Pangarap na makagradweyt at maging titser, matutupad sa tulong ng mga kamag-anak

ni Maestro Honorio Ong - @Kapalaran ayon sa Palad | November 19, 2022

KATANUNGAN

1. Nahinto ako sa pag-aaral, kaya dapat ay third year college na ako, pero dahil sa kakapusan sa pera, naobliga akong huminto dahil nagkasakit pa ang nanay ko. Kaya ngayon ay naghahanap ako ng trabaho para makatulong sa aming pamilya.

2. Gusto kong malaman kung makakahanap ba ako ng trabaho at sa susunod na pasukan, makakapag-aral na ba ako? Pangarap ko kasing maging isang guro balang-araw.

KASAGUTAN

1. Kapansin-pansing huminto ang Fate Line na tinatawag ding Career Line (Drawing A. at B. F-F arrow a.). Ngunit matapos huminto ng nasabing guhit, agad naman itong nagpatuloy sa tinatahak niyang direksyon (arrow b.), matapos suportahan at tulungan ng Influence Line o Guhit ng Tulong (I-I arrow c.) sa kaliwa at kanan mong palad.

2. Ibig sabihin, darating ang takdang panahon na ikaw ay muling makakapag-aral at maaayos mo ang iyong career sa tulong ng isang tao na hindi rin iba sa iyo. Maaaring tiyahin o tiyuhin mo, mga nakakatanda mong kapatid, gayundin ang iba pang malalapit na kamag-anak n’yo.

3. Nangangahulugan ito na makakapag-aaral ka pa ng kolehiyo, basta ituloy mo lang ang iyong pagsisikap at sa sandaling nakita nila na masipag ka, sa panahong ‘yun ay may mag-aalok sa iyo ng tulong upang maabot ang iyong mga ambisyon sa buhay. Madali itong kinumpirma at pinatunayan ng birth date mong 7, na nagpapahiwatig ng mga tulong na dapat mong sunggaban.

4. Dagdag pa rito, kapansin-pansin din sa iyong mga palad ang malinaw na Effort Line (Drawing A. at B. E-E arrow d.), na tanda namang bukod sa mga tulong na iyong matatanggap ay kaya mong magpakasipag upang suportahan ang iyong sarili. Kumbaga, may diskarte at likas kang abilidad sa buhay, na kinumpirma ng zodiac sign mong Taurus. Sa sandaling ginusto mo talaga at pinagsikapan na makamit ang isang bagay, tiyak na ito ay makakamit mo, higit lalo kung ito ay may kaugnayan sa pagtuturo, sapagkat kinakitaan ka rin ng tinatawag na “teacher’s square” sa Mount of Jupiter (arrow e.). Ito ay malinaw ding tanda na nakalaan sa iyong kapalaran ang makatapos ng pag-aaral at maging lisensyadong guro.

DAPAT GAWIN

Ayon sa iyong mga datos, Marivic, ang mahalaga ngayon ay magsikap ka nang magsikap at mangarap. Sapagkat sa taong 2023 at sa edad mong 22 pataas, sa tulong ng mga taong nabanggit, muli kang makakapagpatuloy ng pag-aaral, hanggang sa tuloy-tuloy mong makamit ang iyong pangarap na maging guro, na nakatakdang mangyari sa taong 2026 at sa edad mong 25 pataas.

Estudyanteng pumatol sa pamilyadong trike driver, dapat umiwas dahil ibang guy ang makakatuluyan

ni Maestro Honorio Ong - @Kapalaran ayon sa Palad | November 16, 2022

KATANUNGAN

1. Ako ay estudyante na umibig sa isang tricycle driver na may asawa at pamilya na, pero hindi ito alam ng mga magulang ko. Gusto ko na siyang iwasan, pero wala naman akong magawa dahil palagi kaming nagkikita sa paradahan.

2. Gusto kong malaman kung siya na ba ang makakatuluyan ko kahit may pamilya na siya at hindi pa sila hiwalay sa misis niya? Pangako naman niya na iiwanan niya ang asawa niya kapag kami ay nagsama sa iisang bubong.

3. Tutuparin ba niya ang kanyang pangako at wala bang magiging problema kapag kami na ang nagsasama bilang mag-asawa? Plano niya na mag-live-in kami at kumuha ng apartment sa susunod na taon.

KASAGUTAN

1. Ang isa sa malaking kasalanan ng isang estudyante sa kanyang mga magulang ay ‘yung pinag-aaral siya at puro pagbubulakbol ang kanyang ginagawa at pagkatapos ng semester, nang tingnan ang mga grades ay puro bagsak at incomplete. Marahil ay nawalan ng interes ang estudyante o tinamad na mag-aral, kaya imbes na makapasa sa mga asignatura ay puro bagsak at pagda-drop ng mga subject ang ginawa. ‘Ika nga, babawi na lang next sem kung ie-enroll ulit ang mga bagsak na subject.

2. Pero may isa pang mas mabigat na kasalanan ang isang estudyante sa kanyang mga magulang. Ito ay ang pinag-aaral siya, ngunit puro kalandian pala ang kanyang ginagawa. Imbes na pumasok sa klase ay nakikipag-date sa boyfriend. ‘Ika nga, okey lang ‘yun dahil na-in love nang wala sa panahon sa kaklase o kapwa niya estudyante. Ganu’n talaga ang buhay, nabuntis o nakapag-asawa nang maaga dala ng kapusukan o ikatwiran na nating na-in love talaga.

3. Subalit, ang pinakamasama sa lahat ng kasalanang magagawa ng isang estudyante sa kanyang mga magulang ay ‘yung pinag-aaral siya, pero nakikipagrelasyon sa lalaking may asawa na. Ang pinakamabigat sa lahat ay ang tulad ng kasalanan mo, Ms. Cancer, kung saan isang tricycle driver ang naging boyfriend mo at hindi pa r’yan nagtatapos dahil may may asawa’t pamilya pa siya. Hindi natin nilalait ang mga tricycle driver, pero parang hindi kayo tugma o bagay, kung saan ikaw estudyante at dalaga, habang siya naman ay may asawa at pamilya.

4. Kaya mag-isip-isip ka, hangga’t maaga pa, gayundin habang hindi ka pa nabubuntis ng boyfriend mo, lumayo ka na sa kanya ngayon. Sa ganu’ng paraan, hindi pa huli ang lahat dahil hindi naman sobrang pangit ng Heart Line (Drawing A. at B. h-h arrow a.) sa kaliwa at kanan mong palad.

5. Bagkus, kahit may kaunting bilog at latid, agad naman itong umayos at gumanda sa gitna hanggang sa dulong bahagi ng Heart Line (h-h arrow b.) na nagsasabing sa malapit na hinaharap, basta’t magpasya ka dahil darating ang sandali na maiisip mo rin ang tamang gawin, gayundin, makakarekober ka pa sa kasalukuyang pagkakamali na iyong kinasadlakan, hanggang sa tuluyan mo na rin siyang maiwasan.

MGA DAPAT GAWIN

1. Habang, ayon sa iyong mga datos, Ms. Cancer, hangga’t maaga at may panahon pa, iwasan mo na ang boyfriend mo na may asawa na. Kapag nagawa mo ‘yan, tiyak ang magaganap dahil tulad ng nabanggit, hindi pa huli ang lahat at talagang maiiwasan mo siya.

2. Sa susunod na pakikipagrelasyon at pagpili ng lalaking mamahalin, tama na ang iyong magiging pasya, kung saan makakapili ka na ng lalaking mas karapat-dapat at sadyang inilaan sa iyo ng kapalaran. Ang lalaking nabanggit ay may zodiac sign na Virgo — sa pag-ibig, pakikipagrelasyon at sa pag-aasawa, magiging maligaya ka habambuhay (Drawing A. at B. 1-M arrow c.), na ayon sa iyong Love Calendar, ito ay nakatakdang mangyari sa taong 2024, sa buwan ng Abril at sa edad mong 21 pataas.

Palad ng binatang uunlad sa abroad ‘pag tinanggap ang tulong ng ex-klasmeyt

ni Maestro Honorio Ong - @Kapalaran ayon sa Palad | November 12, 2022

KATANUNGAN

1. May trabaho ako ngayon bilang computer technician sa isang tindahan ng computer. Masaya naman ako rito kahit minimum ang suweldo dahil sapat naman ‘yun para sa akin dahil binata ako.

2. Ang problema, nang mag-reunion kami ng mga kaklase ko nu’ng college, nabalitaan ko na ‘yung iba sa kanila ay nakapag-abroad at magaganda na ang buhay, kaya sabi sa akin ng isang kaklase ko ay isasama at tutulungan niya akong makapagbarko. Sa shipping agency kasi siya nagtatrabaho at ako naman ay nakatapos ng kursong Marine Engineering.

3. Nais kong malaman kung may maganda bang Travel Line sa aking mga palad at kung sakaling maisipan ko ring magbarko at tanggapin ang alok ng kaklase ko, magtatagumpay at uunlad ba ako sa pagbabarko?

KASAGUTAN

1. Hindi masamang maghangad na umunlad o yumaman, lalo na kung ngayon pa lang ay paplanuhin mo ang iyong future o retirement plan. Archie, pagkakataon mo nang umasenso at hindi mo ito dapat sayangin o palagpasin pa, kaysa nagtitiyaga ka sa kasalukuyan mong trabaho na maliit ang suweldo at hindi ikayayaman o ikauunlad ng pamilya mo. Oo, hindi ka makakaipon d’yan at walang magiging magandang future kung sakaling ikaw ay magtatayo ng sarili mong pamilya o dumating ang panahon ng iyong retirement, kaya mas mabuti na mag-abroad ka.

2. Ito ang nais sabihin at pinapagawa sa iyo ng malinaw na Travel Line (Drawing A. at B. t-t arrow a.) sa kaliwa at kanan mong palad. Tanda na ang pinakamabuti at dapat mong maging desisyon ay sumunod sa mungkahi ng iyong kaibigan o kaklase na nagtatrabaho sa barko, upang sa tulong niya, maging lehitimong seaman ka, gayung sabi mo ay nakatapos ka ng Marine Engineering.

3. Ang pag-aanalisang makakapag-abroad at makakapagbarko ka ay madali namang kinumpirma ng birth date mong 23 o 5 (2+3=5). Tanda na sa pangingibang-bansa, mas uunlad at aasenso ka, na dapat mong gawin ngayon hangga’t bata ka pa.

4. Pansinin ding kusang sumabay at tuluyang nakiisa sa Fate Line (Drawing A. at B. F-F arrow b.) ang Guhit ng Kaibigan o Influence Line (K-K arrow c.) sa kaliwa at kanan mong palad, kung saan nag-anyo na parang dalawa ang iyong Fate Line (arrow b. at c.). Ito ay tanda na sa tulong ng mga kaibigan, sigurado na ang magaganap – makakasampa ka sa barko, magiging seaman at mararating mo ang iba’t ibang bahagi ng karagatan sa iba’t ibang panig ng mundo habang patuloy ding lumalaki ang iyong kinikita.

MGA DAPAT GAWIN

1. Ayon sa iyong mga datos, Archie, kung tatanggapin mo ang alok ng iyong kaklase na mag-apply sa shipping company na pinapasukan niya, tiyak na sa susunod na taong 2023 at sa buwan ng Abril o Hunyo, tulad ng mga kaklase mo, makakasampa ka sa barko.

2. Sa sandaling nakapag-abroad ka, mas mabilis na aangat ang iyong career at lalago ang iyong kabuhayan. Kapag nagkapamilya ka na, tuloy-tuloy na ring uunlad at aasenso ang kabuhayan ng itatayo mong pamilya, hanggang sa panahon ng iyong pagtanda o retirement age.