Barko ng China sa Palawan, pinalayas ng PCG

ni Ronalyn Seminiano Reonico | July 19, 2021

Pinalayas ng Philippine Coast Guard (PCG) ang isang Chinese Navy warship sa Marie Louise Bank sa El Nido, Palawan noong nakaraang linggo.

Saad ng PCG, “Base sa report na natanggap ng PCG Command Center noong ika-13 ng Hulyo 2021, na-monitor ng BRP Cabra (MRRV-4409) ang isang ‘navy warship’ na may watawat ng People’s Republic of China at markado ng Chinese character.”

Nagsagawa umano ng radio challenge ang PCG at nilapitan din ng BRP Cabra ang naturang Chinese Navy warship upang ma-monitor ang aktibidad nito sa katubigan.

Saad ng PCG, “Nang walang matanggap na verbal response, ginamit ng BRP Cabra (MRRV-4409), sa pangunguna ni Commander Erwin Tolentino, ang Long Range Acoustic Device (LRAD) para ipahatid ang verbal challenge sa Chinese Navy warship.”

Nang gumalaw umano ang barko palabas ng Marie Louise Bank, sinundan ito ng BRP Cabra (MRRV-4409) upang masiguro na tuluyan na nitong lilisanin ang katubigan.

Nang umabot sa 0.25 hanggang 0.30 nautical miles ang distansiya ng dalawang barko, nagpadala umano ng radio message ang Chinese Navy warship sa BRP Cabra (MRRV-4409).

Sabi umano ng Chinese Navy warship: “Philippine Coast Guard 4409, this is Chinese Navy Warship 189. Please keep two nautical miles distance from me.”

Ngunit ayon sa PCG, hindi tumigil sa pagbabantay ang BRP Cabra (MRRV-4409) sa Chinese Navy Warship hanggang sa tuluyan itong nakalabas ng Marie Louise Bank.

Paglilinaw naman ng PCG, “Ang bawat desisyon at aksiyon ng BRP Cabra (MRRV-4409) ay naka-base sa ‘PCG Manual on Rules on the Use of Force Within the Philippines’ EEZ’. Ito ay para masiguro na ‘rules-based and peaceful approach’ ang ginagamit sa pagtataguyod ng soberanya at pagpoprotekta sa karapatan ng Pilipinas at mga Pilipino sa katubigan.”

P250M taklobo nasabat sa Palawan — PCG

ni Ronalyn Seminiano Reonico | July 1, 2021

Nasabat ng Philippine Coast Guard (PCG) ang tinatayang aabot sa 150 tons ng fossilized giant clam shells o mas kilala sa tawag na taklobo na nagkakahalagang P250 million sa Sofronio Espaniola, Palawan.

Ayon sa PCG, nakumpiska nila ang mga naturang taklobo sa King’s Paradise Island Resort, Barangay Panitian noong June 28.

Naaresto ng awtoridad ang suspek na si Eulogio Josos Togonon sa isinagawang operasyon ng ahensiya sa tulong ng Intelligence Group – Palawan, PCG Station Brooke’s Point, DF-332, Naval Intelligence and Security Group - West, PCSD, and PNP - Maritime Group.

Kinilala naman ng PCG ang iba pang suspek na sina Totong Josos, Nonoy Guliman, at Vilmor Pajardo na mga residente ng Barangay Iraray.

Samantala, nasa kustodiya na ng Barangay Panitian ang mga nakumpiskang taklobo at dinala naman sa Palawan Council for Sustainable Development ang suspek para sa inquest proceedings at upang harapin ang kasong paglabag sa Section 27 ng Republic Act 9147 o ang "Wildlife Resources Conservation and Protection Act".

124 preso, 17 empleyado ng Palawan Jail, nagpositibo sa COVID-19

ni Ronalyn Seminiano Reonico | June 18, 2021

Nagpositibo sa COVID-19 ang 124 inmates at 17 jail personnel sa Puerto Princesa City, Palawan.

Ayon kay Bureau of Jail Management and Penology (BJMP) Spokesperson Jail Chief Inspector Xavier Solda kahapon, Huwebes, isinailalim na sa isolation ang mga nagpositibo sa COVID-19 sa hiwalay na gusali.

Aniya, "Ang focus po ng management ngayon ay mabigyan ng atensiyong medikal 'yung mga PDL (persons deprived of liberty) at 'wag pong mag-alala ‘yung mga pamilya.”

Nilinaw naman ni Solda na 64% lamang ng kulungan sa Palawan ang okupado, hindi katulad sa Metro Manila na siksikan ang mga preso.

Pahayag pa ni Solda, "Since ang concern natin ngayon, ‘yung manpower capacity natin, ‘yung ibang personnel natin within or from nearby province, ‘yun na muna ‘yung ni-utilize natin.”

Samantala, dahil sa tumataas na kaso ng COVID-19 sa Palawan, suspendido pa rin ang face-to-face na pagdalaw sa kulungan.

Saad pa ni Solda, "Temporary suspended pa rin ang contact visitation.

"Ang facilities, nag-expand tayo ng electronic visitation o e-dalaw kung saan doon puwedeng makausap pa rin ng mga PDL ‘yung kanilang mga pamilya.”