HRM graduate, yayaman sa negosyong pagkain

ni Maestro Honorio Ong @Kapalaran Ayon sa Palad | February 26, 2023

KATANUNGAN

1. Masipag naman akong maghanap ng trabaho, pero ang problema, hanggang ngayon ay wala pa rin akong regular na trabaho. Minsan na akong nakapagtrabaho, kaya lang, nahirapan ako, kaya umalis din ako ru’n at ngayon ay wala na ulit akong trabaho.

2. Gusto kong malaman kung kailan kaya ako magkakaroon ng regular na trabaho? Nakatapos ako ng HRM at balak kong kumuha ng ibang kurso na puwede sa abroad.

3. Kung kukuha ako ng bagong kurso, kakayanin ko ba ito at kung sakaling makatapos ako, makapag-aabroad ba ako?

KASAGUTAN

1. Tama ang binabalak mo na mag-abroad, subalit hindi ka na dapat pang kumuha ng ibang kurso, sa halip na pagbutihin mo ang kasalukuyan mong propesyon na may kaugnayan sa Hotel and Restaurant Management at palawigin mo pa ito sa maraming larangan, makikita mo na sa mga bagay na may kaugnayan sa pagkain at pagseserbisyo, mas madali kang uunlad at aasenso.

2. Ang pag-aanalisang sa mga sining na may kaugnayan sa pagluluto, pagma-manage ng karinderya, restoran, pagseserbisyo sa mga tao at iba pang gawaing may kaugnayan dito, tiyak na aasenso ka. Ito ay madali namang kinumpirma ng matambok at makapal na Bundok ng Sining na siya ring tinatawag na Mount of Sun (Drawing A. at B. arrow a.), na sinuportahan ng makapal at matambok ding Bundok ng Enerhiya na siya ring tinatawag na Mount of Venus (arrow b.) sa kaliwa at kanan mong palad.

3. Tanda na dagdag na sipag at inobasyon lang ang kailangan sa iyong kurso at darating din ang panahon na makakasumpong ka ng mas okey at regular na trabaho sa isang hotel o malaking food company sa ating bansa.

4. Sa puntong ito ng iyong buhay, magkakaroon ka ng tunay na karanasan na may kaugnayan sa iyong kurso at pagkalipas ng mga dalawa hanggang tatlong taon, kusang magaganap ang malinaw na Travel Line (Drawing A. at B. t-t arrow c.) sa kaliwa at kanan mong palad, na nagpapahiwatig ng mabunga at mabiyayang pangingibang-bansa.

MGA DAPAT GAWIN

1. Ayon sa iyong mga datos, Monique, ituloy mo lang ang pagsisikap na mag-apply nang mag-apply upang makahanap ng regular na trabaho. Sapagkat tiyak na ang magaganap sa takdang panahon na inilaan ng kapalaran, kung saan ngayong 2023 at sa buwan ng Setyembre o Oktubre, makakatagpo ka ng regular at magandang trabaho.

2. Pagsapit naman ng taong 2027 at sa edad mong 31 pataas, sa pamamagitan ng kurso na iyong natapos, may mabunga at mabiyayang pangingibang-bansa na itatala sa iyong kapalaran.

Manliligaw na may kaya sa buhay, mag-aahon sa hirap

ni Maestro Honorio Ong @Kapalaran Ayon sa Palad | February 20, 2023

KATANUNGAN

1. May dalawang manliligaw ako ngayon, Maestro. ‘Yung una ay matagal ko nang kaibigan at kakilala dahil kaklase ko siya noong high school, pero mahirap lang sila at hindi siya nakatapos ng pag-aaral, habang ‘yung ikalawa naman ay may kaya sa buhay o sabihin na nating mayaman ang angkan sa aming lugar.

2. Mahirap lang kami, kaya panay ang sulsol ng mga kapatid ko, gayundin ang nanay ko na sagutin ko na ‘yung mayaman kong manliligaw para kapag napangasawa ko siya ay yumaman na rin kami, makabili ng sariling bahay at makaalis sa apartment na matagal na naming pinagtitiisan at inuupahan.

3. Kaya gusto kong malaman, Maestro, kung nakaguhit din ba sa mga palad ng isang tao kung siya ay makakapag-asawa ng mayaman at sa palagay n’yo, ito ba ang nakaguhit sa mga palad ko? Kung sakaling mag-asawa ako, kanino higit na liligaya sa dalawang lalaking ito?

KASAGUTAN

1. Sabi ng kapitbahay naming mukhang pera, “Hindi lamang sa pag-ibig nabubuhay ang tao kundi sa salapi rin.” Ganu’n nga ang posibleng mangyayari —makakapag-asawa ka ng lalaking hindi lang may kaya sa buhay o mayaman. Bagkus, bukod sa mapera ay posible ring siya ay kilala sa lipunan o may marangal na pamilya sa inyong lugar.

2. Ito rin naman ang nais ipahiwatig ng matipuno, makapal at mahabang Guhit ng Lalaki (Drawing A. at B. K-K arrow a.) na kusang sumabay (arrow b.) at kalaunan ay ganap na ring pumatong at nakiisa sa Fate Line (Drawing A. at B. F-F arrow c.) sa kaliwa at kanan mong palad.

3. Tanda na hindi basta-bastang lalaki ang itinakda ng kapalaran na iyong makakasama habambuhay. Bagkus, gaya ng nasabi na, ang lalaking nakatakda mong mapangasawa ay siya na ring nilalang na nakatakdang mag-ahon sa iyo sa kahirapan at magbigay sa inyong pamilya ng isang maalwan at nakaririwasang pamumuhay. At dahil medyo mayaman ang lalaki na iyong makakaisang dibdib, ang nasabing pag-aasawa ay magiging masagana at habambuhay na magiging maligaya.

MGA DAPAT GAWIN

1. Habang, ayon sa iyong mga datos, Jenny, sa pagdating ng mayaman mong manliligaw, matupad ang pangarap ng pamilya mo na makapag-asawa ka ng mayaman, kaya ‘wag mo na itong palagpasin pa. Sapagkat ito rin ang nais ipahiwatig ng iyong mga datos na sinuportahan din ng birth date mong 23.

2. Ang birth date mong 23 ay nagsasabing sa pag-aasawa, tuluyan nang makakalaya sa kahirapan ang inyong pamilya, hatid ng lalaking mayaman na nagtataglay ng zodiac sign na Aquarius. Habang, nakatakdang maganap ang nasabing pag-aasawa sa susunod na taong 2024 at sa edad mong 25 pataas (Drawing A. at B. 1-M arrow d. at h-h arrow e.). Ito ay magdudulot ng maalwan at masaganang kapalaran habambuhay, hindi lang sa sarili mo kundi sa buo mong pamilya.

Taong uno, nakatakdang makapag-abroad pero dapat marunong maghawak ng pera

ni Maestro Honorio Ong @Kapalaran Ayon sa Palad | February 18, 2023

KATANUNGAN

1. Nasa New Zealand ngayon ang sister-in-law ko at tinutulungan niya ako para makapagtrabaho ru’n. Almost 10 years na siya sa nasabing bansa at may magandang career na siya, gayundin, may itinatayo raw siyang negosyo, kaya gusto niya akong makapunta ru’n para makatulong niya ako.

2. Sa kasalukuyan ay nag-aayos na ako ng mga papeles. Sa palagay n’yo, Maestro, may suwerte ba ako sa pangingibang-bansa, partikular sa New Zealand at kung matutloy ako, kailan ito mangyayari?

KASAGUTAN

1. May malinaw at malawak na Travel Line (Drawing A. at B. t-t arrow a.) sa kaliwa at kanan mong palad. Tanda na sa takdang panahon na inilaan ng kapalaran, makakapanirahan at makakapagtrabaho ka sa ibayong-dagat.

2. Ang pag-aanalisang makakapag-abroad ka ay madali namang kinumpirma ng birth date mong 28 o 1 (2+8=10/ 1+0=1), kung saan pagkaraniwan na sa mga taong isinilang sa mga petsang 1, 10, 19 at 28, kung gugustuhin lang talaga nila ay nakapangingibang-bansa sila at nagkakaroon ng maalwan at produktibong karanasan sa ibayong-dagat.

3. Ang problema lang, kapag nakapag-abroad na ang mga Taong Uno (1) tulad mo, mabilis ding nauubos ang kanilang kinita sa pangingibang-bansa dahil sa kanilang pagiging galante, palakaibigan at magastos. Subalit kung matutunan ng mga Taong Uno ang magtipid o magsinop ng kabuhayan habang sila ay nasa ibang bansa, ru’n lamang magkakaroon ng bunga o halaga ang salapi na kanilang pinaghirapan sa abroad.

4. Gayunman, tulad ng nasabi na, kahit magpabalik-balik nang maraming beses sa abroad ang mga Taong Uno na tulad mo, pero kung hindi niya magagawang sinupin ang kanyang kinikita, sa umpisa lang magiging maluwag ang kanyang buhay. Subalit sa bandang huli, back to zero ang kanyang kabuhayan at mahihirapan na siyang maka-recover.

DAPAT GAWIN

Habang, ayon sa iyong mga datos, Maricel, ituloy mo lang ang pag-a-apply sa abroad, sapagkat ayon sa iyong mga datos, tiyak ang magaganap — sa last quarter ng 2023 o first quarter ng 2024, sa buwan ng Enero hanggang Abril at sa edad mong 33 pataas, may mabunga at mabiyayang pangingibang-bansa na itatala sa iyong kapalaran.