Kahulugan ng cathedral at tunog ng gitara

ni Maestra Estrellia de Luna @Panaginip Gabay ng Buhay | Oct. 22, 2024

Analisahin natin ang panaginip na ipinadala ni Dorothy ng Naic, Cavite.

Dear Maestra,

Napanaginipan ko na pumunta ako sa cathedral malapit sa bahay namin. Nag-take ako ng communion during Holy Mass, nang may bigla akong narinig na tunog ng gitara. 

Ano ang ibig sabihin ng panaginip ko?

Naghihintay,

Dorothy

---

Sa iyo, Dorothy,

Ang ibig sabihin ng panaginip mo na pumunta ka sa cathedral malapit d’yan sa bahay n’yo ay may matatanggap kang mana mula sa namatay mong kamag-anak.

Ang nag-take ka ng communion during Holy Mass ay nangangahulugang malapit nang matapos lahat ng problema mo sa buhay. Magkakaroon na ng kasagutan lahat ng gumugulo sa iyong isipan. 

Samantala, ang may narinig kang tunog ng gitara ay may kinalaman sa love life mo. Ito ay nagpapahiwatig din na tunay at wagas ang pag-ibig sa iyo ng dyowa mo.

Matapat na sumasaiyo,

Maestra Estrellia de Luna

Iba’t ibang kahulugan ng isda at sibuyas

ni Maestra Estrellia de Luna @Panaginip Gabay ng Buhay | Oct. 21, 2024

Analisahin natin ang panaginip na ipinadala ni Leo ng Orani, Bataan.

Dear Maestra,

Ano ang ibig sabihin ng isda at sibuyas sa panaginip?

Naghihintay,

Leo

---

Sa iyo, Leo,

Ang ibig sabihin ng isda ay depende sa sitwasyon. Kung sa panaginip mo ay may nakita kang isda na lumalangoy, ito ay nangangahulugan na may bago kang negosyong sisimulan. 

Pero, kung nakahuli ka ng isda sa panaginip mo, ito ay nagpapahiwatig ng kasaganaan

sa buhay. 

Kung namimingwit ka naman ng isda, pero wala kang mahuli, ito ay babala ng kabiguan. Mabibigo ka sa kasalukuyan mong pinagkakaabalahan.

Samantala, ang talaba ay tanda na kailangan mo munang magtiyaga, at iwasan mong mainip sa magiging resulta ng iyong pinagkakaabalahan.

Ang sibuyas ay depende kung ito ay hiniwa o kinain mo. Kung ito ay hiniwa mo, ito ay paalala na magkakaroon ka ng kaaway sa miyembro ng iyong pamilya. 

Ngunit, kung kinakain mo naman ang sibuyas, ito ay simbolo na makikita mo na ang nawawalang bagay na matagal mo nang hinahanap.

Matapat na sumasaiyo,

Maestra Estrellia de Luna

Kahulugan ng namalengke at nagbisikleta

ni Maestra Estrellia de Luna @Panaginip Gabay ng Buhay | Oct. 19, 2024

Analisahin natin ang panaginip na ipinadala ni Rudy ng Oriental Mindoro.

Dear Maestra,

Napanaginipan ko na pumunta ako sa palengke para mamili ng baka at pinili ko ‘yung buto-buto. 

Nagbisikleta ako pauwi, at nang makauwi ako sa bahay agad kong pinakuluan ‘yung baka na binili ko. Sa ‘di sinasadya, nabanlian ako nang kumukulong sabaw. Ano ang ibig sabihin ng panaginip ko?

Naghihintay, Rudy

---

Sa iyo, Rudy,

Ang ibig sabihin ng panaginip mo na pumunta ka sa palengke para mamili ng baka ay kasaganaan at pag-unlad sa buhay. Pero, hindi ibig sabihin nu’n ay yayaman ka.

Gayunman, tama lang na pinili mo ‘yung buto ng baka dahil senyales ito na makakatanggap ka ng malaking pera, o kaya naman ay makakatanggap ka ng mana.

Ang pinakuluan mo ‘yung baka at sa ‘di sinasadyang sitwasyon ay nabanlian ka ay nangangahulugan na makakamit mo na ang tagumpay. Samantala, ang nagbisikleta ka, depende kung madali mo lang napaandar ang bisikleta. 

Kung nahirapan kang magpidal, ito ay paalala na may magtatangkang sirain ang reputasyon mo. May balak siyang pabagsakin ka dahil sa tindi ng inggit niya sa iyo. 

Kung madali mo naman naipidal ang bisikleta, ito ay tanda na malalampasan mo lahat ng pagsubok mo sa buhay at magtatagumpay ka pa sa iyong mga minimithi.

Matapat na sumasaiyo,

Maestra Estrellia de Luna