Misis na baon sa utang, makakaahon ‘pag nakapag-abroad

ni Maestro Honorio Ong - @Kapalaran ayon sa Palad | October 13, 2022

KATANUNGAN

1. Naisipan kong kumonsulta sa inyo dahil gusto kong malaman kung uunlad din ba ang pagsasama ng mag-asawa kahit hindi sila compatible? Gemini ang aking zodiac sign, habang ang mister ko naman ay Pisces. Sa pagkakaalam ko ay hindi ito compatible dahil ang Gemini ay air sign, habang ang Pisces ay water sign.

2. Sa ngayon, hirap na hirap kami sa buhay, kaya nag-apply na rin ako ng trabaho kahit hindi ko naman ito dating ginagawa. Mahirap kasi kung mister ko lang ang aasahan ko dahil maliit lang ang kanyang suweldo, kaya palaging kapos ang pantustos namin sa aming mga pangangailangan.

3. Nakapagtapos naman ako ng kolehiyo, pero matagal na akong nag-a-apply, ngunit hindi pa rin ako natatanggap. Ano’ng kapalaran ang nakikita n’yo sa guhit ng aking mga palad at sa paanong paraan kami uunlad at makakabayad sa mga utang?

KASAGUTAN

1. Kung hindi ka makahanap ng trabaho rito sa ating bansa, bakit hindi mo subukang mag-abroad? Ito ang dapat gawin ng isang Gemini, dahil siya ay nagtataglay ng ruling planet na Mercury. Tunay ngang sa pangingibang-bansa, mas uunlad at aasenso ka, na madali namang kinumpirma ng malinaw na Travel Line (Drawing A. at B. t-t arrow a.) sa kaliwa at kanan mong palad. Gayundin, ito ay tanda na kung hindi ikaw ang makakapag-abroad, maaaring si mister o ang isa sa inyong mga anak na magiging daan upang makaahon kayo sa kahirapan, hanggang sa tuloy-tuloy nang umunlad ang inyong kabuhayan.

2. Hinggil naman sa tanong kung uunlad din ang pagsasama ng mag-asawa na hindi compatible sa isa’t isa, ang sagot ay oo. Ang totoo, may kani-kanya namang kapalaran ang bawat zodiac sign at kung ito ay susundin mo — tulad ng susuwertehin sa pag-a-abroad o pagnenegosyo ang isang Gemini — kumbaga sa pagmamaneho, ikaw ang magsisilbing giya o manibela upang marating ng inyong pamilya ang pag-unlad at ganap na kaginhawahan ng buhay.

MGA DAPAT GAWIN

1. Kung sadyang hindi ka matanggap sa mga local companies dito sa ating bansa, tulad ng nasabi na, Marissa, subukan mong mag-apply sa abroad, at kapag hindi ka pa rin natanggap, puwede namang si mister ang sumubok na mangibang-bansa.

2. Sa ganyang paraan, ayon sa iyong mga datos, tiyak ang magaganap — sa kalagitnaan ng susunod na taong 2023, magbabago na ang inyong kapalaran, sapagkat isa sa inyo ni mister ang mangingibang-bansa, at ito ang magiging daan o susi upang tuloy-tuloy nang magsimula ang isang maalwan, bago at mas maunlad na pamumuhay.

Crush na klasmeyt, magiging first bf at pang-forever na

ni Maestro Honorio Ong - @Kapalaran ayon sa Palad | October 12, 2022

KATANUNGAN

1. May crush ako ngayon at kaklase ko siya, tawagin na lang natin siyang Jerald. Maestro, gusto kong malaman kung crush din niya ako. Sa edad ko kasing 18, hindi pa ako nagkaka-boyfriend. Kailan ba ako magkaka-boyfriend at siya na ba ang magiging first boyfriend ko kung sakaling magkagusto rin siya sa akin at ligawan niya ako?

2. Sa totoo lang, palagi siyang laman ng mga panaginip at alaala ko. Gayundin, sa tuwing nakikita ko siya, masayang-masaya ako at hindi ko maipaliwanag ang nararamdaman ko.

KASAGUTAN

1. Walang alinlangang sa kasalukuyan ay umiibig ka na o sabihin na nating nagkaka-crush ka. Ang problema na lang ay kung matutugunan din ba ng kapwa paghanga sa iyong hinahangaan ang kakaibang damdamin na iyong nadarama sa kasalukuyan.

2. Positibo ang tugon ng kusang lumago, umusad at humaba na Infatuation Line (Drawing A. at B. I-I arrow a.) sa kaliwa at kanan mong palad. Tanda na sa malapit na hinaharap, matutupad ang iyong pinapangarap — hindi magtatagal, magiging boyfriend mo ang iyong crush.

3. Ang pag-aanalisang sa semester na ito ay magiging maligaya ka at walang kasing saya ay madali namang kinumpirma ng lagda mong maganda at maayos, na kinakitaan din ng maliit na korteng puso. Ibig sabihin, hindi na maiiwasang ma-in love ka sa panahong ito ng iyong buhay upang minsan pa, ang nasabing paghanga o infatuation sa isang cute at poging lalaki ay matugunan din ng kapwa paghanga naman niya sa iyo, hanggang sa mauwi ang nasabing ugnayan sa romantiko at masayang pagmamahalan.

DAPAT GAWIN

Eleanor, ayon sa iyong mga datos, sa last quarter ng taong ito hanggang sa first quarter ng taong 2023, ang isa sa magiging pinakamapalad at pinakamasayang panahon ng iyong kabataan, sa nasabing panahon at sa edad mong 18, tiyak ang magaganap – sa wakas, magiging boyfriend mo na rin si Jerald, noon mo pa crush na crush.

Bebot na ‘di magiging bf ang crush dahil sa ibang guy nakalaan

ni Maestro Honorio Ong - @Kapalaran ayon sa Palad | October 5, 2022

KATANUNGAN

1. May crush ako ngayon at mahal na mahal ko siya. Ang problema, may girlfriend na siya at napapansin kong masaya naman sila, gayundin, masasabi kong bagay sila. Kababata at ka-barangay ko siya, kaya magkaibigan naman kami, pero sa halip na ako ang ligawan niya, sa ibang babae natuon ang pansin niya. At dahil may hitsura ang crush kong ito, mahusay magdala ng damit at laging malinis tingnan at habang tinitingnan mo siya ay lalong gumuguwapo, marahil ay ‘yun din ang dahilan kaya nagustuhan siya ng girlfriend niya.

2. Sa ngayon, aaminin ko na siya pa rin ang gusto kong maging first and last boyfriend at kahit may girlfriend na siya, hindi nagbabago ang pagtingin ko sa kanya. Mahal na mahal ko pa rin siya at kung totoo lang si Sta. Claus, hihilingin ko na bago mag-Pasko ay makasama ko ang lalaking ito kahit sandali. Kaya lang, alam kong imposible na itong mangyari dahil pag-aari na siya ng iba.

3. Sa inyong palagay, posible pa bang maging boyfriend ko siya at maaari rin bang nakaguhit siya sa aking palad? Para kasing ayaw kong makipagrelasyon kahit marami akong manliligaw kung hindi lang din siya ang magiging boyfriend ko.

KASAGUTAN

1. Sabi ni Maestro Honorio Ong, dalawa ang kaligayahan ng lover o mangingibig: Una, ang ipaalam sa kanyang iniibig na siya ay mahal niya. Pangalawa, ang malaman ng mangingibig na mahal din siya ng iniibig niya. Masiyahan ka na sa una —ang malaman niyang mahal mo siya dahil imposibleng makamit mo pa ang ikalawa dahil sabi mo nga ay may girlfriend na siya at masaya naman sila.

2. Kaya para maibsan ang iyong pananabik at kalungkutan, at bilang mangingibig ay lumigaya ka rin, walang masama kung ipapaalam mo sa iyong crush na mahal mo siya kahit may girlfriend na siya. Tapos, sabihin mo na rin sa kanya na ang kaligayahan niya sa piling ng kanyang girlfriend ay kaligayahan mo na rin. Sa ganyang uri ng pag-ibig na dalisay at wagas talaga, halimbawang maghiwalay sila ng girlfriend niya, posibleng sa iyo naman mabaling o matuon ang pagmamahal niya.

3. Kapansin-pansin ang medyo maliit na bilog sa Heart Line (Drawing A. at B. h-h arrow a.) sa kaliwa at kanan mong palad. Ito ay malinw na tanda na manaka-nakang frustration o kabiguan sa pag-ibig, na nagsasabi ring hindi mo makakarelasyon ang kasalukuyan mong minamahal o crush. Gayunman, pansinin mo ang kaisa-isang Marriage Line (Drawing A. at B. 1-M arrow b.) sa kaliwa at kanan mong palad. Ito ay tanda sa taong ito ng 2022, sa buwan ng Nobyembre hanggang Disyembre at sa edad mong 23 pataas, magkaka-boyfriend ka na rin at ang lalaking ito ang iyong mapapangasawa at makakasama habambuhay. Gayundin, ang kasalukuyan mong crush na may girlfriend na ay magiging bahagi na lang ng isa sa masasaya mong alaala ng nakaraan sa lalaking minsang tinangi at minahal mo.

MGA DAPAT GAWIN

1. Habang, ayon sa yong mga datos, Alaiza, sa taong kasalukuyan, tulad ng nasabi na, magkaka-boyfriend ka, ngunit hindi ang kasalukuyan mong crush. Sa halip, isang lalaking kakilala mo na rin sa kasalukuyan na nagtataglay ng zodiac sign na Libra.

2. Siya na rin ang iyong mapapangasawa sa taong 2024, sa edad mong 25, at ang nasabing pag-aasawa ay may pangako ng maligaya at panghabambuhay na pagpapamilya (Drawing A. at B. 1-M arrow b.).