Isang marriage line, indikasyon ng magandang love life kahit pangit ang past

ni Maestro Honorio Ong @Kapalaran Ayon sa Palad | January 31, 2023

KATANUNGAN

1. May tinakasan akong masamang karanasan sa aming probinsya. Naging biktima kasi ako ng panghahalay sa kapatid ko sa ama. Ngayon ay namamasukan ako sa isang grocery at naisipan kong sumangguni sa inyo dahil may nanliligaw sa akin at malapit ko na siyang sagutin.

2. Nais ko ring malaman kung dapat ko bang ipagtapat sa kanya na naging biktima ako ng panghahalay bago ko siya sagutin o kapag magkasintahan na kami, saka ko na lang sa kanya ikuwento ang aking masamang nakaraan?

3. Balak ko na siyang sagutin sa birthday niya sa February 7. Tama ba ang iniisip kong ito at compatible ba kami? Gayundin, gusto kong malaman kung siya na ba ang lalaking nakaguhit sa aking mga palad na tatanggapin ako sa kabila ng aking magulong nakaraan?

KASAGUTAN

1. Ganito ang sinasabi ng guhit ng iyong mga palad, Perla, hindi naman pala magbabago ang pagtingin sa iyo ng manliligaw na balak mo nang sagutin o maging boyfriend. Ito ang nais sabihin ng kaisa-isang malinaw at magandang Marriage Line (Drawing A. at B. 1-M arrow a.) sa kaliwa at kanan mong palad.

2. Ibig sabihin, kung halimbawang ipagtatapat mo na sa kanya ngayon ang iyong nakaraan bago mo siya sagutin sa kanyang birthday, mananaig ang kaisa-isang maganda at malinaw na Marriage Line (arrow a.) sa kaliwa at kanan mong palad. Ito ay maliwanag na tanda ng maligaya at matagumpay na pag-aasawa, na kinumpirma rin ng maaliwalas at maganda mong lagda.

3. Nangangahulugan ito na bagama’t may pangit kang nakaraan, hangga’t naging tapat ka sa iyong manliligaw, hindi makakaapekto ang pang-aabuso sa iyo ng iyong step-brother sa kasalukuyan mong buhay. Kaya tulad ng nasabi na, sa huli ay mananaig ang dalisay at wagas na pag-ibig ng lalaki na pagkakalooban mo ng iyong tiwala at pagmamahal.

DAPAT GAWIN

Samantala, ayon sa iyong mga datos, Perla, hindi makakasagabal sa kasalukuyan ang mapait mong nakaraan. Sapagkat tulad ng nasabi na, ang maganda at maayos mong Marriage Line (Drawing A. at B. arrow a.) ang kumumpirma at tumiyak na sa bandang huli, ang takdang kapalaran ang masusunod at iiral — kayo ng kasalukuyan mong manliligaw, na binabalak mong sagutin ang magkakatuluyan at nakatakdang magsama sa pagbuo ng maligaya at panghabambuhay na pamilya.

‘Di mabubuking na may kabit kaya ‘di mahihiwalay sa misis

ni Maestro Honorio Ong @Kapalaran Ayon sa Palad | January 29, 2023

KATANUNGAN

1. May babae ako ngayon, pero hindi ito alam ng misis ko. Kaya lang, kamakailan ay napapansin ko ang kanyang mga pagtatanong na parang nakakahalata na siya. Nagiging mausisa na siya at inaalam kung saan ako pumupunta, ngunit dati ay hindi naman siya ganu’n. Gayundin, palagi niyang tinitingnan ang cellphone ko kapag naibababa ko ito kung saan-saan.

2. Naisipan kong kumonsulta sa inyo, Maestro, dahil nais kong malaman kung mapapanatili ko bang lihim sa aking misis ang relasyon namin ng isa sa mga kasamahan ko sa trabaho at hindi ba dadating ang panahon na mabisto kami? Tiyak na malaking eskandalo ang magaganap at baka ikasira pa ito ng aming pamilya.

3. Ang totoo, wala naman akong intensyon na iwanan ang misis ko. Kaya lang naman ako nambabae ay dahil hindi sinasadya na nagustuhan ako ng dalagang kasamahan ko sa trabaho at parang hindi na kami makawala pa sa lihim na relasyong ito dahil mahal na namin ang isa’t isa. Sa inyong palagay, ano ang mangyayari sa magulong relasyon na napasukan ko?

KASAGUTAN

1. Duwag at may kabog ka pala sa dibdib, pero bakit mo pa pinasok ang ganyang buhay? Samantala, bagama’t malinaw na nakikita ang Guhit ng Pambababae o Panandaliang Pakikipagrelasyon (Drawing A. at B. f-f arrow a.) sa kaliwa at kanan mong palad, maliwanag ang tugon na panandalian lamang ang nasabing pambababae.

2. Ibig sabihin, anuman ang mangyari, mabisto man ni misis o hindi ang ginagawa mong kalokohan ngayon, ang nasabing pambababae ay siguradong hindi magtatagal. At kung sa panahon ngayon, tunay ngang hindi ito makakaapekto sa inyong pamilya, gayundin sa relasyon n’yong mag-asawa. Pero hindi ‘yun ang delikado, bagkus, ang mas nakakatakot ay baka dumating ang sandali na mawili ka sa pambabae dahil hindi ito nabibisto ng iyong misis, na siya namang huwag mong gagawin.

3. Sapagkat kahit matino at maganda ang kaisa-isang Marriage Line (Drawing A. at B. 1-M arrow b.) sa kaliwa at kanan mong palad, hindi mo naman dapat panghawakan ang pag-aanalisa na habambuhay na magiging matatag ang inyong pamilya. Dapat mo ring pansinin ang medyo nagulo o nabiyak na Heart Line (Drawing A. at B. h-h arrow c.) sa kaliwa at kanan mong palad, na malinaw na indikasyon o tanda na bagama’t makakalusot ang pambababae mong ginagawa ngayon, ngunit kapag ito ay inulit-ulit mo pa, may tendency na manganib ang relasyon n’yong mag-asawa hanggang sa tuluyang masira ang iyong pamilya.

MGA DAPAT GAWIN

1. Sabi nga Takbar, “Once is enough,” at hindi mo na ito dapat sundan pa kung sakaling tuluyang maputol ang relasyon n’yo ng kasalukuyang babae mo. ‘Yun ang dapat at talagang mangyayari sa iyong kapalaran.

2. Ayon sa iyong mga datos, hindi matatapos ang 2023, sa sandaling nalipat ng lugar ng trabaho ang kasalukuyan mong girlfriend, unti-unting lalabo hanggang sa lumamlam ang iyong relasyon. Sa panahong ‘yun, tulad ng naipaliwanag na, tuluyan na kayong maghihiwalay dahil sa malayong lugar, makakaroon siya ng bagong boyfriend at sa parte mo naman, muli kang makakabalik sa pagiging matinong ama ng iyong mga anak at ulirang mister, na walang ibang babae kundi si misis lamang.

Crush na workmate, magiging bf kahit torpe

ni Maestro Honorio Ong @Kapalaran Ayon sa Palad | January 26, 2023

KATANUNGAN

1. May kasamahan ako sa office at tawagin na lang natin siyang Jayson. Alam kong may crush siya sa akin dahil sa tuwing nasa office kami, madalas kong mapansin na nakatingin siya sa akin, pero hindi naman niya ako kinakausap. Sa jeep naman, kapag magkasabay kami ay tingin siya nang tingin sa akin, pero hindi naman kami nagkikibuan. May pagkatorpe at mahiyain siya, gayundin, bago lang siya sa office namin at mag-iisang buwan palang siyang pumapasok.

2. Ang totoo nito, noong una ay nagdadalawang-isip pa ako na may crush siya sa akin dahil baka assuming lang ako. Pero na-confirm kong crush niya talaga ako dahil sinabi ng kaibigan niya na kaibigan ko rin na may gusto sa akin si Jayson, kaya lang, nahihiya ito kaya hindi ako magawang kausapin.

3. Gusto kong maliwanagan kung may pag-asa na siya ang magiging first boyfriend ko. Sa totoo lang, hindi pa rin ako nagkaka-boyfriend kahit kailan at habang tumatagal, parang nagkakagusto na rin ako sa kanya kahit hindi kami nagkakausap.

KASAGUTAN

1. Kahit pipe o mute si Jayson dahil sa kanyang pagiging mahiyain, tiyak ang magaganap sa susunod na mga araw. Ang malinaw at mahabang kaisa-isang Marriage Line (Drawing A. at B. f-f arrow a.) sa kaliwa at kanan mong palad, na sinabayan pa ng maganda at kaaya-ayang Heart Line (h-h arrow b.) sa kaliwa at kanan mong palad ang mangyayari at masusunod.

2. Ang naturang Marriage Line ay nagsasabing darating ang eksaktong panahon na hindi maiiwasan na kapag patuloy pa rin kayong nagkikita sa inyong opisina, tulad ng naipaliwanag sa itaas, kahit sabihin may torpe at mahiyain siya, tiyak ang magaganap — tuluyang mahuhulog ang loob mo sa kanya at ganundin siya sa iyo hanggang sa maipagtapat ang malaon na niyang kinikimkim na pag-ibig at pagmamahal sa iyo.

3. Sa sandaling nagkabistuhan na ng kani-kanyang damdamin, kapwa kayo kikiligin sa isa’t isa, magkukulay rosas ang inyong paligid, hanggang sa natural na ring mabuo ang matimyas, maligaya at wagas na relasyon.

DAPAT GAWIN

Ayon sa iyong mga datos, Arianne, sa susunod na buwan ng Pebrero hanggang Marso, pinakamatagal na sa buwan ng Abril, habang patuloy kayong nagkikita, nagkakatinginan at nagkakasabay sa pampasaherong jeep, hindi magiging hadlang ang pagiging mahiyain ni Jayson. Tiyak na hindi n’yo na mapipigilan pa ang susunod na pangyayari, kung saan huhulagpos at huhulagpos ang kinikimkim n’yong damdamin sa isa’t isa, mabubuo ang matimyas at nakakakilig na pag-ibig, na hahantong sa maligaya at panghabambuhay na relasyon.