ni Jasmin Joy Evangelista | October 12, 2021
Sinampahan ng reklamong panghahalay ng isang 26-anyos na babae ang isang pulis sa Pampanga matapos umano siyang halayin nang maharang sa checkpoint.
Sinita umano ng suspek ang biktima dahil sa nagmamaneho ng motorsiko nang walang dalang lisensiya.
Ayon sa kuwento ng biktima, naganap ang insidente dakong 3:00 am noong Oktubre 8 matapos siyang sitahin ng suspek na si Police Staff Sergeant Robin Mangaga.
Hiningan daw ng pulis ng lisensiya si Olivia pero walang naipakita ang biktima.
Aminado naman daw ang biktima sa kanyang pagkakamali.
Aniya, hindi siya tiniketan ni Mangaga pero i-impound nito ang kaniyang motorsiklo kaya’t sa kagustuhan na makuha ang kanyang sinasakyan at makapasok na ng trabaho, nag-alok daw siya ng P500 sa pulis pero sinabihan siya na panunuhol ang kanyang ginagawa.
Patuloy daw na nakiusap si Olivia at sinabi niyang handa siiyang lumuhod para magmakaawa sa pulis.
Noon na raw nagsimulang mambastos ang suspek nang pumasok ito sa sasakyan at sinabihan siyang sumakay kung nais pa rin niyang makiusap.
Sumakay si Olivia sa sasakyan ng pulis at dinala umano siya sa motel at doon na nangyari ang panghahalay.
Matapos ang insidente, ibinalik na raw ng pulis ang kaniyang motorsiklo.
Nagsampa na ng reklamong rape si Olivia sa korte laban kay Manganga at bukod dito ay nagsampa rin siya ng reklamong administratibo laban sa pulis sa Internal Affairs Office sa Camp Crame sa Quezon City.
Ayon kay Police Colonel Marcial Paclibon, chief ng Intelligence and Investigation Division-IAS, kung mapapatunayan ay may grave abuse of authority na nagawa si Mangaga at mayroong elemento ng pagbabanta at panggigipit sa biktima.
Posible rin daw na magamit laban kay Mangaga kung totoo na nagpadala pa ito ng text messages sa biktima nang malaman ang ginawang pagsasampa ng reklamo.
Napag-alaman naman na sumuko na ang inirereklamong pulis pero tumanggi siyang magbigay ng pahayag.
