga sorpresang balita. 

Ang colored na linen naman ay nagpapahiwatig na may mamanahin kang pera mula sa yumao mong mahal sa buhay.

Pero kung ang linen ay lukut-lukot, ito ay babala ng kabiguan sa buhay.

Samantala, ang naka-lock ‘yung aparador mo, hindi mo na ito mabuksan ay nangangahulugang may paparating na magbigat na problema sa iyong buhay.

Ang nabuksan mo ang aparador gamit ang duplicate key ay senyales na malalagpasan mo ang mga hadlang sa iyong mga pangarap. 

Matapat na sumasaiyo,

Maestra Estrellia de Luna